Read Alur Lembe Mi Julawi 26 Bible Online

Lembe Mi Julawi 26 - Alur bible

Lembe Mi Julawi 26

¹Kud wutim mungu m’araga iwu, kadi kud wuting’ ayi m’ang’ika malu, kadi mbegi, kadok kidi m’ang’ika de ku juketh i ng’om mu, kara wurum i bang’e: kum an a Yehova Mungu mu.

²Wugwok ceng’ sabatu para, man wuyung kamaleng’ para; an a Yehova.

³Tek wuwotho ku cik para, man wugwoko lembang’ola para, wutimogi de:

⁴e abilund mio koth mu i nindone, man ng’om bicego nyaine, yen m’i pothi de bicego nyinge.

⁵E fodocam mu bitundo kum nindo mi coko nyingulok, man coko nyingulok bitundo kum nindo mi coyo; man wubicamu kwen mu mi yeng’o, e wubibedo i ng’om mu museme.

⁶Man abimio kwiocwiny i ng’om, e wubivuto piny, man ng’atu moko mbe ma binyayu lworo i iwu: man abijigo wi yedi ma rac kud i ng’om, kadok palamularu de bikadhu ngo kud i ng’om mu.

⁷E wubiriemo judegi mu, man gibipodho i weng’wu ku palamularu.

⁸E kindwu abic biriemo dak, man kindwu dak biriemo rubanga apar; e judegiwu bipodho i weng’wu ku palamularu.

⁹Man abiloko wang’a yor i beng’wu, man abiketho wunyai dit, e abimedowu, man abiketho lembariba para ma kudu cungo.

¹⁰Man wubicamu ayi ma con, man wubiwodho ayi woko ni ma nyen.

¹¹E abiketho hema para i kindwu: man ng’eyong’ec para bidaguwu ngo.

¹²E abiwotho i kindwu, man abibedo Mungu mu, e wubibedo dhanu para.

¹³An a Yehova Mungu mu, m’uwodhowu woko kud i ng’om Misiri, kara kud wubed ng’eca migi; man aturo utwindi mi mberembere mu, man aketho wucidho atira.

¹⁴Ento tek wubiwinjo dwanda ngo, man wubitimo lembang’ola maeni ceke ngo;

¹⁵man tek wubikwero cik para, man tek ng’eyong’ec mu bidagu lembapoka para, ketho nia wukwero timo lembang’ola para ceke, ento wuturo lembariba para;

¹⁶an bende abitimo maeni i kumwu: abiketho ndiri i wiwu, en e thokor ku cekkum, ma bicamu wang’, ma bimogo ng’eyong’ec de; e wubicoyo kodhi mu mananu, kum judegiwu bicame.

¹⁷Man abiketho wang’a i kumwu, jubigoyowu de i wang’ judegiwu: ju m’udaguwu bibimo wiwu; e wubiringo ma ng’atu moko mbe m’uriemowu.

¹⁸Man tek wubiwinjo dwanda ngo asu kum gin maeni, abilund ponjowu wang’ abiro kendo pi dubo mu.

¹⁹E abituro kuhaya mi tego mu: man abidwoko polo mu calu nyunyu, ng’om mu de calu mola;

²⁰e tego mu bithum mananu; kum ng’om mu bicego nyaine ngo, kadok yen mi ng’ombe de bicego nyinge ngo.

²¹Man tek wuwotho ku co ira, man wubiwinjo dwanda ngo, abikelo masendi wang’ abiro kendo i kumwu calku dubo mu.

²²Man abioro yedi m’i thim i kindwu, ma bikwalu nyithindho mu, ma binyotho lim mu de, ma bijwigo welwu de; e yo mu bicido.

²³Man tek wubijukru ngo ira ku gin maeni, ento wubiwotbo ku co ira;

²⁴e an bende abilund wotho ku co iwu; man abigoyowu, en e an, wang’ abiro pi dubo mu.

