Read Alur Lembe Mi Julawi 6 Bible Online

Lembe Mi Julawi 6 - Alur bible

Lembe Mi Julawi 6

¹Man Yehova yero ni Musa, ewacu kumae,

²Tek ng’atu moko dubo, man ekadhu ku wi cik pa Yehova, man etimo wadi ku ndra i lembe mi sumba, kadi mi lokopiny, kadi mir ayeki, kadi mi sendo wadi,

³kadi enwang’u gin m’urwinyo, man etimo ku ndra i lembene, man ekwong’o kwong’ ku ndra; i gin moko i kind maeni ceke ma dhanu timo, m’edubo i ie;

⁴ebilund bedo, tek edubo, man lembe ni i wie, nia ebidwoko gin m’egamu kud ayeki kadi gin m’egamu ku kuvuga, kadi sumba ma jukanu i bang’e, kadi gin m’urwinyo m’enwang’u,

⁵kadi gin moko m’ekwong’o pire ku ndra; ebidwoke andha bo, man ebimedo ng’ete mir abije mange i kume: ebimio ni ng’atu ma lembe ni i kindgi gikude, i ceng’ ma junwang’u ie lembe i wie.

⁶Man ebikelo lam mi kadhukuwicik pare ni Yehova, nyog rombo ma mulima mbe i kume ku kind udul rombe, calku kwanuwel peri, ni lam mi kadhukuwicik, ba jalam:

⁷e jalam bitimo adunya pire i wang’ Yehova; man jubiweko pire ire pi gin ma tek etimo ketho lembe bedo i wie pire.

⁸Man Yehova yero ni Musa, ewacu kumae,

⁹Ng’ol ni Harun ku wote, wac kumae, Maeni cik mi lam m’awang’a: lam m’awang’a bibedo wi yen mi mac wi pemblam diewor soro cil kugweno; man jubiketho mac mi pemblam liel asu i wie.

¹⁰E jalam bironyo kendi pare ma nwang’, man ebiroyo bombo pare mi bongu ma nwang’ i kume; man ebijobo vuru mac m’uwang’u lam m’awang’a wi pemblam, man ebikethogi i ng’et pemblam.

¹¹Man ebiwodho kendi pare, man ebironyo kendi mange, e ebitero vurune woko ng’ei kagonjo i ka ma leng’.

¹²E jubiketho mac ma wi pemblam liel asu i wie, ebitho ngo; e jalam biwang’u yen i wie ku ba kugweno ku ba kugweno: man ebiketho lam m’awang’a i wie kakare, e ebiwang’u mio mi lam mi kwiocwiny i wie.

¹³Jubiketho mac liel wi pemblam thiri thiri; ebitho ngo.

¹⁴Man maeni cik mi lam mi mogo: wot Harun bithiere i wang’ Yehova, i wang’ pemblam.

¹⁵Man ebigamu kume pong’ cing’, kum mogo ma yom mi lam mi mogo, man kum moje, kud udok ma ng’wice ng’ar ceke ma ni wi lam mi mogo, man ebiwang’e wi pemblam ni ng’wic mido ma ng’ar, calu lempoine, ni Yehova.

¹⁶Man donge m’udong’ Harun ku wote bicamu: jubicame ma thobi mbe i ie i kamaleng’; gibicame i lelagang’ mi hema mi cokri.

¹⁷Jubitede ku thobi ngo. Amie calu makapiny migi i kind girathiera para ma jutimo ku mac; en e leng’ m’usagu, calu lam mi dubo, man calu lam mi kadhukuwicik.

¹⁸Ku ba co ceke ma kind nyithindho pa Harun bicamu kume moko, calu makapiny pare mi nja cu kum dhanum’utuk mu, i kind girathiera pa Yehova ma jutimo ku mac: ng’atu ma tek umulo kumgi bibedo leng’.

¹⁹Man Yehova yero ni Musa, ewacu kumae,

²⁰Maeni en e girathiera pa Harun ku wote, ma gibithiero ni Yehova i ceng’ ma juwire: ng’ete mir apaje ini mogo ma yom ma i katoko ni lam mi mogo ma thiri thiri, ng’ete moko mi kugweno, man ng’ete mucelo uthieno.

²¹Jubitime ku i atangla i kendo karacelo ku mo; kinde m’eyomni, ibikele i ie: ibithiero mukaru m’utal ni lam mi mogo ni ng’wic mido ma ng’ar ni Yehova.

²²Man jalam ma juwiro ma bibedo kakare i kind wote bithiere: jubiwang’e dho ni Yehova ku cik mi nja.

²³Man ku ba lam mi mogo pa jalam jubiwang’e dho: jubicame ngo.

²⁴E Yehova yero ni Musa, ewacu kumae,

²⁵Yer ni Harun man ni wote, wac kumae, Maeni cik mi lam mi dubo: jubinego lam mi dubo i wang’ Yehova i ka ma junego ie lam m’awang’a: en e leng’ m’usagu.

²⁶Jalam m’ulame pi dubo bicame: jubicame i kamaleng’, i lelagang’ mi hema mi cokri.

²⁷Gin ceke ma tek umulo ringe bibedo leng’; man kinde ma jukiro rimone wi kendi moko, lwok gin ma jukiro i wie i kamaleng’.

²⁸Ento agulu mir ulobo ma jutede i ie jubinego; man tek jutede i agulu mir umbu, jubirude, man jubilau ie ku pi.

²⁹Ku ba co ceke ma kind julam bicamu kume moko: en e leng’ m’usagu.

³⁰Man lam mi dubo moko mbe, ma jubicamu, ma jukelo rimone moko i hema mi cokri kara utim adunya i kamaleng’: jubiwang’e ku mac.