Read Alur Lembe Mi Julawi 20 Bible Online

Lembe Mi Julawi 20 - Alur bible

Lembe Mi Julawi 20

¹Man Yehova yero ni Musa, ewacu kumae,

²Man kendo, iwac ni nyithindho mir Israel kumae, Ng’atu ma tek nuti ma mi nyithindho mir Israel, kadi mir umondo m’ubedo i kind Israel, m’umio nyikwaye ni Molek; jubiketho etho andha: dhanu m’i ng’om bicanye ku kidi.

³An bende abiketho wang’a kum ng’atuca, man abikabe woko ku kind juthugi; kum emio kind nyikwaye ni Molek, kara ecid kamaleng’ para, man kara ecid nyinga ma leng’.

⁴Man tek dhanu m’i ng’om gipanu wang’gi ni ng’atuca, kinde m’emio kind nyikwaye ni Molek, man giketho etho ngo;

⁵abilund ketho wang’a kum ng’atuca, man kum juode, man abikabe woko, ku dhanu ceke m’utimo tarwang’ i toke, kara utim tarwang’ ku Molek, i kind juthugi.

⁶Man ng’eyong’ec m’ulokre ba ju ma weg tipo, man ba jucwitho, kara utim tarwang’ kugi, abiketho wang’a kum ng’ej’ong’ec maeca, man abikabe woko ku kind juthugi.

⁷Ka kumeno wudwokru giwu leng’, man wubed leng’; kum an a Yehova Mungu mu.

⁸Man wubigwoko cik para, man wubitimogi: an a Yehova m’udwokowu leng’.

⁹Kum ku ba dhanu ceke m’ulamu won kadi min jubiketho etho andha: elamu won kadi min; rimo pare bibedo i wie.

¹⁰Man ng’atu m’udubre ku ci ng’atu mange, en e ng’atu m’udubre ku ci wadi, ng’atu ma won dubriswane ku dhaku ma won dubriswane de jubinego andha.

¹¹Man ng’atu m’uvuto ku ci won eyabu muneru pa won: jubinego gin ario de andha; rimbgi bibedo i kumgi gigi.

¹²Man tek ng’atu moko vuto ku ci wode, jubinego gin ario de andha: gitimo gin m’ucido; rimbgi bibedo i wigi.

¹³Man tek ng’atu ma nico vuto ku ng’atu ma nico wadi, calu vuto ku mon, gin ario de gitimo ginmajudagu: jubinegogi andha; rimbgi bibedo i wigi.

¹⁴Man tek ng’atu moko gamu dhaku ku min dhakune de, en e dubo: jubiwang’ugi ku mac, en ku gin; kara dubo moko kud ubed i kindwu.

¹⁵Man tek dhanu vuto ku lim, jubinege andha: man wuneg limne de.

¹⁶Man tek dhaku eoro ba lim moko, man evuto piny i bang’e, wuneg dhakune, ku limne de: wubinegogi andha; rimbgi bibedo i wigi.

¹⁷Man tek ng’atu moko gamu nyamin, en e nya won, kadi nya min, man eneno muneru pare, en de eneno muneru pare; en e gin mi lewic; jubithumogi woko kud i wang’ nyithindho mi juthugi; eyabu muneru pa nyamin; ebiyeyo kier pare.

¹⁸Man tek ng’atu moko vuto ku dhaku m’ubedo ku kwir pare, man eyabu muneru pare; eketho kulo pare doko muneru, man eyabu kulo mi rimo pare; jubikabu gin ario de woko ku kind juthugi.

¹⁹Man kud iyab muneru pa nyamin meru, kadi pa nyamin wuru; kum eketho wat ma ceng’ni doko muneru: gibiyeyo kier migi.

²⁰Man tek ng’atu moko vuto ku dhaku pa neru mire, eyabu muneru pa neru mire: gibiyeyo dubo migi; gibitho ma nyathin umbe kugi.

²¹Man tek ng’atu moko gamu dhaku p’umin, en e cilo: eyabu muneru p’umin; gibibedo umbe nyithindho.

²²Ka kumeno wugwok cik para ceke, ku lembapoka para ceke, man wutimgi; kara ng’om, m’akelowu kara wubed i ie, kud ung’ogwu woko.

²³Man kud wuwoth ku kura mi thek, m’ariemo woko kud i weng’wu: kum gitimo gin maeni ceke, e kumeno adagugi.

²⁴Ento awacu iwu kumae, Wubigamu ng’om migi ni aba, man abimie iwu kara wumwonye, en e ng’om ma molo cak ku kic: an a Yehova Mungu mu, m’ukoyowu ni kodhidhanu.

²⁵Ka kumeno wubing’io kind lim ma leng’ ku m’ucido, man kind lim ma ju bombe m’ucido ku ma leng’: man kud wudwok ng’eyong’ec mu ni ginmajudagu ni kum lim, kadi ni kum winyo, kadi ni kum gin moko ma ng’om upong’ ko, m’akoyo kud i beng’wu calu m’ecido.

²⁶Man wubibedo leng’ ira: kum an, an a Yehova, an a leng’ man akoyowu ku kind kodhidhanu, kara wubed para.

²⁷Ng’atu ma nico bende kadi ng’atu ma dhaku ma won tipo, kadi ma en e jacwitho, jubinege andha: gibicanyugi ku kidi; rimo migi bibedo i wigi.