²⁵E abikelo palamularu i kumwu, ma biculo kwor mi lembariba; e wubicokru karacelo yo i adhura mu: man abioro thong’om i kindwu; man jubimiowu i cing’ jadegi.

²⁶Kinde m’aturo tego mi kwen mu, mon apar bitedo kwen mu i kendo acel, man gibidwoko kwen mu kendo ku mukero: e wubicamu, man wubiyeng’ ungo.

²⁷Man tek wubiwinjo dwanda ngo yo ng’ei maeni ceke, ento wubiwotho ku co ira;

²⁸abilund wotho ku co iwu ku kwinyo; man an bende abiponjowu wang’ abiro pi dubo mu.

²⁹Man wubicamu ring’kum wotwu, ku ring’kum nyigwu.

³⁰E abinyotho ka ma malu mu, man abing’olo ayi m’acwia mi ceng’ mu piny, man abibayu avujwu wi kum mungu m’araga mu; e ng’eyong’ec para bidagu wu.

³¹Man abidwoko adhura mu ni uvuru, abikelo kamaleng’ mu de ni nyoth, man abing’wio ng’wic mido mu ma ng’ar ungo.

³²E abikelo ng’om i nyoth; man judegiwu m’ubedo i ie igi biwang’ lii pire.

³³E abikethowu i kind thek, man abirieyo palamularu i tokwu: man ng’om mu bibedo ni nyoth, adhura mu de bibedo ni uvuru.

³⁴E anyong’a bilund nego ng’om kum sabatu pare, cil m’ebedo ni uvuru, man wun wuni i ng’om mi judegiwu; e ng’om bilund yom, man anyong’a binege kum sabatu pare.

³⁵Cil m’evuto e kende ebibedo ku yom, en e yom m’ebedo kudo ngo i ceng’ sabatu mu, kinde ma wubedo i wie.

³⁶Man pi dongwu m’udong’, abioro ndiri i adundegi i ng’om mi judegigi: e ba koto mi ith yen biriemogi; e gibiringo, calu ng’atu m’uringo palamularu; man gibipodho kinde ma ng’atu moko lubo tokgi ngo.

³⁷Man gibipodho man wi wadi man wi wadi, calu i wang’ palamularu, kinde ma ng’atu moko lubo tokgi ngo: e tego mu bibedo mbe ma wucung ko i wang’ judegiwu.

³⁸E wubinyothru i kind thek, man ng’om mi judegiwu bicamuwu woko.

³⁹E dongwu m’udong’ bithum i kier migi i ng’om mi judegiwu; man i kier pa kwarugi bende gibithum woko karacelo kugi.

⁴⁰E gibituco kier migi, ku kier mi kwarugi, i dubo migi ma gidubo ira, man bende, kum giwotho ku co ira,

⁴¹an bende awotbo ku co igi, man akelogi i ng’om mi judegi migi: tek adundegi ma jutimo yaa i kume ngo ulund ujwigre, man gilund gijolo masendi mi kier migi;

⁴²e abilund poi kum lembariba para ma ku Yakobo; man kum lembariba para ma kud Isak bende, man abipoi kum lembariba para ma kud Ibrahim bende; man abipoi kum ng’om.

⁴³Ng’om bende gibiweko, e anyong’a binege kum sabatu pare, kinde m’evuto ni uvuru ma gimbe: man gibijolo masendi mi kier migi: kum, en e kum gikwero lembapoka para, man ng’eyong’ec migi dagu cik para.

⁴⁴Ento karacelo ku maeni ceke, kinde ma gini i ng’om mi judegigi, abikunogi ngo, kadok adaga de abidagugi ngo, kara anyothgi pet, man kara atur lembariba para ma kugi; kum an a Yehova Mungu migi;

⁴⁵ento abipoi pigi kum lembariba pa kwarugi, m’awodho woko kud i ng’om Misiri i wang’ thek kara abed Mungu migi: an a Yehova.

⁴⁶Maeni lembang’ola ku lembapoka man cik, ma Yehova timo i kindgi giku nyithindho mir Israel kum got Sinai ni kum Musa.