Read Alur Lembe Mi Julawi 11 Bible Online

Lembe Mi Julawi 11 - Alur bible

Lembe Mi Julawi 11

¹E Yehova yero ni Musa man ni Harun, ewacu igi kumae,

²Yer ni nyithindho mir Israel, wac kumae, Maeni gin ma kwo ma wucopo camu i kind lim ceke ma ni wi ng’om.

³Gin ceke ma tek lwet tiende karu, man ma tiende kara, man ma nyamu wei, i kind lim, maeno wucopo camu.

⁴Ento maeni kud wucam i kind ju ma nyamu wei, kadi kind ju ma lwet tiendgi karu: ngamia, kum enyamu wei ento lwet tiende karu ngo, ebedo m’ecido iwu.

⁵Man uduka, kum enyamu wei ento lwete karu ngo, ebedo m’ecido iwu.

⁶Man afoyo, kum enyamu wei ento lwete kara ngo, ebedo m’ecido iwu.

⁷Mankul, kum lwete karu, mankindtiende kak, ento enyamu wei ungo, ebedo m’ecido iwu.

⁸Kud wucam ringe, man cogogi de kud wumul; gibedo ma gicido iwu.

⁹Wucopo camu maeni i kind gin ceke ma ni i pi: gin ceke ma tek cwake nuti kud apokane de i pi, i nam de, man i kulo, maeno wucopo camu.

¹⁰Man gin ceke ma cwake kud apokane mbe i nam, man i kulo, mi gin ceke ma wotho i pi, man giracwia ma kwo ceke ma ni i pi, gi ginmajudagu iwu,

¹¹man gibibedo ginmajudagu iwu; kud wucam kum ring’gi moko, man avujgi bed ni ginmajudagu iwu.

¹²Gin ceke ma tek cwake kud apokane mbe i pi, maeno en e ginmajudagu iwu.

¹³Man maeni bibedo iwu ni ginmajudagu i kind winyo; jubicamugi ngo, gin gi ginmajudagu: acur, man alungu, kud ango,

¹⁴man ulwith, kud acei ma calku kite,

¹⁵ku bang’ ngoro ceke ma calku kite,

¹⁶man udo, kud abiba ma diewor, man awidha, kud abiba ma calku kite,

¹⁷man tula ma nok, ku mambatha, ku tula ma dit,

¹⁸ku tula ma ju tunge, man mambatha ma tung’, kud alungu ma tung’,

¹⁹man weli, kud ugoro calku kite, man ukok, kud ulic.

²⁰Gin ma lak ma ju bombe ceke ma wotho wi tiende ang’wen en e ginmajudagu iwu.

²¹Ento maeni wucopo camu i kind gin ma lak ma ju bombe ceke ma wotho wi tiende ang’wen, ma tiendgi ni wi ufunytiendgi, ma gipor kudo wi ng’om;

²²en e maeni ma wucopo camu i kindgi: bonyo calku kite, man bonyo ma wie wang’ calku kite, man undir calku kite, kud usene calku kite.

²³Ento gin ma lak ma ju bombe ceke, ma tiendgi ang’wen ang’wen, gi ginmajudagu iwu.

²⁴Man wubicido ni kum maeni: ng’atu ma tek umulo avujgi bibedo m’ecido cil uthieno;

²⁵man ng’atu ma tek uyeyo gin mir avujgi bilwoko kendi pare, man ebibedo m’ecido cil uthieno.

²⁶Ku ba lim ceke ma lwete karu, ento kind tiende pokre ngo, kadi enyamu wei de ngo, ebedo m’ecido iwu: ku ba dhanu ceke m’umulogi gibicido.

²⁷Man gin ceke ma wotho ku die cinge, i kind lim ceke ma wotho ku wi tiende ang’wen, gibedo ma gicido iwu: ng’atu ma tek umulo kum avujgi bicido cil uthieno.

²⁸Man ng’atu m’uyeyo avujgi bilwoko kendi pare, man ebicido cil uthieno: gibedo ma gicido iwu.

²⁹Maeni gi gin ma gibedo ma gicido iwu i kind gin ma lak i ng’om: gor, man uyolum, ku ragwec ma dit calku kite,

³⁰man kwigo, ku ng’ec, man afodlia, man ragwec athil, ku balang’ong’no.

³¹Maeni en e gin m’ubedo m’ecido iwu i kind gin ceke ma lak: ng’atu ma tek umulo kumgi, kinde ma githo, bibedo m’ecido cil uthieno.

³²Man gin ma tek kindgi moko upodho i wie, kinde ma githo, ebibedo m’ecido; kadok en e agulu moko mi yen, kadi kendi, kadi lau, kadi usau, agulu ceke ma tek nuti, ma jutimo kudo tic moko, jukojukethe i pi be, man ebibedo m’ecido cil uthieno; e ebilund bedo leng’.

³³Man agulu mir ulobo kubang’e kubang’e, ma kindgi moko podho i ie, gin ceke ma tek ni i ie bibedo m’ecido, man jubing’enye.

³⁴Cemo ceke ma ni i ie ma jucopo camu, maeno ma jukonjo pi i wie, bibedo m’ecido; man giramadha ceke ma jucopo madhu i agulu ma wadi maeni kubang’e kubang’e bibedo m’ecido.

³⁵Man gin ceke ma ng’et avujgi podho i wie bibedo m’ecido: kadok kendo kadok cibi mir agulu jubing’enye nziki nziki: gibedo ma gicido, e gibibedo ma gicido iwu.

³⁶Ento kulo kadi pi m’atong’a ma pi cokre i ie bibedo leng’: ento gin m’umulo avujgi bibedo m’ecido.

³⁷Man tek ng’et avujgi podho wi kodhi m’acoya moko ma jubicoyo, en e leng’.

³⁸Ento tek juketho pi wi kodhine, man ng’et avujgi podho i wie, ebedo m’ecido iwu.

³⁹Man tek lim moko, ma wucopo camu kume, utho; ng’atu m’umulo avuje, bibedo m’ecido cil uthieno.

⁴⁰Man ng’atu m’ucamu kum avuje bilwoko kendi pare, man ebibedo m’ecido cil uthieno: ng’atu m’uyeyo avuje bende bilwoko kendi pare, man ebibedo m’ecido cil uthieno.

⁴¹Man ku ba gin ma lak ma lak wi ng’om en e ginmajudagu: jubicame ngo.

⁴²Ku ba gin ceke ma mol ku kore, man ku ba gin ceke ma wotho wi tiende ang’wen, kadi gin ceke ma tek ubedo ku tiende dupa, en e gin ceke ma lak ma lak wi ng’om, gin kud wucamgi; gi ginmajudagu.

⁴³Kud wudwokru giwu ni ginmajudagu ku giralaka ma lak, kadok kud wucidru kugi, ma nia wucidru kudo.

⁴⁴Kum an a Yehova Mungu mu: ka kumeno wudwokru giwu leng’, man wubed leng’; kum an a leng’: kadok acida de kud wucidru ku kwond gin moko ma lak ma wotho wi ng’om.

⁴⁵Kum an a Yehova m’uwodhowu woko kud i ng’om Misiri, kara abed Mungu mu: ka kumeno wubed leng’, kum an a leng’.

⁴⁶Maeni cik mi lim, man mi winyo, man mi giracwia ma kwo kubang’e kubang’e ma wotho i pi, man mi giracwia kubang’e kubang’e ma lak wi ng’om:

⁴⁷kara jung’i kind giki m’ucido ku giki ma leng’, man kind gin ma kwo ma jucopo camu ku gin ma kwo ma jucopo camu ngo.