Read Alur Lembe Mi Julawi 14 Bible Online

Lembe Mi Julawi 14 - Alur bible

Lembe Mi Julawi 14

²Maeni bibedo cik pa won joi i ceng’ mi dwokrileng’ pare: jubikele ba jalam:

³man jalam bicidho woko ng’ei kagonjo: e jalam bineno; man, nen, tek rem mi joi ucangu i kum won joi,

⁴e jalam bilund ng’olo ya jugam winyo ario ma leng’ ma kwo ni ng’atu ma jubidwoke leng’, man yendmusonge, ku gin ma kwar ngbo, man alagi:

⁵e jalam bing’olo ya juneg winyo acel i agulu mir ulobo wi pi ma mol.

⁶Man pi winyo ma kwo, ebigame, ku yendmusonge, ku gin ma kwar ngbo, kud alagi man ebijungogi ku winyo ma kwo i rimo mi winyo ma junego wi pi ma mol:

⁷man ebikiro kum ng’atu ma jubidwoke leng’ ni joi wang’ abiro, e ebing’olo ya e leng’, man ebiweko winyo ma kwo cidho i yamba.

⁸Man ng’atu ma jubidwoke leng’ bilwoko kendi pare, man ebigwaru yuke ceke, man ebijom i pi; e ebibedo leng’: man yo ng’ei maeno ebimondo i kagonjo, ento ebibedo yo ng’ei hema pare ceng’ abiro.

⁹Man ebibedo i ceng’ mir abirone, nia ebigwaru yukwie ceke ku tike ku biend wang’e, cil yukkume ceke ebigwaru: e ebilwoko kendi pare, man ebijomo kume ku pi, e ebibedo leng’.

¹⁰Man i ceng’ mir aborane ebigamu nyithi nyogi rombe ario ma mulima mbe i kumgi, man nyathi vong’ rombo acel ma rundine acel ma mulima mbe i kume, ku ng’et mogo ma yom adek mir apaje ma i katoko ni lam mi mogo, ma jujebo ku mo, ku tabu acel mi mo.

¹¹E jalam m’udwoke leng’ biketho ng’atu ma jubidwoke leng’, ku gin maeno, i wang’ Yehova, i dhugola mi hema mi cokri.

¹²E jalam bigamu nyog rombo acel, man ebithiere ni lam mi kadhukuwicik, ku tabu mi mo, man ebiwirogi ni lam m’awira i wang’ Yehova:

¹³man ebinego nyathi nyog rombo i ka ma junego ie lam mi dubo ku lam m’awang’a, i kaka mi kamaleng’: kum calu lam mi dubo en e pa jalam, e lam mi kadhukuwicik de bedo kumeca: en e leng’ m’usagu.

¹⁴Man jalam bigamu kum rimo mi lam mi kadhukuwicik, e jalam bikethe wi landu ith ng’atu ma jubidwoke leng’ ma yor acwic, man wi dwong’ lwet cinge ma yor acwic, man wi dwong’ lwet tiende ma yor acwic.

¹⁵Man jalam bigamu tabu mi mo, man ebikonje i die cinge ma yor acam gire;

¹⁶man jalam bilutho lwete ma yor acwic i mo ma ni i cinge ma yor acam, man ebikiro kum moje ku lwete wang’ abiro i wang’ Yehova.

¹⁷Man dong’ mo m’udong’ ma ni i cinge jalam biketho wi landu ith ng’atu ma jubidwoke leng’ ma yor acwic, man wi dwong’ lwet cinge ma yor acwic, man wi dwong’ lwet tiende ma yor acwic, wi rimo mi lam mi kadhukuwicik:

¹⁸man dong’ mo ma ni i cing’ jalam ebiketho i die wi ng’atu ma jubidwoke leng’: e jalam bitimo adunya pire i wang’ Yehova.

¹⁹E jalam bithiero lam mi dubo, man ebitimo adunya pire en e ng’atu ma jubidwoke leng’ ni cilo pare: man yo ku ng’eye ebinego lam m’awang’a;

²⁰man jalam bithiero lam m’awang’a ku lam mi mogo wi pemblam: e jalam bitimo adunya pire, man ebibedo leng’.

²¹Man tek en e jacan, man ecopo gamu ma dit kumeno ngo, ebilund gamu nyathi nyog rombo acel ni lam mi kadhukuwicik ma jubiwiro, kara utim adunya pire, man ng’et mogo ma yom mir apaje acel ma i katoko ma jujebo ku mo ni lam mi mogo, ku tabu mi mo;

²²man nyithindh akuru ario, ku nyithi nyathuk ario, wagi m’ecopo gamu; e acel bibedo ni lam mi dubo, mucelo ke ni lam m’awang’a.

²³Man i ceng’ mir aborane ebikelogi mi dwokrileng’ pare ni jalam, i dhugola mi hema mi cokri, i wang’ Yehova:

²⁴e jalam bigamu nyathi rombo ni lam mi kadhukuwicik, ku tabu mi mo, man jalam biwirogi ni lam m’awira i wang’ Yehova.

²⁵Man ebithumo nyathi rombo mi lam mi kadhukuwicik; man jalam bigamu kum rimo mi lam mi kadhukuwicikne, man ebikethe wi landu ith ng’atu ma jubidwoke leng’ ma yor acwic, man wi dwong’ cinge ma yor acwic, man wi dwong’ lwet tiende ma yor acwic.

