Read Alur Lembe Mi Julawi 21 Bible Online

Lembe Mi Julawi 21 - Alur bible

Lembe Mi Julawi 21

¹Man Yehova yero ni Musa kumae, Yer ni julam, ma wot Harun, man iwac igi kumae, Ng’atu moko kud ucidre gire pi ju m’utho i kind juthugi;

²ndhu pi wat pare, ma ni ceng’ni kude, pi min, man pi won, man pi wode, man pi nyare, man pir umin,

³man pi nyamin ma sumba, ma ni ceng’ni en, ma fodi ubedo ku cware ngo; ecopo cidre gire pire.

⁴Ng’atu ma jadit i kind juthugi, kud ecidre gire, ma nia ecidre gire.

⁵Ku gigwar wigi, kadok semba tikgi de ku gigwar, kadi kumgi de ku githum.

⁶Gibed leng’ ni Mungu migi, man ku gicid nying’ Mungu migi; kum lam pa Yehova ma jutimo ku mac, en e kwen mi Mungu migi, githiero: ka kumeno gibed leng’.

⁷Ku gigam dhaku ma won tarwang’, kadi m’ucido; kadok dhaku ma jurieme ku ba cware de ku gigam: kum ng’atu ma nicone e leng’ ni Mungu pare.

⁸Ka kumeno wudwoke leng’; kum ethiero kwen pa Mungu peri: ebibedo leng’ iri; kum an a Yehova, m’udwoki leng’, an a leng’.

⁹Man nya jalam moko, tek ecidre gire kutimo tarwang’, ecido won: jubiwang’e ku mac.

¹⁰Man ng’atu ma en e jalam ma dit i kind utumeggi, ma jukonjo mo m’awira i wie, man ma juthiere kara juronye ku kendi, ebigonyo yukwie ngo, kadi ebiyeco kendi pare de ngo;

¹¹kadok mondo bang’ avu moko de kud emondi, kadi kud ecidre gire pi won, kadi pi min;

¹²kadi kud ewok woko kud i kamaleng’, kadi kud ecid kamaleng’ pa Mungu pare; kum jambthier mi mo m’awira pa Mungu pare ni i wie: an a Yehova.

¹³Man ebigamu dhaku ma ng’won.

¹⁴Dhaku ma cware tho, kadi ma juriemo, kadi dhaku m’ucido, kadi won tarwang’, maeni kud egam: ento nyaku ma ng’won mi juthugi ebigamu ni dhaku.

¹⁵Man kud ecid nyikwaye i kind juthugi: kum an a Yehova m’udwoke leng’.

¹⁶Man Yehova yero ni Musa, ewacu kumae,

¹⁷Yer ni Harun, wac kumae, Ng’atu ma tek nuti mi kodhi peri cil kum dhanum’utuk migi m’ubedo ku mulima, kud ecor ceng’ni kara ethier kwen pa Mungu pare.

¹⁸Kum ng’atu ma tek nuti m’ubedo ku mulima, kud ecor ceng’ni: ng’atu ma wang’e tho, kadi jarabala mi tielo, kadi ma ume bam, kadi gin moko m’umedre,

¹⁹kadi ng’atu ma tiende tux, kadi ma cinge tur,

²⁰kadi ng’atu m’ugungo, kadi ng’atu m’utwil, kadi m’ubedo ku mulima i wang’e, kadi m’ubedo ku gwenyo, kadi ma jaranyac, kadi ma mande loi;

²¹ng’atu moko mbe mi kodhi pa Harun ma jalam, m’ubedo ku mulima, ma bibino ceng’ni kara etbier lam pa Yehova ma jutimo ku mac: ebedo ku mulima; kud ecor ceng’ni kara ethier kwen pa Mungu pare.

²²Ebicamu kwen pa Mungu pare, ma leng’ m’usagu, man mi ma leng’:

²³ento kud emond yo i kusikabongu, kadi kud ebin ceng’ni ba pemblam, kum ebedo ku mulima; kara kud ecid kamaleng’ para: kum an a Yehova m’udwokogi leng’.

²⁴Kum kumeno Musa yero ni Harun, man ni wote, man ni nyithindho mir Israel ceke.