Read Alur Lembe Mi Julawi 13 Bible Online

Lembe Mi Julawi 13 - Alur bible

Lembe Mi Julawi 13

¹Man Yehova yero ni Musa man ni Harun, ewacu kumae,

²Tek ng’atu moko bibedo ku vur m’ukwode i dendkume, kadi apokarem, kadi wang’ rem m’urieny, man edoko ni rem mi joi i dendkume, jubilund kele ba Harun ma jalam, kadi ba kind wote moko ma gi julam:

³e jalam bineno wi rem i dendkume: man tek yukkum ma i rem udoko tar, man tek wang’ rem umwony ma sagu dendkume, nwang’u en e rem mi joi; e jalam bineno wie, e ebing’olo ya ecido.

⁴Man tek wang’ rem urieny ubedo tar i dendkume, man tek wang’ rembe mwony ma sagu dendkume ngo, man yukkum ma i rembe doko tar ungo, julam bilund ciko ba ng’atu ma rem ni i kume ceng’ abiro:

⁵e jalam bineno kume i ceng’ mir abirone: man, nen, tek kud i wang’e rembe moko, man rembe nyai i dendkume ngo, jalam bilund ciko bang’e ceng’ abiro mange:

⁶e jalam bineno kume kendo i ceng’ mir abirone; man, nen, tek rembe wang’e tal, man rembe nyai ungo i dendkume, jalam bilund ng’olo nia e leng’: en e apoka rem: e ebilwoko kendi pare, man ebibedo leng’.

⁷Ento tek apoka rembe nyai kokro i dendkum, yo ng’ei nyuth m’enyuthre ko ni jalam pi dwokrileng’ pare, ebinyuthre gire ni jalam kendo:

⁸e jalam bing’io; man, nen, tek apoka rem unyai i dendkum, jalam bilund ng’olo nia ecido: en e joi.

⁹Kinde ma rem mi joi ni i kum dhanu, jubilund kele ba jalam;

¹⁰e jalam bing’io; man, nen, tek wang’ rem ucudo tar i dendkum, man eloko yukkume tar, man tek ring’kum m’ucudo bedo vuk vuk kwar,

¹¹en e joi ma con i dendkum mi ring’kume, e jalam bing’olo nia ecido: ebiciko bang’e ngo: kum ecido.

¹²Man tek joi podho ndhak i dendkum, man tek joi mwonyo dendkum won rem tunglu ugambre i wie cik i tiende, calu ma nen ni jalam;

¹³e jalam bilund ng’io; man, nen, tek joi umwonyo ring’kume tunglu, ebing’olo nia won rem ubedo leng’: elokre ceke tar: e leng’.

¹⁴Ento kinde ma tek ring’kum m’ubogre nen i kume, ebibedo m’ecido.

¹⁵E jalam bing’io ring’kume m’ubogre, man ebing’olo nia ecido: ring’kum m’ubogre ecido: en e joi.

¹⁶Kadi tek ring’kume m’ubogre lokre kendo, man edoko tar, ebilund bino ba jalam;

¹⁷e jalam bing’ie; man, nen, tek rembe lokre tar, e jalam bilund ng’olo nia ng’atu ma won rem leng’: en e leng’.

¹⁸Man kinde ma ring’kum ubedo ku vur i dendkumne, man ecangu,

¹⁹man ecudo tar i wang’ vurne, kadi wang’ rem m’urieny, ma kwar kwar, jubilund nyuthe ni jalam;

²⁰e jalam bing’io; man, nen, tek enen m’emwony ma sagu dendkum, man yukkumne lokre tar, e jalam bilund ng’olo nia ecido: en e rem mi joi, eluro ku vur.

²¹Ento tek jalam bing’ie, man, nen, yukkum ma tar umbe i wang’e, man emwony ma sagu dendkum ungo, ento emoko; e jalam bilund ciko bang’e ceng’ abiro:

²²man tek enyai ndhek i dend kum, jalam bilund ng’olo nia ecido: en e rem.

