Read Alur Lembe Mi Julawi 4 Bible Online

Lembe Mi Julawi 4 - Alur bible

Lembe Mi Julawi 4

¹Man Yehova yero ni Musa, ewacu kumae,

²Yer ni nyithindho mir Israel, wac kumae, Tek ng’atu moko bidubo m’aka ngo, i gin moko ma Yehova ng’olo ya ku jutim, man ebitimo kindgi acel:

³tek jalam ma juwiro bidubo ketho nia ekelo dubo wi dhanu, e dong’ ethier pi dubo pare, m’edubo, thwon m’aradu ma mulima mbe i kume ni Yehova ni lam mi dubo.

⁴Man ebikelo thwondhe ba dhugola mi hema mi cokri i wang’ Yehova; e ebiketho cinge i die wi thwondhe, man ebinego thwondhe i wang’ Yehova.

⁵E jalam ma juwiro bigamu kum rimb thwondhe, man ebikele ba hema mi cokri:

⁶man jalam biroyo lwete i rimo, man ebikiro kum rimone wang’ abiro i wang’ Yehova, i wang’ kusikabongu mi kamaleng’.

⁷Man jalam biketho kum rimone wi tung pemblam mir udok ma ng’wice ng’ar i wang’ Yehova, ma ni i hema mi cokri; man ebikonjo rimo ceke mi thwondhe the pemblam mi lam m’awang’a, ma ni dhugola mi hema mi cokri.

⁸Man mio ceke mi thwon mi lam mi dubo ebikabu kud i kume; mio m’uumo jambic, ku mio ceke ma ni i kum jambic,

⁹ku nying rong’ni ario, ku mo ma ni i kumgi, m’i piere, ku bor ma kum cwiny, ku rong’ni, ebikabu cen,

¹⁰calu jukabe woko ku kum koni dhiang’ mi lam mi girathiera mi kwiocwiny: e jalam biwang’ugi wi pemblam mi lam m’awang’a.

¹¹Man lau thwondhe, ku ringe ceke, ku wie, ku tiende, ku jambicne, man weine,

¹²en e thwondhe dho ebitero woko yo ng’ei kagonjo i ka ma leng’, ka ma juoyo ie vuru, man ebiwang’e wi yen ku mac: jubiwang’e ka ma juoyo ie vuru.

¹³Man tek udul mir Israel dho ukier, man ginde bedo apana ni wang’ cokri, man gitimo gin moko ma Yehova ng’olo y a ku jutim, e lembe ni i wigi;

¹⁴kinde ma dubo ma gidubo i kume ng’eire, e cokri bilund thiero thwon dhiang’ m’aradu ni lam mi dubo, man ebikele i wang’ hema mi cokri.

¹⁵Man judongo mir udul biketho cing’gi die wi thwondhe i wang’ Yehova; e jubinego thwondhe i wang’ Yehova.

¹⁶Man jalam ma juwiro bikelo kum rimb thwondhe ba hema mi cokri:

¹⁷e jalam biroyo lwete i rimone, man ebikire wang’ abiro i wang’ Yehova, i wang’ kusikabongu.

¹⁸Man, ebiketho kum rimone wi tung pemblam ma ni i wang’ Yehova, ma ni i hema mi cokri; man ebioyo rimone ceke the pemblam mi lam m’awang’a, ma ni dhugola mi hema mi cokri.

¹⁹Man ebikabu mione ceke kud i kume, man ebiwang’e wi pemblam.

²⁰Ebitimo kumeni kum thwon; calu etimo kum thwon mi lam mi dubo, ebitimo kumeca kum maeni de; e jalam bitimo adunya pigi, man jubiweko lembe migi woko.

²¹E ebitero thwondhe woko ng’ei kagonjo, man ebiwang’e calu ewang’u thwon ma kwong’ane; en e lam mi dubo mi cokri.

²²Kinde ma jabim udubo, man etimo aka ngo acel kud i kind gin ceke ma Yehova Mungu pare ng’olo ya ku jutim, man lembe ni i wie;

²³tek dubo pare, m’edubo i ie, ung’eire ire, ebikelo diel ni lam pare, nyok ma mulima mbe i kume.

²⁴Man ebiketho cinge i die wi diende, man ebinege i ka ma junego ie lam m’awang’a i wang’ Yehova: en e lam mi dubo.

²⁵Man jalam bigamu kum rimo mi lam mi dubone ku lwete, man ebikethe wi tung pemblam mi lam m’awang’a; e ebioyo rimbe woko the pemblam mi lam m’awang’a.

²⁶Man ebiwang’u mione ceke wi pemblam, calu mio mi lam mi girathiera mi kwiocwiny; e jalam bitimo adunya ire kum dubo pare, man jubiweko pire woko.

²⁷Man tek kind dhanu ma sai acel udubo aka ngo, ku timo gin moko ma Yehova ng’olo ya ku jutim, man lembe ni i wie;

²⁸tek dubo pare, m’edubo, ung’eire ire, ebilund kelo diel ni lam pare, vong’ ma mulima mbe i kume, kum dubo pare m’edubo.

²⁹Man ebiketho cinge i die wi lam mi dubo, man ebinego lam mi dubone i ka mi lam m’awang’a.

³⁰Man jalam bigamu kum rimone ku lwete, man ebikethe wi tung pemblam mi lam m’awang’a; man ebioyo rimone ceke the pemblam.

³¹Man mione ceke ebikabu cen, calu jukabu mio woko ku kum lam mi girathiera mi kwiocwiny; e jalam biwang’e wi pemblam ni ng’wic mido ma ng’ar ni Yehova; man jalam bitimo adunya pire, e jubiweko pire woko.

³²Man tek ekelo nyathi rombo ni girathiera pare ni lam mi dubo, ebikelo vong’ ma mulima mbe i kume.

³³Man ebiketho cinge i die wi lam mi dubo, man ebinege ni lam mi dubo i ka ma junego ie lam m’awang’a.

³⁴Man jalam bigamu kum rimo mi lam mi dubone ku lwete, man ebikethe wi tung pemblam mi lam m’awang’a; man ebikonjo rimone ceke the pemblam.

³⁵Man ebikabu mione ceke cen, calu jukabu mio mi nyathi rombo cen ku kum lam mi girathiera mi kwiocwiny; e jalam biwang’ugi wi pemblam, wi lam pa Yehova ma jutimo ku mac; e jalam bitimo adunya pire kum dubo pare m’edubo, e jubiweko pire woko.