Read Alur Lembe Mi Julawi 24 Bible Online

Lembe Mi Julawi 24 - Alur bible

Lembe Mi Julawi 24

¹E Yehova yero ni Musa, ewacu kumae,

²Ng’ol ni nyithindho mir Israel, ya gikel iri moj ulam ma leng’ ma jufodo ni der, kara uketh thala liel thiri thiri.

³Yo woko ni kusikabongu mi lembatuca, i hema mi cokri, Harun bigwoke gambre uthieno cil kugweno i wang’ Yehova thiri thiri: ebibedo ni cik mi nja cil kum dhanum’utuk mu.

⁴Ebiyiko thala ma i thethala ma leng’ i wang’ Yehova thiri thiri.

⁵Man ibigamu mogo ma yom, e ibitedo kudo kwen m’ang’ina apar wi ario: ng’et apaje ario ma i katoko bibedo i kwen m’ang’ina acel.

⁶Man ibitherogi i wang’e ario, abusiel i wang’e acel, wi mesa ma leng’ i wang’ Yehova.

⁷Man ibiketho udok ma ng’wice ng’ar ma leng’ wi wang’e kubang’e kubang’e, kara ebed ni kwen ni lempoi, en e lam ma jutimo ku mac ni Yehova.

⁸Ku ba ceng’ sabatu ebikethe kakare i wang’ Yehova thiri thiri; en e ni kum nyithindho mir Israel, ni lembariba mi nja.

⁹Man ebibedo ni Harun ku wote; e gibicame i kamaleng’: kum en e leng’ m’usagu ire mi lam pa Yehova ma jutimo ku mac ni kum cik ma thiri thiri.

¹⁰Man wod dhaku ma Nyarisrael ma won mire Jamisiri, uwok woko i kind nyithindho mir Israel; man wod dhaku ma Nyarisrael ku ng’atu ma dhanu mir Israel gipiembri karacelo i kagonjo:

¹¹e wod dhaku ma Nyarisrael ucido Nying’, man ekwong’o kwong’: e gikele ba Musa. Man nying’ min mire Celomith, ma nya Dibri, mi suru pa Dan.

¹²E gikethe i kagwok, kara eyere igi ku dhu Yehova.

¹³E Yehova yero ni Musa, ewacu kumae,

¹⁴Wodh ng’atu m’ukwong’o kwong’ woko ng’ei kagonjo; man wek dhanu ceke m’uwinje giketh cing’gi i die wie, man wek udul ceke gicanye ku kidi.

¹⁵E iyer ni nyithindho mir Israel, iwac kumae, Ng’atu ma tek ukwong’o Mungu pare biyeyo dubo pare.

¹⁶Man ng’atu m’ucido nying’ Yehova, jubinege andha; udul ceke bicanye ku kidi andha: umondo, calu ng’atu m’anyola, kinde m’ecido nying’ Yehova, jubinege.

¹⁷Man ng’atu m’ugoyo ng’atu moko mi tho, jubinege andha.

¹⁸Man ng’atu m’ugoyo lim mi tho ebiyiko lembene, kwo mi kwo.

¹⁹Man tek ng’atu moko ketho mulima kum wadi; calu etimo, jubitimo i kume kumeca:

²⁰lero kawang’ lero, wang’ kawang’ wang’, lak kawang’ lak; calu eketho mulima kum dhanu, e jubitimo i kume kumeca.

²¹Ng’atu m’unego lim biyiko lembene: man ng’atu m’unego dhanu jubinege.

²²Wubibedo ku cik acel, ni umondo, calu ni ng’atu m’anyola: kum an a Yehova Mungu mu.

²³E Musa yero ni nyithindho mir Israel; man giwodho ng’atuno woko m’ukwong’o kwong’ i ng’ei kagonjo, e gicanye ku kidi. E nyithindho mir Israel gitimo calu Yehova ng’olo ni Musa.