²³Ento tek poyo rem m’urieny ubedo kakare, man enyai ungo, en e poyo mi vur; jalam bing’olo nia e leng’.

²⁴Kadi kinde ma ring’kum ubedo ku ka ma mac uwang’u i dendkume, man ring’kumne bogre m’i ka ma mac uwang’u doko ni poyo rem m’urieny, ma kwar kwar, kadi ma tar;

²⁵jalam bilund ng’ic; man, nen, tek yukkum ma i poyo rem m’urieny udoko tar, man enen thuth ma sagu dendkum; en e joi, epodho i wang’ mac: e jalam bing’olo ya ecido: en e tho ma rac mi joi.

²⁶Ento tek jalam ung’ie, man, nen, yukkum ma tar umbe i poyo mac m’urieny, man emwony ma sagu dendkum ungo, ento emoko; e jalam bilund ciko bang’e ceng’ abiro:

²⁷man jalam bing’ie i ceng’ mir abirone: tek emeire i dendkum, jalam bilund ng’olo nia ecido: en e rem mi joi.

²⁸Man tek poyo rem m’urieny ubedo kakare, man enyai i dendkum ungo, ento emoko; en e poyo mac m’ucudo, e jalam bing’olo ya e leng’: kum en e poyo m’uwang’.

²⁹Man kinde ma ng’atu ma nico kadi ng’atu ma dhaku bedo ku rem i wie kadi wi yir,

³⁰jalam bilund ng’io rembe; man, nen, tek enen thuth ma sagu dendkum ungo, man yir ma ngbathra ni i ie, e jalam bilund ng’olo nia ecido: en e vur ma apokane cudo, en e joi mi wie kadi mi yir.

³¹Man tek jalam ung’io rem mi vur ma apokane cudo, man, nen, enen thuth ma sagu dendkum ungo, man yir ma col umbe i ie, jalam bilund ciko ba ng’atu ma won rem mi vur ma apokane cudo, man, nen, enen thuth ma sagu dendkum ungo, man yir ma col umbe i ie, jalam bilund ciko ba ng’atu ma won rem mi vur ma apokane cudo ceng’ abiro:

³²man i ceng’ mir abirone jalam bing’io rembe; man, nen, tek vur ma apokane cudo nyai ungo, man yir ma ngbathra mbe i ie, man vur ma apokane cudo nen thuth ma sagu dendkum ungo,

³³jubilund gware, ento vur ma apokane cudo jubigwaru ngo; e jalam biciko ba ng’atu ma won vur ma apokane cudo ceng’ abiro mange:

³⁴man i ceng’ mir abirone jalam bing’io vur ma apokane cudo; man, nen, tek vur ma apokane cudo nyai ungo i dendkum, man enen thuth ma sagu dendkum ungo; jalam bilund ng’olo ya e leng’: man ebilwoko kendi pare, e ebedo leng’.

³⁵Ento tek vur ma apokane cudo meire i dendkum yo ng’ei dwokrileng’ pare,

³⁶jalam bilund ng’ic; man, nen, tek vur ma apokane cudo nyai i dendkum, jalam biyenyo yir ma ngbathra ngo; ebedo m’ecido.

³⁷Ento tek i wang’e vur ma apokane cudo moko, man yukkum ma col uwobo i ie; vur ma apokane cudo cangu, en e leng’: e jalam bing’olo nia e leng’.

³⁸Man kinde ma ng’atu ma nico kadi ng’atu ma dhaku ubedo ku poyo rem m’urieny i dendkum, mi ring’kum en e poyo rem ma rieny ma tar;

³⁹jalam bilund ng’io; man, nen, tek poyo rem m’urieny i dendkum mi ring’kumgi bedo tar tar, en e agara, eluro i dendkum; en e leng’.

⁴⁰Man tek yukwi ng’atu moko luny, wie wang’; ento ebedo leng’.

