Read Alur Lembe Mi Julawi 1 Bible Online

Lembe Mi Julawi 1 - Alur bible

Lembe Mi Julawi 1

¹Man Yehova lwong’o Musa, man eyero ire kud i hema mi cokri, ewacu kumae,

²Yer ni nyithindho mir Israel, man iwac igi kumae, Kinde ma ng’atu moko m’i kindwu thiero girathiera ni Yehova, wuthier girathiera mu kind lim, en e kind dhok kud udul rombe.

³Tek girathiera pare en e lam m’awang’a mi dhok, ethier thwon ma mulima mbe i kume; ethiere dhugola mi hema mi cokri, kara jujole i wang’ Yehova.

⁴Man ebiketho cinge i wi lam m’awang’ane; man jubijole kud i bang’e kara utim adunya pire.

⁵E ebinego thwon i wang’ Yehova: man wot Harun, ma gi julam, gibithiero rimone, man gibikiro rimone dhu pemblam gbur ma ni dhugola mi hema mi cokri.

⁶Man ebiyang’u lam m’awang’a, man ebithume i wathne.

⁷E wot Harun ma gi julam gibiketho mac wi pemblam, man gibitadu yen wi maje;

⁸e wot Harun, ma gi julam gibiketho wathne, en e wie, ku mio, kakare wi yen ma ni wi mac ma ni wi pemblam;

⁹ento jambie ku tiende ebilwoko ku pi. Kare ceke jalam biwang’u wi pemblam, ni lam m’awang’a, girathiera ma jutimo ku mac, mi ng’wic mido ma ng’ar ni Yehova.

¹⁰Man tek girathiera pare en e mir udul lim, kind rombe, kadi kind diegi, ni lam m’awang’a; ebithiero nyok ma mulima mbe i kume.

¹¹Man ebinege ng’et pemblam ma yor ariwa ma malu i wang’ Yehova; man wot Harun, ma julam, bikiro rimone wi pemblam gbur.

¹²Man ebithume i wathne, karacelo ku wie man mione; e jalam bikethogi kakare wi yen ma ni wi mac ma ni wi pemblam;

¹³ento jambie ku tiende ebilwoko ku pi. E jalam bithiere dho, man ebiwang’e wi pemblam; en e lam m’awang’a, lam ma jutimo ku mac, mi ng’wic mido ma ng’ar ni Yehova.

¹⁴Man tek girathiera pare ma ni Yehova bedo lam m’awang’a mi winyo, ebilund thiero girathiera pare mir akuru, kadi mi nyathuk ma thindho.

¹⁵E jalam bikele ba pemblam, man ebing’wenyo wie, man ebiwang’e wi pemblam; man jubiketho rimbe cwir ng’et pemblam;

¹⁶man ebikabu kusukurune ku weine man ebibaye vut pemblam i ng’ete ma yo nyangu, i ka mi vuru:

¹⁷ebiyeco bote, ento ebipoko ie ario ngo. Man jalam biwang’e wi pemblam, wi yen ma ni wi mac: en e lam m’awang’a, lam ma jutimo ku mac, mi ng’wic mido ma ng’ar ni Yehova.