Read Alur Lembe Mi Julawi 15 Bible Online

Lembe Mi Julawi 15 - Alur bible

Lembe Mi Julawi 15

¹Man Yehova yero ni Musa man ni Harun, ewacu kumae,

²Wuyer ni nyithindho mir Israel, man wuwac igi kumae, Tek kasinono wok kum ng’atu moko ma nico, kum kasinonone ecido.

³Man ebibedo i cilo pare i kasinono pare: tek ring’kume labre karacelo ku kasinono pare, kadi ring’kume cere ni kasinono pare, e en e cilo pare.

⁴Ku ba kavuto ceke ma ng’atu m’ubedo ku kasinono vuto i wie bibedo m’ecido; man gin ceke m’ebedo i wie bibedo m’ecido.

⁵Man ng’atu ma tek umulo kavuto pare bilwoko kendi pare, man ebijom ku pi, man ebibedo m’ecido cil uthieno.

⁶Man ng’atu m’ubedo wi gin moko ma ng’atu m’ubedo ku kasinono bedo i wie bilwoko kendi pare, man ebijom ku pi, e ebibedo m’ecido cil uthieno.

⁷Man ng’atu m’umulo kum ng’atu ma won kasinono bilwoko kendi pare, man ebijom ku pi, e ebibedo m’ecido cil uthieno.

⁸Man tek ng’atu ma won kasinono ng’ulo lau kum ng’atu ma leng’, ebilund lwoko kendi pare, man ebijom ku pi, man ebibedo m’ecido cil uthieno.

⁹Man tek won kasinono wotho ku wi del mi kana dende bicido.

¹⁰Man ng’atu ma tek umulo gin moko ma ni yor i there bibedo m’ecido cil uthieno: man ng’atu m’uyeyo gin maeno bilwoko kendi pare, man ebijom ku pi, e ebibedo m’ecido cil uthieno.

¹¹Man ng’atu ma tek won kasinono mulo kume, ma fodi k’elwoko cinge ngo ku pi, ebilwoko kendi pare, man ebijom ku pi, man ebibedo m’ecido cil uthieno.

¹²Man agulu mir ulobo, ma ng’atu ma won kasinono mulo, jubing’enyo; man ku bang’ agulu mi yen jubilau ie ku pi.

¹³Man kinde ma ng’atu ma won kasinono doko leng’ ni kasinono pare, ebilund kwanu ire gire ceng’ abiro mi dwokrileng’ pare, man ebilwoko kendi pare; man ebijomo kume i pi ma mol, e ebibedo leng’.

¹⁴Man i ceng’ mir aborane ebigamu ire nyithindh akuru ario, kadi nyathi nyathuk ario, man ebibino i wang’ Yehova ba dhugola mi hema mi cokri, e ebimiogi ba jalam;

¹⁵e jalam bithierogi, acel ni lam mi dubo, man mucelo ni lam m’awang’a; e jalam bitimo adunya pire i wang’ Yehova ni kasinono pare.

¹⁶Man tek dya wok kum ng’atu moko ma nico, ebilund jomo kume ceke ku pi, man ebibedo m’ecido cil uthieno.

¹⁷Man ku ba kendi, man ku ba lau ceke, ma dya ni i wie, jubilwoko ku pi, man ebibedo m’ecido cil uthieno.

¹⁸Dhaku bende ma nico bivuto kude ku dya, gin ario gibijom ku pi, man gibibedo ma gicido cil uthieno.

¹⁹Man tek gin moko cwir kud i kum dhaku moko, man gin m’ucwir i kumene en e rimo, ebibedo i kwir pare ceng’ abiro: man ng’atu ma tek umulo kume bibedo m’ecido cil uthieno.

²⁰Man gin ceke m’evuto i wie i nindo mi kwir pare bibedo m’ecido: gin ceke bende m’ebedo i wie bibedo m’ecido.

²¹Man ng’atu ma nico ma tek umulo kavuto pare bilwoko kendi pare, man ebijom ku pi, man ebibedo m’ecido cil uthieno.

²²Man ng’atu ma nico ma tek umulo gin moko m’ebedo i wie ebilwoko kendi pare, man ebijom ku pi, man ebibedo m’ecido cil uthieno.

²³Man tek rimone dong’ wi kavuto, kadi wi gin moko m’ebedo i wie, kinde ma ng’atu ma nico mule, ebibedo m’ecido cil uthieno.

²⁴Man tek ng’atu moko ma nico vuto kude, man kwir pare bedo kum ng’atu ma nicone, ng’atu ma nicone bibedo m’ecido ceng’ abiro; man ku ba kavuto ma ng’atu ma nicone vuto i wie bibedo m’ecido.

²⁵Man tek rimo cwir kum dhaku ceng’ dupa ma en e i nindo mi kwir pare ngo, kadi tek etero nindo dupa yo ng’ei nindo mi kwir pare; nindo ceke mi gin m’ucwir mi cilo pare ebibedo calu i nindo mi kwir pare: ecido.

²⁶Ku ba kavuto ceke m’evuto i wie i nindo ceke mi gin pare m’ucwir bibedo ire calu kavuto mi kwir pare: man gin ceke m’ebedo i wie bibedo m’ecido, calu cilo mi kwir pare.

²⁷Man ng’atu ma tek umulo gin maeno bibedo m’ecido, man ebilwoko kendi pare, man ebijom ku pi, e ebibedo m’ecido cil uthieno.

²⁸Ento tek judwoke leng’ ni gin m’ucwir pare, ebilund kwanu wel ire gire ceng’ abiro, man yo ng’ei maeno ebibedo leng’.

²⁹Man i ceng’ mir aborane ebigamu ire nyithindh akuru ario, kadi nyithi nyathuk ario, man ebikelogi ba jalam, ba dhugola mi hema mi cokri.

³⁰Man jalam bithiero acel ni lam mi dubo, man mucelo ni lam m’awang’a; e jalam bitimo adunya pire i wang’ Yehova pi gin m’ucwir mi cilo pare.

³¹Wubikoyo nyithindho mir Israel kumeni ni cilo migi, kara ku githo i cilo migi, kinde ma gicido hema para ma ni i kindgi.

³²Maeni cik pa ng’atu ma won kasinono, man pa ng’atu ma dya wok i kume, ketho nia ecido ku maeno;

³³man pa dhaku m’ubedo lith ni kwir pare, man pa ng’atu ma nico, ma won kasinono, pa ng’atu ma nico, man pa ng’atu ma dhaku, man pa ng’atu ma nico m’uvuto ku ng’atu ma dhaku m’ucido.