Read Alur Lembe Mi Julawi 25 Bible Online

Lembe Mi Julawi 25 - Alur bible

Lembe Mi Julawi 25

¹Man Yehova yero ni Musa wi got Sinai, ewacu kumae,

²Yer ni nyithindho mir Israel, man iwac igi kumae, Kinde ma wumondo i ng’om m’amio iwu, e ng’om bilund kwiro sabatu ni Yehova.

³Coi podho pe, ri rundi abusiel, man ilwer kum podho mir ulok peri rundi abusiel, man icok nyinge;

⁴ento i rundi mir abirone bibedo sabatu mi yom ma cu mi ng’om, sabatu ni Yehova: kud icoi podho peri, kadok podho mir ulok peri de kud ilwer.

⁵Kud ikai kanga mi mwoka, man nying ulok mi yendulok peri m’ilwero kume ngo kud icoki: ebibedo rundi mi yom ma cu mi ng’om.

⁶Man sabatu mi ng’om bibedo ni cemo iwu; iri, man ni jatic peri, man ni bong’ peri, man ni jatic peri mi sukulia man ni welo peri, m’ubedo kudi.

⁷Man ni lim peri, man ni yedi ma ni i ng’om peri, nyaine ceke bibedo ni cemo.

⁸Man ibikwanu sabatu abiro mi rundi iri, rundi abiro wang’ abiro; ebibedo ni nindo mi sabatu abiro mi rundi iri, en e rundi pier ang’wen wi abung’wen.

⁹Ibilund oro agwara ma dwande tek kun ku kun i ceng’ mir apaje mi dwi mir abirone; wubioro agwarane i ceng’ mir adunya i ng’om mu ceke mba mba.

¹⁰E wubidwoko rundi mi pier abije leng’, man wubiyero pi gony i ng’ombe ceke ni dhanune ceke: ebibedo rundi mir anyong’a iwu; e wubidok kubeng’wu kubeng’wu ng’atuman bang’ aba pare, man wubidok kubeng’wu kubeng’wu ng’atuman ba juode.

¹¹Rundi pier abije maeca bibedo rundi mir anyong’a iwu: kud wucoi, kadok akaya de kud wukai maeno m’utwi kende i ie, kadi kud wucok nyingulok mi yendulok ma julwero kume ngo.

¹²Kum en e rundi mir anyong’a; ebibedo leng’ iwu: wubicamu nyaine kud i podho.

¹³I rundi maeni mir anyong’a wubidok kubeng’wu kubeng’wu ng’atuman bang’ aba pare.

¹⁴Man tek ing’iewo gin moko ba wedu, kadi ing’iewo kud i cing’ wedu, kud wutim rac man kum wadi man kum wadi.

¹⁵Calku wel rundi yo ng’ei rundi mir anyong’a ibing’iewo ba wedu, man calku wel mi rundi mi mwoka ebiloko i beng’i.

¹⁶Calkud udul mi rundi ibinyayu wel pinje, man calku nok mi rundi ibijwigo wel pinje; kum wel mi mwoka eloko i beng’i.

¹⁷Man kud wutim rac man kum wadi man kum wadi; ento ilwor Mungu peri: kum an a Yehova Mungu mu.

¹⁸Kum kumeno wutim cik para, man wugwok lembapoka para man wutimgi; e wubibedo i ng’om museme.

¹⁹E ng’om bicego nyinge, man wubicamu wubiyeng’ de, man wubibedo i ie museme.

²⁰Man tek wubiwacu kumae, Wabicamu ang’o i rundi mir abirone? nen, wacoyo ngo, kadi wacoko dhu nyai mi cemo mwa de ngo:

²¹abilund ng’olo mugisa para i wiwu i rundi mir abusiende, man ebicego nyinge mi rundi adek.

²²Man wubicoyo i rundi mir aborane, e wubicamu kum nyinge, en e ayi ma con; cil kum rundi mir abung’wende, maram nyinge bieek ko, wubicamu ayi ma con.

²³Man jubing’iewo ng’om ma gwei ungo; kum ng’om en e para: kum wun wu jubedo man umondo i bang’a.

²⁴Man i ng’om ceke mi piny mu wumi war mi ng’ombe.

²⁵Tek umeru doko jacan, man eng’iewo piny pare moko, wat pare ma ceng’ni en bilund bino, man ebiwaru gin m’umin ung’iewo.

²⁶Man tek ng’atuca bedo ku ng’atu moko ngo m’uware, man edoko jalonyo man enwang’u piny ma ware;

²⁷wek ekwan rundi mi ng’ieune, man edwok girameda ni ng’atu m’eng’iewe i bang’e; e ebidwogo ba piny m’amwonya pare.

²⁸Ento tek ecopo game gire ngo, gin m’eng’iewo bilund dong’ i cing’ ng’atu m’ung’iewe maram rundi mir anyong’a biwok ko: man ebiwok woko i rundi mir anyong’a, e ebidok ba piny pare.