²⁶E jalam bikonjo kum moje i die cinge ma yor acam gire;

²⁷e jalam bikiro kum moje m’udong’ i cinge ma yor acam ku lwete ma yor acwic wang’ abiro i wang’ Yehova:

²⁸man jalam biketho kum mo ma ni i cinge wi landu ith ng’atu ma jubidwoke leng’ ma yor acwic, man wi dwong’ lwet cinge ma yor acwic, man wi dwong’ lwet tiende ma yor acwic, wi ka rimo mi lam mi kadhukuwicik:

²⁹man dong’ mo m’udong’ ma ni i cing’ jalam ebiketho i die wi ng’atu ma jubidwoke leng’, kara utim adunya pire i wang’ Yehova.

³⁰Man ebithiero nyathin akuru acel, kadi nyathi nyathuk acel, wadi m’ecopo gamu,

³¹en e wadi ma calu ecopo gamu, acel mi lam mi dubo, man mucelo mi lam m’awang’a, karacelo ku lam mi mogo: e jalam bitimo adunya pi ng’atu ma jubidwoke leng’ i wang’ Yehova.

³²Maeni cik pa ng’atu ma rem mi joi ni i kume, m’ecopo gamu gin mi dwokrileng’ pare ngo.

³³E Yehova yero ni Musa man ni Harun, ewacu kumae,

³⁴Kinde ma wumondo i ng’om Kanan, m’amio iwu ni piny, man aketho tho mi joi i ot mi ng’om mi piny mu;

³⁵e ng’atu ma won ot bilund bino man ebiyero ni jalam, ebiwacu kumae, Kud i bang’a ebedo calu tho ni i ot.

³⁶E jalam bing’olo ya juwek ot ubed kende, ma fodi jalam kumond uneno thoje ngo, kara gin ceke ma ni i ode kud ucidre: e yo ku ng’eye jalam bimondo nineno ode:

³⁷man ebing’io thoje; man, nen, tek thoje m’ubedo kor ot ukieure man emwony, ma kit lum kadi ma kwar, man enen thuth ma sagu kor ot;

³⁸e jalam bilund ai woko kud i ot ba dhugola mi ot, man ebiciko dhu ode ceng’ abiro.

³⁹E jalam bibino kendo i ceng’ mir abirone, man ebing’io; man, nen, tek thoje nyai kor ode;

⁴⁰jalam bilund ng’olo ya jukab kidi ma thoje ni i kumgi woko, man gibaigi i ka m’ucido woko yo ng’ei adhura:

⁴¹e ebiketho jugobo ode yor i ie kingli, man gibioyo ulobone, ma gigobo, yo ng’ei adhura i ka m’ucido:

⁴²e gibigamu kidi mange, man gibikethogi i ka kidi maeno; man ebigamu ulobo mange, e ebifuyo ode.

⁴³Man tek thoje bino kendo, man epodho kum ode, yo ng’ei kabu kidi m’ekabu woko, man yo ng’ei gob m’egobo ko ode, man yo ng’ei fuye;

⁴⁴jalam bilund mondo man ebing’io; man, nen, tek thoje nyai kum ot en e tho ma ratego kum ot: ecido.

⁴⁵E ebirwombo ode, kidine, ku yende, kud ulobo ceke mi ode; man ebiterogi ng’ei adhura i ka m’ucido.

⁴⁶Mange ke ng’atu m’umondo i ode i nindo ceke ma jucike ebibedo m’ecido cil uthieno.

⁴⁷Man ng’atu m’uvuto i ode bilwoko kendi pare; e ng’atu m’ucamu i ode bilwoko kendi pare.

⁴⁸Man tek jalam bimondo, man eng’io, man, nen, thoje nyai ungo i ode, yo ng’ei fuyo ode; e jalam bilund ng’olo nia ode leng’, kum thoje kei.

⁴⁹Man ebigamu winyo ario, ku yendmusonge, man gin ma kwar ngbo, kud alagi, kara edwok ode leng’:

⁵⁰man ebinego winyo acel i agulu mir ulobo wi pi ma mol:

⁵¹man ebigamu yendmusonge, kud alagi, man gin ma kwar ngbo, ku winyo ma kwo, man ebijungogi i rimb winyo ma junego, man i pi ma mol, e ebikiro ode wang’ abiro:

⁵²man ebidwoko ode leng’ ku rimb winyo, man ku pi ma mol, man ku winyo ma kwo, man ku yendmusonge, man kud alagi, man ku gin ma kwar ngbo:

⁵³ento ebiweko winyo ma kwo cidho i yamba ku i adhura: ebitimo adunya pi ode kumeni; e ebibedo leng’.

⁵⁴Maeni en e cik mi tho mi joi ma kwonde tung’ tung’ ceke, man mi vur ma apokane cudo,

⁵⁵man mi joi m’i kendi, man m’i ot,

⁵⁶man mi vur ma kwot, man mir apoka rem, man mi wang’ rem ma rieny;

⁵⁷kara uponj kinde m’ecido, man kinde m’e leng’: maeni cik mi joi.