⁴¹Man tek yukwie mi ter nyime luny, ter nyime twere; ento e leng’.

⁴²Ento tek rem ma kwar kwar nuti i wie m’uwang’, kadi ter nyim m’utwere; en e joi m’uluro i wie m’uwang’, kadi ter nyime m’utwere.

⁴³Jalam bilund ng’ic; man, nen, tek cud mi rembe bedo kwar kwar i wie m’uwang’, kadi ternyime m’utwere, calu nen mi joi i dendkum mi ring’kum;

⁴⁴en e ng’atu ma won joi, ecido: jalam bing’olo nia ecido andha; rem pare ni i wie.

⁴⁵Man won joi ma rem ni i kume, jubiyeco kendi pare, e yuk wie bigony, man ebiumo dendhoge ma yo malu, e ebikok kumae, A leng’ ungo, a leng’ ungo.

⁴⁶Nindo ceke ma rem ni i kume ebibedo m’ecido; ecido; ebibedo e kende; kabedo pare bibedo ng’ei kagonjo.

⁴⁷Kendi bende ma rem mi joi ni i ie, tek en e kendi mi yuk rombo, kadi kendi mi bongu ma nwang’;

⁴⁸tek ebedo i gin m’arudha, kadi i gin m’akieda; mi bongu ma nwang’, kadi mi yuk rombe; kadi i lau, kadi i gin moko ma jutimo ku lau;

⁴⁹tek rembe bedo col col kadi kwar kwar i kendi, kadi i lau, kadi i girarudha, kadi i girakieda, kadi i gin moko mi lau; en e rem mi joi, e jubinyuthe ni jalam.

⁵⁰E jalam bing’io rembe, man ebiciko ba gin maeno m’ubedo ku remne ceng’ abiro;

⁵¹e ebing’io rembe i ceng’ mir abirone: tek rembe nyai i kendi, kadok i girarudha, kadi i girakieda, kadi i lau, kum tic ceke ma jutimo ku lau; rembe en e joi ma ratego; ecido.

⁵²E ebiwang’u kendi, kadok gin m’arudha kadi m’akieda, mi yuk rombe, mi gin ma nwang’, kadi gin moko mi lau, ma remne ni i ie; kum en e joi ma ratego; jubiwang’e i mac.

⁵³Man tek jalam bing’io, man, nen, rembe nyai ungo i kendi, kadi i gin m’arudha, kadi i gin m’akieda, kadi i gin moko mi lau;

⁵⁴jalam bilund ng’olo nia julwok gin ma rembe ni i ie, man ebiciko bang’e ceng’ abiro kendo:

⁵⁵e jalam bing’io yo ng’ei lwok ma julwoko ko rembe; man, nen, tek rembe loko kite ngo, man rembe nyai ungo, ecido; jubiwang’e i mac: en e mir anyotha, tek ka m’uluny ubedo i wie, kadi ter nyime.

⁵⁶Man tek jalam ung’io, man, nen, rembe moko yo ng’ei lwokne, ebilund yece kud i kendi, kadi kud i lau, kadi kud i gin m’arudha, kadi kud i gin m’akieda:

⁵⁷man tek enyuthre asu i kendi, kadok i gin m’arudha, kadi i gin m’akieda, kadi i gin moko mi lau, nwang’u epodho: iwang’ gin ma rembe ni i ie ku mac.

⁵⁸Man kendi, kadok gin m’arudha, kadi gin m’akieda kadi gin moko mi lau, m’ibilwoko, tek rembe ai i kumgi, ilund ilwoke mir arionde, e ebibedo leng’.

⁵⁹Maeni cik mi rem mi joi i kendi mi gin mi yuk rombo kadi mi bongu ma nwang’, kadi i gin m’arudha, kadi gin m’akieda, kadi gin moko mi lau, ya jung’ol nia e leng’, kadi jung’ol nia e leng’ ungo.