²⁹Man tek ng’atu moko ng’iewo otbedo i adhura ma kume ju gang’kidi e ecopo ware yo ng’ei rundi acel yul m’eloke i ie; ebibedo ku lembe m’ecopo ware ko mi rundi acel yul.

³⁰Man tek juware ngo i kinde mi rundi yul, jubilund dwoko lembe mi ot ma ni i adhura ma kume ju gang’kidi tek ni ng’atu m’ung’iewe, cil kum dhanum’utuk pare: ebiwok ungo i rundi mir anyong’a.

³¹Ento udi mi pacu ma kume ju gang’kidi ngo jubikwanu karacelo ku pothi mi ng’om: jucopo warugi, man gibiwok woko i rundi mir anyong’a.

³²Ento adhura mi Julawi, en e udi mir adhura mi piny migi, Julawi copo waru i nindo ceke.

³³Man tek kind Julawi acel uwaru, e ot ma jung’iewo, kud adhura mi piny pare, biwok woko i rundi mir anyong’a; kum udi mir adhura mi Julawi gi piny migi i kind nyithindho mir Israel.

³⁴Ento ng’om mi kwac mir adhura migi jucopo loko ngo; kum en e piny migi ma gwei.

³⁵Man tek umeru doko jacan, man cinge rem iri; ibilund konyo kore: ebibedo karacelo kudi calu jabedo man umondo.

³⁶Kud igam kuloka i bang’e kadi nyai, ento lwor Mungu peri; kara umeru bed kudi.

³⁷Kud imi sente peri ire mi kuloka, kadi kud imi cemo peri ire mi nyai.

³⁸An a Yehova Mungu mu, m’uwodhowu woko kud i ng’om Misiri, kara ami ng’om Kanan iwu, man kara abed Mungu mu.

³⁹Man tek umeru doko jacan i beng’i man elokre gire iri; kud iketh etim iri calu jamiru.

⁴⁰Ebibedo i beng’i calu jatic mi sukulia, man calu umondo, ebitimo i beng’i cil kum rundi mir anyong’a:

⁴¹e ebilund wok kud i beng’i, en ku nyithindhe gikugi, man ebidok ba juot pare ma dhe, man ebidok ba piny pa kwaru mire.

⁴²Kum gi jutic para, m’awodho woko kud i ng’om Misiri: jubing’iewogi calu ng’eca ngo.

⁴³Kud ibim wie ku rwodho, ento ilwor Mungu peri.

⁴⁴Man pi jumiru peri ku bong’ peri, m’ibibedo ko: mi thek m’utieki gbur, wubing’iewo jumiru ku bong’ i bang’gi.

⁴⁵Mange ke wubing’iewo kind nyithindho mi jubedo m’ubedo i kindwu, man kind juudi migi ma ni i beng’wu, ma ginyolo i ng’om mu; e gibibedo piny mu.

⁴⁶E wubidwokogi ni aba ni nyithindho mu yo ng’eiwu, ma gibibedo kudo ni piny; wubigamu ng’eca mu mi nja i bang’gi: ento kud wubim wi utumegwu ma nyithindho mir Israel ku rwodho, man wi wadi man wi wadi.

⁴⁷Man tek jabedo kadi umondo lony i beng’i, man umeru doko jacan i vute, man eng’ieure gire ba jabedo kadi umondo ma ni i beng’i, kadi ba wat mi juot pa jabedone;

⁴⁸jucopo ware yo ng’ei ng’ieurene: kind utumin acel copo ware;

⁴⁹kadi neru mire, kadi wod neru mire, copo ware, kadi jumoko ma wat ma ceng’ni kude mi juode de copo ware; kadi tek elony, ecopo ware gire.

⁵⁰Man gibikwanu wel giku ng’atu m’ung’iewe ugambre i rundi m’eng’ieure i ie gire i bang’e cil kum rundi mir anyong’a: man welpiny mi ng’ieu pare bibedo calku wel mi rundi; ebibedo kude calku nindo pa jatic mi sukulia.

⁵¹Tek wel rundi fodi dupa, ebidwoko welpiny mi war calku wel rundinegi ma jung’iewe ko.

⁵²Man tek rundi dong’ nok ni rundi mir anyong’a, ebilund kwanu wel kude; calku wel rundi pare ebidwoko welpiny mi war pare.

⁵³Ebibedo kude calu jatic mi sukulia rundi ku rundi: kud ebim wie ku rwodho i weng’i.

⁵⁴Man tek juware ku lembe maeni ngo, ebilund wok i rundi mir anyong’a, en, ku nyithindhe karacelo kude.

⁵⁵Kum nyithindho mir Israel gi jutic ira; gi jutic para m’awodhogi woko kud i ng’om Misiri: an a Yehova Mungu mu.