Read Alur Lembe Mi Julawi 27 Bible Online

Lembe Mi Julawi 27 - Alur bible

Lembe Mi Julawi 27

¹Man Yehova yero ni Musa, ewacu kumae,

²Yer ni nyithindho mir Israel, man iwac igi kumae, Kinde ma ng’atu moko bitimo lembang’ola ma cu, dhanune bibedo ni Yehova calku kwanuwel peri.

³E kwanuwel peri bibedo pa ng’atu ma nico ugambre kum ma rundi pare pier ario cil kum ma rundi pare pier abusiel, kwanuwel peri bibedo cekel mi mola ma tar pier abic, calku cekel mi kamaleng’.

⁴Man tek en e dhaku, e kwanuwel peri bilund bedo cekel pier adek.

⁵Man tek egambre kum rundi abic cil kum rundi pier ario, kwanuwel peri bilund bedo cekel pier ario pi ng’atu ma nico, man cekel apar pi ng’atu ma dhaku.

⁶Man tek egambre kum dwi acel cil kum rundi abic, kwanuwel peri bilund bedo cekel mi mola ma tar abic pi nico, man kwanuwel peri bilund bedo cekel adek mi mola ma tar pi dhaku.

⁷Man tek ebedo ugambre kum rundi mir abusiel ku ma sagu; tek en e ng’atu ma nico, kwanuwel peri bilund bedo cekel apar wi abic, man pi ng’atu ma dhaku cekel apar.

⁸Ento tek en e jacan ma piny pare romo ngo pi kwanuwel peri, e jubikethe i wang’ jalam, e jalam bing’olo welpiny i wie; jalam bing’olo welpiny i wie calku m’uromo ng’atu m’ung’olo lembang’ola.

⁹Man tek en e lim, ma dhanu thiero ni girathiera ni Yehova, gin ceke ma ng’atu moko mio kum wadi maeni ni Yehova bibedo leng’.

¹⁰Kud edwoke tung’, kadi loke, ma ber ku ma rac, kadi ma rac ku ma ber: man tek ebiloko lim ku lim moko, e en ku maeno ma juloko bilund bedo leng’.

¹¹Man tek ebedo lim moko m’ucido, ma githiero ni girathiera ni Yehova ngo, ebilund ketho limne i wang’ jalam;

¹²e jalam bing’olo welpiny i wie, kadok ebedo ma ber kadi ma rac: calu in i jalam ing’olo welpiny i wie, e ebibedo kumeca.

¹³Ento tek ebiware andha, ebilund medo ng’ete mir abije kum kwanuwel peri.

¹⁴Man kinde ma dhanu bidwoko ot pare leng’ ni Yehova, jalam bilund ng’olo wel pinyne, kadok ebedo ber kadi rac: calu jalam bikwanu welpinje, ebicungo kumeca.

¹⁵Man tek ng’atu m’udwoke leng’, biwaru ot pare, ebilund medo ng’et sente mir abije mi kwanuwel peri i kume, e ebibedo pare.

¹⁶Man tek ng’atu moko bidwoko ng’et podho mi piny pare leng’ ni Yehova, e kwanuwel peri bilund bedo calku coine: coi mi nganu mi oro acel jubikwanu welpinje cekel mi mola ma tar pier abic.

¹⁷Tek edwoko podho pare leng’ ugambre i rundi mir anyong’a, ebicungo calku kwanuwel peri.

¹⁸Ento tek edwoko podho pare leng’ yo ng’ei rundi mir anyong’a, jalam bilund kwanu ire sente calku rundi m’udong’ ni rundi mir anyong’a; man jubikabu kum kwanuwel peri woko.

¹⁹Man tek ng’atu m’udwoko podhone leng’ biware andha, ebilund medo ng’ete mir abije mi sente mi kwanuwel peri i kume, man ebibedo pare andha.

²⁰Man tek ebiwaru podhone ngo, kadi tek eloko podhone ba ng’atu mange, jubiware kendo ngo:

²¹ento podhone, kinde m’ewok i rundi mir anyong’a, bibedo leng’ ni Yehova, calu podho ma jukwong’o; pinje bibedo pa jalam.

²²Man tek edwoko podho m’eng’iewo leng’ ni Yehova, ma en e podho mi piny pare ngo;

²³jalam bilund kwanu ire welpiny mi kwanuwel peri cil kum rundi mir anyong’a: man ebimio kwanuwel peri i ceng’ maeca, calu gin ma leng’ ni Yehova.

²⁴I rundi mir anyong’a podhone bidwogo ba ng’atu ma jung’iewe i bang’e, en e ng’atu ma won piny ma ng’om.

²⁵Man kwanuwel peri ceke bibedo calku cekel mi kamaleng’: cekel bibedo gera pier ario.

²⁶Kayu mi lim kende, ma jukethe ni kayu ni Yehova, ng’atu moko mbe ma bidwoke leng’; kadok en e koni dhiang’ kadi rombo, en e pa Yehova.

²⁷Man tek en e lim m’ucido, ebilund ware calku kwanuwel peri, man ebimedo ng’ete mir abije i kume: kadi tek juware ngo, jubilund loke calku kwanuwel peri.

²⁸Ento, gin ma jukwong’o, ma dhanu bikwong’o ni Yehova i kind gin ceke m’ebedo ko, kadok en e kind dhanu kadi kind lim, kadi mi podho mi piny pare, jubiloko kadi jubiwaru de ngo: gin ma jukwong’o kubang’e kubang’e en e leng’ m’usagu ni Yehova.

²⁹Ng’atu moko mbe ma jukwong’o, ma jukwong’o ku kind dhanu, ma jubiwaru; jubinege andha.

³⁰Man apaje ceke mi ng’om, kadok mi kodhi mi ng’om, kadi mi nying’ yen, en e pa Yehova; en e leng’ ni Yehova.

³¹Man tek ng’atu moko biwaru gin moko mir apaje pare, ebimedo ng’ete mir abije i kume.

³²Man apaje ceke mi dhok kadi mir udul rombe, gin ceke ma tek ukadhu ther uluth, apaje bibedo leng’ ni Yehova.

³³Ebiyenyo ngo tek ebedo ber kadi rac, kadok aloka de ebiloke ngo: man tek eloke moko, e en ku gin maeno m’eloke pire bilund bedo leng’; jubiware ngo.

³⁴Maeni lembang’ola, ma Yehova ng’olo ni Musa ni nyithindho mir Israel kum got Sinai.