Read Alur Lembe Mi Julawi 5 Bible Online

Lembe Mi Julawi 5 - Alur bible

Lembe Mi Julawi 5

¹Man tek ng’atu moko dubo, kum ewinjo dwal mi kwong’, m’e jamulembe, tek eneno kadi eng’eyo, tek etuce ngo, ebilund yeyo dubo pare.

²Kadi tek ng’atu moko mulo gin m’ucido, tek en e ukporo yedi ma leng’ ungo, kadi ukporo lim ma leng’ ungo, kadi ukporo gin ma lak ma leng’ ungo, man emungre ire, e ecidre, ebilund bedo ma lembe ni i wie.

³Kadi tek emulo gin m’ucido mi co, cilo pare ceke m’ecido kudo, man emungre ire; kinde m’eng’eyo pire, ebilund bedo ma lembe ni i wie.

⁴Kadi tek ng’atu moko kwong’o kwong’ vur vur ku dhoge ya etim rac, kadi ya etim ber, gin ceke ma dhanu biwacu vur vur ku kwong’, man emungre ire; kinde m’eng’eyo pire, ebilund bedo ma lembe ni i wie kum kind maeni acel.

⁵Man ebibedo, kinde ma lembe ni i wie kum gin maeni acel, nia ebituco gin maeno m’edubo i kume:

⁶man ebikelo lam pare mi kadhukuwicik ni Yehova kum dubo pare m’edubo, vong’ ku kind udul rombe, nyathi rombo kadi nyathi diel, ni lam mi dubo; e jalam bitimo adunya ire pi dubo pare.

⁷Man tek piny pare romo ngo mi nyathi rombo, ebilund kelo akuru ario, kadi nyithi nyathuk ario, ni lam pare mi kadhukuwicik, m’edubo i ie, ni Yehova; acel ni lam mi dubo, man mucelo ni lam m’awang’a.

⁸Man ebiterogi ba jalam, m’ebilar thiero maeno ma mi lam mi dubo, man ebing’wenyo wie kud i ng’ute, ento ebipoko ie ngo:

⁹man ebikiro kum rimone mi lam mi dubo wi ng’et pemblam; e dong rimone jubiketho cwir the pemblam: en e lam mi dubo.

¹⁰Man ebithiero mir arionde ni lam m’awang’a, calku lembapoka: e jalam bitimo adunya pire kum dubo pare m’edubo, e jubiweko pire ire.

¹¹Ento tek piny pare romo ngo mir akuru ario, kadi nyithi nyathuk ario, ebilund kelo girathiera pare pi lembe m’edubo i ie, ng’et mogo ma yom mir apaje ma i katoko ni lam mi dubo: ebiketho mo i wie ngo, kadok udok ma ng’wice ng’ar moko de ebiketho ngo i wie; kum en e lam mi dubo.

¹²Man ebikele ba jalam, e jalam bigamu kume pong’ cing’ ni lempoine, man ebiwang’e wi pemblam, wi lam pa Yehova ma jutimo ku mac: en e lam mi dubo.

¹³E jalam bitimo adunya ire kum dubo pare m’edubo i kind gin moko maeni, e jubiweko pire ire: e donge bibedo pa jalam, calu lam mi mogo.

¹⁴E Yehova yero ni Musa, ewacu kumae,

¹⁵Tek ng’atu moko kadhu ku wi cik, man edubo aka ngo, kum gin ma leng’ pa Yehova; ebilund kelo lam pare mi kadhukuwicik ni Yehova, en e nyog rombo ma mulima mbe i kume ku kind udul rombe, calku kwanuwel peri mi mola ma tar ku cekel, calku cekel mi kamaleng’, ni lam mi kadhukuwicik:

¹⁶man ebiculo kum gin m’ekier i ie kum gin ma leng’, man ebimedo ng’ete mir abije i kume, man ebimie ba jalam; man jalam bitimo adunya pire ku nyog rombo mi lam mi kadhukuwicik, e pire biwekre ire.

¹⁷Man tek ng’atu moko dubo man etimo gin moko ma Yehova ng’olo ya ku jutim; kadok eng’eyo ngo, ento lembe ni i wie, man ebiyeyo dubo pare.

¹⁸Man ebikelo nyog rombo ma mulima mbe i kume ku kind udul rombe, calku kwanuwel peri, ni lam mi kadhukuwicik, ni jalam; e jalam bitimo adunya pire kum gin m’ekier i ie aka ngo m’eng’eyo de ngo e jubiweko pire ire.

¹⁹En e lam mi kadhukuwicik: e lembe ni i wie andha i wang’ Yehova.