Read Alur Lembe Mi Julawi 23 Bible Online

Lembe Mi Julawi 23 - Alur bible

Lembe Mi Julawi 23

¹Man Yehova yero ni Musa, ewacu kumae,

²Yer ni nyithindho mir Israel, man iwac igi kumae, Agba pa Yehova ma juketho, ma wubilwong’o ni cokri ma leng’, maeni gin agba para ma juketho.

³Jubitimo tic ceng’ abusiel: ento ceng’ mir abirone en e sabatu mi yom ma cu, en e cokri ma leng’; kud wutim tic moko ki: en e sabatu ni Yehova i kabedo mu ceke.

⁴Maeni agba pa Yehova ma juketho, en e cokri ma leng’, ma wubilwong’o i nindo migi ma juketho.

⁵I dwi ma kwong’ane, i ceng’ apar wi ang’wende mi dwije uthieno, en e kadhukuwijo pa Yehova.

⁶Man i ceng’ apar wi abije mi dwije en e agba mi kwen ma thobi mbe i ie ni Yehova: wubicamu kwen ma thobi mbe i ie ceng’ abiro.

⁷I ceng’ ma kwong’ane wubibedo ku cokri ma leng’: wubitimo tic moko ngo ma jumuli kudo.

⁸Ento wubithiero lam ma jutimo ku mac ni Yehova ceng’ abiro: i ceng’ mir abirone en e cokri ma leng’; wubitimo tic moko ma jumuli kudo ngo.

⁹E Yehova yero ni Musa, ewacu kumae,

¹⁰Yer ni nyithindho mir Israel, man iwac igi kumae, Kinde ma wumondo i ng’om m’amio iwu, man wukai mwokane, wulund wukel landu mwoka mu ba jalam:

¹¹man ebiwiro kumna i wang’ Yehova, kara eyire iwu: urwone yo ng’ei sabatu jalam biwire.

¹²Man i ceng’ ma wuwiro kumnane, wubithiero nyathi nyog rombo ma mulima mbe i kume ma rundine acel ni lam m’awang’a ni Yehova.

¹³Man lam mi mogone bibedo ng’et mogo ma yom ma jujebo ku mo mir apaje ario ma i katoko, lam ma jutimo ku mac ni Yehova ni ng’wic mido ma ng’ar; man lam m’amadhane bibedo mi pigulok, ng’et tabu mir ang’wende.

¹⁴Man kud wucam kadok kwen, kadi cam m’acela, kadi withe ma nyen, cil ma ceng’ maeni bitundo ko, cil ma wukel ko girathiera pa Mungu mu: en e cik mi nja cil kum dhanum’utuk mu i kabedo mu ceke.

¹⁵Man wukwan iwu ugambre urwone yo ng’ei sabatu ugambre i ceng’ ma wukelo ie kumna mi girathiera m’awira; sabatu abiro bibedo nuti kubang’e:

¹⁶en e i ceng’ mir arionde yo ng’ei sabatu mir abirone wukwan ceng’ pier abic; man wuthier lam mi mogo ma nyen ni Yehova.

¹⁷Wukel kwen m’ang’ina ario m’awira mi ng’ete mir apaje ario ma i katoko ku i kabedo mu: gibibedo mi mogo ma yom, jubitedogi ku thobi, ni nying’ ma kwong’a ni Yehova.

¹⁸Man wubithiero nyithi rombe abiro ma mulima mbe i kumgi ma rundigi acel acel karacelo ku kwen de, man thwon dhiang’ acel m’aradu, ku nyogi rombe ario: gibibedo ni lam ra’awang’a ni Yehova, ku lam mi mogone, man lam m’amadhane, en e lam ma jutimo ku mac, mi ng’wic mido ma ng’ar ni Yehova.

¹⁹Man wubithiero nyog diel acel ni lam mi dubo, man nyithi nyogi rombe ario ma rundigi acel acel ni lam mi girathiera mi kwiocwiny.

²⁰Man jalam biwirogi karacelo ku kwen mi nying’ ma kwong’a ni lam m’awira i wang’ Yehova, ku nyithi rombe ario: gibibedo leng’ ni Yehova pi julam.

²¹Man wubilwong’o i ceng’ maeca nica; cokri ma leng’ bibedo nuti iwu; kud wutim tic moko ma jumuli kudo: en e cik mi nja i kabedo mu ceke cil kum dhanum’utuk mu.

