Read Alur Lembe Mi Julawi 19 Bible Online

Lembe Mi Julawi 19 - Alur bible

Lembe Mi Julawi 19

¹E Yehova yero ni Musa, ewacu kumae,

²Yer ni udul mi nyithindho mir Israel ceke, man iwac igi kumae, Wubed leng’; kum an a Yehova ma Mungu mu a leng’.

³Kubeng’wu kubeng’wu ng’atuman ulwor min mire, ku won mire; man wugwok ceng’ sabatu para: an a Yehova Mungu mu.

⁴Kud wulokru ba mungu m’araga, kadi kud wutim mungu m’atwaga iwu giwu: an a Yehova Mungu mu.

⁵Man kinde ma wuthiero lam mi girathiera mi kwiocwiny ni Yehova, wuthiere kara jujolwu.

⁶Jubicame i ceng’ ma wuthiere i ie, man urwone: man tek donge dong’ cil i ceng’ mir adege jubiwang’e ku mac.

⁷Man tek jucame nyanok i ceng’ mir adege, en e ginmajudagu; ebiyire ngo:

⁸ento ku ba dhanu m’ucame biyeyo kier pare, kum ecido gin ma leng’ pa Yehova: e jubikabu ng’eyong’ec maeca woko ku ba juthugi.

⁹Man kinde ma wukayu mwoka mi ng’om mu, kud ikai gund podho peri kur kur, kadok kund mwoka peri de kud ibeki.

¹⁰Man kud ibek kund podho mir ulok peri, kadok nying’ podho mir ulok peri m’upodho de kud icoki; wekgi ni jacan man ni umondo: an a Yehova Mungu mu.

¹¹Kud wukwal kwo; kadok kud abombi de kud wutim, kadi kud wuwondru.

¹²Man kud wukwong’ mi ndra ku nyinga, m’icid ko nying’ Mungu peri: an a Yehova.

¹³Kud isend wedu, kadi kwalu piny pare: sukulia pa jatic mi sukulia kud ubed i beng’i diewor soro cil kugweno.

¹⁴Kud ilam udhing’, kadi kud iketh gin ma redhojo i wang’ abinga: ento ilwor Mungu peri; an a Yehova.

¹⁵Kud wutim gondri i lembapoka: kud inen wang’ jacan ber, kadi kud iyung wang’ ng’atu ma jatego; ento ipok lembe pa wedu pwe.

¹⁶Kud iwoth kun ku kun calu janying’ i kind juthu: kadi kud icung kum rimo pa wedu: an a Yehova.

¹⁷Kud idag umeru ku yo i adundeni: juk wedu andha, man kud iyei dubo ni kume.

¹⁸Kud icul kwor, kadi kud ibed kud akece kum nyithindho mi juthu; ento imar wedu calu in giri: an a Yehova.

¹⁹Wugwok cik para. Kud iyi lim peri nyol ku kite ma tung’ tung’: kud icoi podho peri ku kwond kodhi ario: kadok kendi ma kite tung’ tung’ de kud ikendi.

²⁰Man ng’atu ma tek uvuto ku nyaku ku tarwang’, ma en e bong’, ma nico benyome, ma fodi juware ngo, kadi jugonye de ngo; jubisendogi; jubinegogi anega re ngo, kum nyakune bedo agonya ngo.

²¹Man ebikelo lam mi kadhukuwicik pare ni Yehova, ba dhugola mi hema mi cokri, en e nyog rombo ni lam mi kadhukuwicik.

²²E jalam bitimo adunya pire ku nyog rombo mi kadhukuwicik i wang’ Yehova kum dubo pare m’edubo: e dubo m’edubo biwekre ire woko.

²³E kinde ma wumondo i ng’om, man wupidho kwond yen ceke ni cemo, wulund wukwan nyinge calu yaango migi: rundi adek gibibedo calu ma yaa mbe i kumgi iwu: jubicame ngo.

²⁴Ento i rundi mir ang’wende nyinge ceke bibedo leng’, kum mio pak ni Yehova.

²⁵Man i rundi mir abije wubicamu nyinge, kara eceg nyaine iwu: an a Yehova Mungu mu.

²⁶Kud wucam gin moko ku rimo: kadok wodhotho de kud wuwodhi, kadi ajoga de kud wutim.

²⁷Kud wuliel semba yukwiwu, kadok theng tiki de kud inyothi.

²⁸Kud wuthum kumwu pi ju m’utho, kadi kud wuthei ayi i kumwu: an a Yehova.

²⁹Kud icid nyeri, m’idwoke ko ni won tarwang’: ng’om umaru mondo i tarwang’, e ng’om umaru pong’ ku dubo.

³⁰Wugwok sabatu para, man wuyung kamaleng’ para: an a Yehova.

³¹Kud wulokru ba ju ma weg tipo, kadi ba jucwitho; kud wuyenygi, kara wucidru kugi: an a Yehova Mungu mu.

³²Ai malu i wang’wie ma ju lwar man iyung wang’ ng’atu m’uti, man ilwor Mungu peri: an a Yehova.

³³Man tek umondo bedo karacelo kudi i ng’om mu, kud wutime rac.

³⁴Umondo m’ubedo karacelo kudu bibedo iwu calu ng’atu m’anyola i kindwu, man ibimare calu in giri; kum yang’ wubedo ni umondo i ng’om Misiri: an a Yehova Mungu mu.

³⁵Kud wutim gondri moko i lembapoka, i jampor mi kaborpiny, man mi wel pek, kadi mi kaditpiny.

³⁶Wubed ku jampor ma pwe, ku jampek de ma pwe, man katoko ma pwe, ku tabu ma pwe: an a Yehova Mungu mu, m’uwodhowu kud i ng’om Misiri.

³⁷Man wuwor cik para ceke, ku lembapoka para ceke kara wutimgi: an a Yehova.