Read Alur Lembe Mi Julawi 17 Bible Online

Lembe Mi Julawi 17 - Alur bible

Lembe Mi Julawi 17

¹E Yehova yero ni Musa, ewacu kumae,

²Yer ni Harun, man ni wote, man ni nyithindho mir Israel ceke, man iwac igi kumae: Maeni gin ma Yehova ng’olo, ewacu kumae,

³Ng’atu ma tek nuti i kind ot mir Israel, m’unego koni dhiang’ kadi nyathi rombo, kadi diel, i kagonjo, kadi m’unege ng’ei kagonjo,

⁴man ekele ba dhugola mi hema mi cokri ngo, kara ethiere calu girathiera ni Yehova i wang’ hema pa Yehova: jubikwanu rimo ni ng’atuca; ecwiro rimo; e jubikabu ng’atuca woko ku kind juthugi:

⁵kara nyithindho mir Israel ukel lam migi, ma gilamu i thim, en e kara gikelgi ba Yehova, ba dhugola mi hema mi cokri, ba jalam, man gilamgi ni lam mi girathiera mi kwiocwiny ni Yehova.

⁶E jalam bikiro rimone wi pemblam pa Yehova i dhugola mi hema mi cokri, man ebiwang’u mione ni ng’wic mido ma ng’ar ni Yehova.

⁷E gibilamu lam migi kendo ngo ni nyogi diegi, ma gicidho nitimo kudo tarwang’. Maeni bibedo ni cik mi nja igi cil kum dhanum’utuk migi ceke.

⁸E ibiwacu igi kumae, Ng’atu ma nuti mi ot mir Israel, kadi mir umondo m’ubedo i kindgi, m’uthiero lam m’awang’a kadi lam,

⁹man ekele ba dhugola mi hema mi cokri ngo, kara elame ni Yehova; jubikabu ng’atu maeno woko ku kind juthugi.

¹⁰Man ng’atu ma tek nuti m’i ot mir Israel, kadi mir umondo m’ubedo i kindgi, m’ucamu rimo moko, abimino wang’a kum ng’eyong’ec maeno m’ucamu rimo, man abikabe woko ku kind juthugi.

¹¹Kum kwo mi ring’kum ni i rimo; man amie iwu wi pemblam kara utim adunya pi ng’eyong’ec mu: kum en e rimo e ma timo adunya kum kwo.

¹²Ka kumeno awacu ni nyithindho mir Israel kumae, Ng’eyong’ec moko m’i kindwu kud ucam rimo kadok umondo moko de m’ubedo i kindwu kud ucam rimo.

¹³Man ng’atu ma tek nuti i kind nyithindho mir Israel, kadi mir umondo m’ubedo i kindgi, m’ugamu lim moko kadi winyo i dwar ma jucopo camu: ebiewiro rimone woko, man ebiume kud utur.

¹⁴Kum calu kwo mi ring’kum ceke nuti, e rimone en e acel ku kwone: ka kumeno awacu ni nyithindho mir Israel kumae, Kud wucam rimo mi ring’kum moko ki; kum kwo mi ring’kum ceke en e rimone: ng’atu ma tek ucame jubikabe woko.

¹⁵Man ku ba ng’eyong’ec ceke m’ucamu gin m’utho kende, kadi gin ma yedi yeco, tek ebedo ng’atu m’anyola kadi umondo, ebilwoko kendi pare, man ebijom gire i pi, e ebibedo m’ecido cil uthieno: e ebilund bedo leng’.

¹⁶Ento tek elwokogi de ngo, kadi ejomo kume de ngo, ebilund yeyo kier pare.