Read Alur Lembe Mi Julawi 22 Bible Online

Lembe Mi Julawi 22 - Alur bible

Lembe Mi Julawi 22

¹Man Yehova yero ni Musa, ewacu kumae,

²Yer ni Harun man ni wote, nia gikoiri gigi ni gin ma leng’ mi nyithindho mir Israel, ma gidwoko leng’ ira, man kara ku gicid nyinga ma leng’: an a Yehova.

³Wac igi kumae, Ng’atu ma tek en e mi nyikweyu ceke cil kum dhanum’utuk mu m’ucoro ceng’ni ba gin ma leng’, ma nyithindho mir Israel udwoko leng’ ni Yehova, m’ebedo ku cilo pare i kume, jubikabu ng’eyong’ec maeno woko kud i wang’a: an a Yehova.

⁴Ng’atu ma tek en e kodhi Harun m’e won joi, kadi ma won kasinono; kud ecam kum gin ma leng’, cil m’edoko ko leng’. Man ng’atu m’umulo gin moko m’ucido kum avu, kadi ng’atu ma dya wok i kume;

⁵kadi ng’atu ma tek umulo gin ma lak, m’ecopo cidre ni kume, kadi ng’atu ma nico m’ecopo cidre ni kume, cilo moko m’ebedo ko;

⁶ng’eyong’ec m’umulo wadi maeni bicido cil uthieno, man ebicamu kum gin ma leng’ ungo, tek k’ejomo kume ku pi ngo.

⁷Kinde ma ceng’ upodho, ebibedo leng’; man yo ku ng’eye ebicamu kum gin ma leng’, kum en e kwen pare.

⁸Gin m’utho kende, kadi ma yedi yeco, kud ecam, ketho ecidre gire kudo: an a Yehova.

⁹Ka kumeno gibigwoko kur para, gimaru yeyo dubo pire, man githo i ie, tek gicide: an a Yehova m’udwokogi leng’.

¹⁰Welo moko kud ucam kum gin ma leng’: umondo pa jalam, kadi jatic mi sukulia, kud ucam kum gin ma leng’.

¹¹Ento tek jalam ung’iewo ng’eyong’ec moko, en e gin m’eng’iewo ku sente pare, ebicamu kume moko; man ju ma junyolo i ot pare, gibicamu kum kwen pare.

¹²Man tek nya jalam ugomo umondo, nyakune kud ucam kum lam m’ating’a mi gin ma leng’.

¹³Ento tek nya jalam ubedo ng’atu ma cware tho, kadi ng’atu ma jurieme, man nyathin pare mbe, man judwoke ba ot pa won, calu i aradu pare, ebicamu kum kwen pa won: ento umondo moko mbe ma bicamu kume.

¹⁴Man tek ng’atu moko camu kum gin ma leng’ aka ngo, ebilund ketho ng’ete mir abije i kume, man ebimio gin ma leng’ ba jalam.

¹⁵Man gibicido gin ma leng’ mi nyithindho mir Israel ungo, ma githiero ni Yehova,

¹⁶e giyei kier m’ukelo dubo kumeni, kinde ma gicamu gin ma leng’ migi: kum an a Yehova m’udwokogi leng’.

¹⁷E Yehova yero ni Musa, ewacu kumae,

¹⁸Yer ni Harun, man ni wote, man ni nyithindho mir Israel, man iwac igi kumae, Ng’atu ma tek nuti mi ot mir Israel ceke, kadi mir umondo i Israel, m’uthiero girathiera pare, tek ebedo lembang’ola migi moko, kadi girathiera migi moko mi berocwiny, ma githiero ni Yehova ni lam m’awang’a;

¹⁹kara wuyiru, wubithiero lim ma coge ma mulima mbe i kume, kind thwoni dhiang’, kadi kind rombe, kadi kind diegi.

²⁰Ento gin ma tek mulima ni i kume, kud wuthier: kum ebiyire ngo iwu.

²¹Man ng’atu ma tek uthiero lam mi girathiera mi kwiocwiny ni Yehova kara etim lembang’ola ma cu, kadi ni girathiera ma ku berocwiny, kind dhiang’ kadi kind rombe, ebibedo ndhu cu kara eyire; mulima bibedo mbe i ie.

²²Abinga, kadi jarabala m’uwil, kadi jarabala ma wath kume ng’ol kadi m’ubedo ku rem, kadi gwenyo, kadi nyac, kud wuthier maeni ni Yehova, kadi kud wutim kugi lam ma ku mac wi pemblam ni Yehova.

²³Kadok thwon dhiang’ kadi nyathi rombo m’ubedo ku girameda kadi ma wath kume rem, maeno icopo thiero ni girathiera ma ku berocwiny; ento mi lembang’ola ebiyire ngo.

²⁴Lim ma mande lith, kadi ma mande loi, kadi ma jung’enyo mande, kadi ma juthumo mande de, kud wuthier ni Yehova; kadok alama de kud wulamgi i ng’om mu.

²⁵Kadok cemo pa Mungu mu de kud wuthier ku kind lim maeni m’uai i cing umondo; kum nyoth migi ni i igi, mulima ni i igi; gibiyiri ngo iwu.

²⁶E Yehova yero ni Musa, ewacu kumae,

²⁷Kinde ma juwodho thwon dhiang’, kadi rombo, kadi diel, ebilund bedo the min ceng’ abiro; man ugambre i ceng’ mir aborane ku ma cenne de ebiyire ni girathiera mi lam ma jutimo ku mac ni Yehova.

²⁸Man kadok en e min dhiang’ kadi min rombo kud wunege ku nyathine i ceng’ acel.

²⁹Man kinde ma wulamu lam mi foyofoc ni Yehova, wulame kara wuyiru.

³⁰Jubicame cing’ nino; kud wuwek donge cil kugweno: an a Yehova.

³¹Ka kumeno wugwok lembang’ola para, man wutimgi: an a Yehova.

³²Man kud wucid nyinga ma leng’; ento abibedo leng’ i kind nyithindho mir Israel: an a Yehova m’udwokowu leng’,

³³m’uwodhowu woko kud i ng’om Misiri, kara abed Mungu mu: an a Yehova.