Read Alur Lembe Mi Julawi 16 Bible Online

Lembe Mi Julawi 16 - Alur bible

Lembe Mi Julawi 16

¹E Yehova yero ni Musa, yo ng’ei tho mi wot Harun ario, kinde ma gicoro ceng’ni wang’ Yehova, e githo;

²e Yehova wacu ni Musa kumae, Yer ni Harun m’umeru, kara kud emond i nindo ceke i kamaleng’ yo i kusikabongu, i wang’ kabedomikisa ma ni wi sanduk; kara kud etho: kum abiwok i afuru wi kabedomikisane.

³Haran bimondo i kamaleng’ kumeni: ku nyathi thwon dhiang’ ni lam mi dubo, man nyog rombo ni lam m’awang’a.

⁴Ebironyo kanzu mi bongu ma nwang’ ma leng’, man ebibedo ku bombo ma nwang’ i kume, man ebibedo atwia ku futa ma nwang’, man ebikendo gali mi bongu ma nwang’: gin gi kendi ma leng’; man ebijomo kume ku pi, e ebironyogi.

⁵Man ebigamu nyogi diegi ario bang’ udul mi nyithindho mir Israel ni lam mi dubo, ku nyog rombo acel ni lam m’awang’a.

⁶Man Harun biwodho thwon dhiange ni lam mi dubo, ma en e pire gire, man ebitimo adunya pire gire, man pi ot pare.

⁷Man ebigamu diegi ario, e ebikethogi i wang’ Yehova i dhugola mi hema mi cokri.

⁸Man Harun bigoyo gagi wi diegi arione; gagi acel ni Yehova, man gagi mucelo ni diel mi kulwoka.

⁹Man Harun biwodho diel ma gagi podho i wie ni Yehova, e ebithiere ni lam mi dubo.

¹⁰Ento diel, ma gagi podho i wie ni diel mi kulwoka, jubikethe ma kwo i wang’ Yehova, kara utim adunya pi ng’atuca, kara juore ni diel mi kulwoka i langa.

¹¹Man Harun biwodho thwon dhiang’ ni lam mi dubo, ma en e pire gire, man ebitimo adunya pire gire, man pi ot pare, man ebinego thwon dhiang’ mi lam mi dubo ma en e pire gire.

¹²E ebigamu tabu pong’ ku cukmac ku wi pemblam i wang’ Yehova, man cinge pong’ kud udok ma ng’wice ng’ar ma mit ma jufodo thindho thindho, man ebikele yo i kusikabongu:

¹³man ebiketho udok ma ng’ wice ng’ame wi mac i wang’ Yehova, kara afuru mir udok ma ng’wice ng’ar uum kabedomikisa ma ni wi lembatuca, kara kud etho:

¹⁴man ebigamu kum rimb thwon dhiang’, man ebikire ku lwete wi kabedomikisa yo nyangu; man ebikiro rimone ku lwete wang’ abiro i wang’ kabedomikisa.

¹⁵Ebilund nego diel mi lam mi dubo, ma en e pi dhanu, man ebikelo rimone yor i kusikabongu, man ebitimo ku rimbe calu etimo ku rimb thwon dhiang’, man ebikire wi kabedomikisa, man i wang’ kabedomikisa:

¹⁶man ebitimo adunya pi kamaleng’, kum cilo mi nyithindho mir Israel, man kum gondri migi, en e dubo migi ceke: man ebitimo kumeca pi hema mi cokri, m’ubedo karacelo kugi i kind cilo migi.

¹⁷Man ng’atu moko mbe ma bibedo nuti i hema mi cokri kinde m’emondo kara etim adunya i kamaleng’, maram ewok ko, man maram etimo ko adunya pire gire, man pi juode, man pi cokri mir Israel ceke.

¹⁸Man ebiwok woko kum pemblam ma ni i wang’ Yehova, e ebitimo adunya pire, man ebigamu kum rimo mi thwon dhiange, man kum rimb diende, e ebikethe wi tung pemblam gbur.

¹⁹Man ebikiro kum rimone i wie ku lwete wang’ abiro, e ebidwoke leng’, man ebilonye ni cilo mi nyithindho mir Israel.

²⁰Man kinde m’edaru timo adunya pi kamaleng’, ku hema mi cokri, man pemblam ebiwodho diel ma kwo:

²¹man Harun biketho cinge ario i wi diel ma kwone, man ebituco i wie kier ceke mi nyithindho mir Israel, ku gondri migi ceke, en e dubo migi ceke; e ebikethogi i die wi diende, man ebiore cen i langa i cing’ ng’atu ma juketho:

²²e diende biyeyo kier migi ceke i kume i ng’om ma lic: e ebiweko diende cidho i langa.

²³E Harun bimondo i hema mi cokri, man ebiwodho kendi ma nwang’ m’eronyo kinde m’emondo i kamaleng’, man ebiwekogi keca:

²⁴man ebijomo kume ku pi i kamaleng’, e ebironyo kendi pare, man ebiwok woko, man ebithiero lam m’awang’a pare ku lam m’awang’a mi dhanu, man ebitimo adunya pire gire man pi dhanu.

²⁵Man ebiwang’u mio mi lam mi dubo wi pemblam.

²⁶Man ng’atu m’uweko diel ucidho ni diel mi kulwoka bilwoko kendi pare, man ebijomo kume ku pi, e yo ku ng’eye ebimondo i kagonjo.

²⁷Man thwon dhiang’ mi lam mi dubo, ku diel mi lam mi dubo, ma jukelo rimone i ie kara utim adunya i kamaleng’, jubitero woko yo ng’ei kagonjo; e gibiwang’u laugi, ku ringgi, ku weine de i mac.

²⁸E ng’atu m’uwang’ugi bilwoko kendi pare, man ebijomo kume ku pi, e yo ku ng’eye ebimondo i kagonjo.

²⁹Man ebibedo ni cik mi nja iwu: i dwi mir abirone, i ceng’ mir apaje mi dwije, wubidieng’o cwinywu, e wubitimo tic moko ngo, dhanu m’anyola, kadi umondo m’ubedo i kindwu:

³⁰kum jubitimo adunya piwu i ceng’ maeni, kara udwokwu leng’; wubibedo leng’ ni dubo mu ceke i wang’ Yehova.

³¹En e sabatu mi yom ma cu iwu man wubidieng’o cwinywu; en e cik mi nja.

³²E jalam, ma jubiwiro ma jubithiero de ya ubed jalam i ka won, bitimo adunyane, man ebironyo kendi ma nwang’, en e kendi ma leng’:

³³e ebitimo adunya pi kamaleng’ ma leng’; man ebitimo adunya pi hema mi cokri man pi pemblam; man ebitimo adunya pi julam man pi dhanu ceke mi cokri.

³⁴Man maeni bibedo ni cik mi nja iwu, kara utim adunya pi nyithindho mir Israel kum dubo migi ceke wang’ acel i rundi. E etimo calu Yehova ng’olo ni Musa.