²²Man kinde ma wukayu mwoka mi ng’om mu, kud ikai gund podho peri ceke, kadok kund mwoka de kud icoki: wekgi ni jacan, man ni umondo: an a Yehova Mungu mu.

²³Man Yehova yero ni Musa, ewacu kumae,

²⁴Yer ni nyithindho mir Israel, wac kumae, I dwi mir abirone, i ceng’ ma kwong’ane mi dwije, bibedo yom ma cu iwu, en e lempoi mi kudho agwara, en e cokri ma leng’.

²⁵Kud wutim tic moko ma jumuli kudo; man wuthier lam ma jutimo ku mac ni Yehova.

²⁶E Yehova yero ni Musa, ewacu kumae,

²⁷Ento i ceng’ mir apaje mi dwi maeni mir abirone en e ceng’ mir adunya: ebibedo ni cokri ma leng’ iwu, man wubidieng’o cwinywu; e wubithiero lam ma jutimo ku mac ni Yehova.

²⁸Man wubitimo tic moko ki ngo i ceng’ maeca; kum en e ceng’ mir adunya, kara utim adunya piwu i wang’ Yehova Mungu mu.

²⁹Kum ng’atu ma tek nuti ma kudieng’o cwinye ngo i ceng’ maeca; jubikabe woko ku ba juthugi.

³⁰Man ng’atu ma tek nuti m’utimo tic moko i ceng’ maeca, abinyotho ng’eyong’ec maeca ku kind juthugi.

³¹Kud wutim tic moko: en e cik mi nja cil kum dhanum’utuk mu i kabedo mu ceke.

³²Ebibedo iwu ni sabatu mi yom ma cu, man wubidieng’o cwinywu: i ceng’ mir abung’wende mi dwije uthieno, ugambre uthieno cil kum uthieno, wubikwiro sabatu mu.

³³E Yehova yero ni Musa, ewacu kumae,

³⁴Yer ni nyithindho mir Israel, wac kumae, I ceng’ apar wi abije mi dwi maeni mir abirone en e agba mi otbak mi ceng’ abiro ni Yehova.

³⁵Ceng’ ma kwong’ane bibedo cokri ma leng’; kud wutim tic moko ma jumuli kudo.

³⁶Wubithiero lam ma jutimo ku mac ni Yehova ceng’ abiro: ceng’ mir aborane bibedo cokri ma leng’ iwu; man wubithiero lam ma jutimo ku mac ni Yehova: en e cokri ma cu; kud wutim tic moko ma jumuli kudo.

³⁷Maeni agba ma juketho pa Yehova, m’ebilwong’o ya ubed ni cokri ma leng’, kara juthier lam ma jutimo ku mac ni Yehova, lam m’awang’a, man lam mi mogo, man lam, ku lam m’amadha, kubang’e kubang’e i cenge ma dhe;

³⁸umed sabatu pa Yehova, man umed giramia mu, man umed lembang’ola mu ceke, man umed girathiera mu ceke ma ku berocwiny, ma wumio ni Yehova.

³⁹Ento i ceng’ mir apar wi abije i dwi mir abirone, kinde ma wucoko nying’ ng’om, wubikwiro agba pa Yehova ceng’ abiro: ceng’ ma kwong’ane bibedo yom ma cu, man ceng’ mir aborane bibedo yom ma cu.

⁴⁰Man wubigamu iwu nying yen ma ber i ceng’ ma kwong’ane, ku jang thith, man jang yen ma dit, ku mbegu m’i kulo; e anyong’a binegowu i wang’ Yehova Mungu mu ceng’ abiro.

⁴¹Man wubikwire ni agba ni Yehova ceng’ abiro i rundi: e en e cik mi nja cil kum dhanum’utuk mu; wubikwire i dwi mir abirone.

⁴²Wubibedo i otbak ceng’ abiro; dhanu m’anyola ceke ma kind Israel bibedo i otbak;

⁴³kara dhanum’utuk mu ng’ei nia aketho nyithindho mir Israel ubedo i otbak, kinde m’awodhogi kud i ng’om Misiri: an a Yehova Mungu mu.

⁴⁴E Musa yero ni nyithindho mir Israel pir agba pa Yehova ma juketho.