Read Alur Lembe Mi Julawi 2 Bible Online

Lembe Mi Julawi 2 - Alur bible

Lembe Mi Julawi 2

¹Man kinde ma ng’atu moko thiero girathiera mi lam mi mogo ni Yehova, girathiera pare bibedo mi mogo ma yom; man ebikonjo mo i wie, man ebiketho udok ma ng’wice ng’ar i wie;

²man ebitere ba wot Harun ma julam; e ebigamu mogo ma yomne pong’ cing’, man mi moje, karacelo kud udok ma ng’wice ng’ame ceke. Man jalam biwang’e calu lem poine wi pemblam, en e lam ma jutimo ku mac, mi ng’wic mido ma ng’ar ni Yehova:

³man dong lam mi mogo m’udong’ bibedo pa Harun ku wote: en e gin ma leng’ m’usagu i, kind lam pa Yehova ma jutimo ku mac.

⁴Man kinde m’ithiero girathiera mi lam mi mogo ma jutedo i kendo, ebibedo kwen m’apada ma thobi mbe i ie mi mogo ma yom m’ujebre ku mo, kadi kwen m’apada ma thobi mbe i ie ma juwiro ku mo.

⁵Man tek girathiera peri bedo lam mi mogo mir atangla, ebibedo mi mogo ma yom ma thobi mbe i ie, m’ujebre ku mo.

⁶Ibipoko ie tung’ tung’, man ibikonjo mo i wie: en e lam mi mogo.

⁷Man tek girathiera peri en e lam mi mogo mi jambeelo, jubitime ku mogo ma yom ku mo.

⁸Man ibikelo lam mi mogo ma jutimo ku gin maeni ba Yehova: e jubithiere ba jalam, man ebikele ba pemblam.

⁹Man jalam bigamu jambpoine kud i lam mi mogo, man ebiwang’e wi pemblam, en e lam ma jutimo ku mac, mi ng’wic mido ma ng’ar ni Yehova.

¹⁰Man dong’ lam m’udong’ bibedo pa Harun ku wote: en e gin ma leng’ m’usagu i kind lam pa Yehova ma jutimo ku mac.

¹¹Ku juketh thobi i lam mi mogo moko ma jubithiero ni Yehova; kum wubiwang’u thobi moko ngo, kadi kic moko, calu lam ma jutimo ku mac ni Yehova.

¹²Calu girathiera mi mwoka wuthiergi ni Yehova: ento ku gitund wi pemblam ni ng’wic mido ma ng’ar.

¹³Man ku ba girathiera mi lam mi mogo peri wuketh kadu i ie m’urome; kadi kud iyi kadu mi lembariba pa Mungu peri rem mi lam mi mogo peri: thier kadu karacelo ku lam peri ceke.

¹⁴Man tek ithiero lam mi mogo mi mwoka ni Yehova, thier ni lam mi mogo kind mwoka peri cam ma widhi ma jurewo ku mac, cam m’afoda mi withe ma nyen.

¹⁵Man iketh mo i wie, iketh udok ma ng’wice ng’ar de i wie: en e lam mi mogo.

¹⁶Man jalam biwang’u jambpoine, ng’et cam m’afodane, man ng’et moje, kud udok ma ng’wice ng’ame ceke: en e lam ma jutimo ku mac ni Yehova.