Read Alur Lembe Mi Julawi 10 Bible Online

Lembe Mi Julawi 10 - Alur bible

Lembe Mi Julawi 10

¹Man Nadab kud Abihu, ma wot Harun, gigamu tabu mir udok ma ng’wice ng’ar migi kubang’gi kubang’gi, man giketho mac i ie, e giketho udok ma ng’wice ng’ar i wie, man githiero mac ma tung’ i wang’ Yehova, m’eng’olo igi ngo.

²E mac uai i wang’ Yehova, man ewang’ugi, e githo i wang’ Yehova.

³E Musa wacu ni Harun kumae, Maeni en e lembe ma Yehova yero, uwacu kumae, Abibedo leng’ ni kum ju m’ucoro ceng’ni an, man abinwang’u dwong’ i wang’ dhanu ceke. E Harun ubedo ling’.

⁴E Musa lwong’o Micael ku Elzafan, ma wot Uziel ma neru Harun, man ewacu igi kumae, Wucor ceng’ni, wuter utumegwu woko ng’ei kagonjo kud i wang’ kamaleng’.

⁵Kum kumeno gicoro ceng’ni, man giterogi ku kanzu migi ku i kagonjo, calu Musa wacu.

⁶E Musa wacu ni Haran, man ni Eleazar, man ni Ithamar, ma wote kumae, Kud wukab girauma mi wiwu, kadok kendi mu de kud wuyeci; kara kud wutho, man kara kwinyo kud unege kum udul ceke: ento wek utumegwu, ma ot mir Israel dho, giywag wang’uwang’ ma Yehova cwinyo.

⁷Man kud wuwok woko ku i dhugola mi hema mi cokri, wumaru tho; kum mo m’awira pa Yehova ni i kumwu. E gitimo calku lembe pa Musa.

⁸Man Yehova yero ni Harun, ewacu kumae,

⁹Kud wumadh pigulok kadi giramadha ma lake tek, in, kadi woti wukugi, kinde ma wumondo i hema mi cokri, kara kud wutho: ebibedo ni cik mi nja cil kum dhanum’utuk mu ceke:

¹⁰man kara wung’i kind gin ma leng’ ku gin ma sai, man kind gin m’ucido ku gin ma leng’;

¹¹man kara wuponj nyithindho mir Israel ku cik ceke ma Yehova yero igi ku yo ba Musa.

¹²E Musa yero ni Harun, man ni Eleazar man ni Ithamar, ma wote m’udong’ kumae, Wugam lam mi mogo m’udong’ ma kind lam pa Yehova ma jutimo ku mac, man wucame ma thobi mbe i ie i ng’et pemblam; kum en e leng’ m’usagu;

¹³man wucame i kamaleng’, kum en e makapiny peri, man makapiny mi woti, ma kind lam pa Yehova ma jutimo ku mac: kum jung’olo ira kumeno.

¹⁴Man wucam kor m’awira ku bamb m’ating’a i ka ma leng’, in, ku woti, ku nyigi wukugi: kum jumiogi calu makapiny peri, man makapiny mi woti, ku kind lam mi girathiera mi kwiocwiny mi nyithindho mir Israel.

¹⁵Gibikelo bam m’ating’a ku kor m’awira karacelo ku lam ma jutimo ku mac mi mio, kara juwire ni lam m’awira i wang’ Yehova: e ebibedo peri, ku mi woti wukugi, ni makapiny mi nja; calu Yehova ng’olo.

¹⁶E Musa yenyo diel mi lam mi dubo kle kle, man, nen, juwang’e: e ng’ecwiny unege kum Eleazar man kum Ithamar, ma wot Harun m’udong’, ewacu kumae,

¹⁷Pirang’o wukwero camu lam mi dubo i ka mi kamaleng’, kum en e leng’ m’usagu, man emie iwu kara ukab dubo mir udul woko, kara utim adunya pigi i wang’ Yehova?

¹⁸Nen, jukelo rimbe ngo yor i kamaleng’: maku wucame andha i kamaleng’, calu ang’olo.

¹⁹E Harun uwacu ni Musa kumae, Nen, githiero lam mi dubo migi ku lam m’awang’a migi tin i wang’ Yehova; e wadi gin maeni wok i kuma: man tek acamu lam mi dubo tin, ebiyire i wang’ Yehova?

²⁰E kinde ma Musa winjo maeni, eyire i wang’e.