Read Alur Lembe Mi Julawi 7 Bible Online

Lembe Mi Julawi 7 - Alur bible

Lembe Mi Julawi 7

¹Maeni cik mi lam mi kadhukuwicik: en e leng’ m’usagu.

²Gibinego lam mi kadhukuwicik i ka ma ginego ie lam m’awang’a; man ebikiro rimone wi pemblam gbur.

³Man ebithiero mione ceke: yibe ma mio, ku mio ma umo jambic;

⁴man rong’ni ario, ku mio ma ni i kumgi, ma ni i kum pier, man bor ma wi cwiny, karacelo ku rong’ni ebikabu cen;

⁵man jalam biwang’ugi wi pemblam ni lam ma jutimo ku mac ni Yehova: en e lam mi kadhukuwicik.

⁶Ku ba co ceke ma kind julam bicamu kume moko: jubicame i kamaleng’: en e leng’ m’usagu.

⁷Calu lam mi dubo, e lam mi kadhukuwicik de bedo kumeca; cik ubedo acel pigi: jalam m’utimo adunya kude, ebibedo kude.

⁸Man jalam m’uthiero lam m’awang’a pa ng’atu moko, en e jalamne ebigamu lau mi lam m’awang’a m’elamu ire gire.

⁹Man ku ba lam mi mogo ceke ma jutedo i kendo, man ceke ma jutimo i atangla, man i atangla wi kendo, bibedo pa jalam m’ulame.

¹⁰Man ku ba lam mi mogo, ma jujebo ku mo, kadi m’uthwo, wot Harun ceke bibedo ko, acel calku wadi.

¹¹Man maeni en e cik mi lam mi girathiera mi kwiocwiny, ma ng’atu moko bithiero ni Yehova.

¹²Tek ethiere ni foyofoc, ebilund thiero kwen m’ang’ina ma thobi mbe i ie ma jujebo ku mo karacelo ku lam mi foyofoc, man kwen m’apada ma thobi mbe i ie ma juwiro ku mo, man kwen m’ang’ina ma jujebo ku mo, mi mogo ma yom m’uyomni.

¹³Ebithiero girathiera pare ku kwen m’ang’ina ma thobi mbe i ie karacelo ku lam mi girathiera mi kwiocwiny pare ni foyofoc.

¹⁴Man kum maeni ebithiero acel kud i girathiera kubang’e kubang’e ni lam m’ating’a ni Yehova; ebibedo pa jalam m’ukiro rimo mi girathiera mi kwiocwiny.

¹⁵Man ring’o mi lam mi girathiera mi kwiocwiny mi foyofoc jubicamu i ceng’ mi girathiera pare; ebiweko kume moko ngo cil kugweno.

¹⁶Ento tek lam mi girathiera pare bedo lembang’ola ma ni Mungu, kadi girathiera ma ku berocwiny, jubicame i ceng’ m’ethiero ie lam pare; man jubicamu donge m’udong’ urwone:

¹⁷ento dong’ ring’o mi lam m’udong’ i ceng’ mir adege jubiwang’u ku mac.

¹⁸Man tek jucamu ring’o moko mi lam mi girathiera pare mi kwiocwiny i ceng’ mir adege, jubijole ngo, kadok akwana de jubikwane ngo ni ng’atu m’uthiere: ebibedo ni ginmajudagu, man ng’atu m’ucamu kume moko biyeyo dubo pare.

¹⁹Man ring’o m’umulo gin m’ucido moko jubicamu ngo; jubiwang’e ku mac. Man pi ring’o, ku ba dhanu ceke ma leng’ bicamu kume moko:

²⁰ento ng’eyong’ec m’ucamu ring’o mi lam mi kwiocwiny, ma pa Yehova, ma cilo pare ni i kume, e jubikabu ng’eyong’ecne woko ku ba juthugi.

²¹Man kinde ma ng’atu moko bimulo gin m’ucido, cilo mi dhanu kadi yedi ma leng’ ungo, kadi ginmajudagu moko ma leng’ ungo, man ecamu ring’o mi lam mi girathiera mi kwiocwiny, ma pa Yehova, jubikabu ng’atu maeno woko.

²²Man Yehova yero ni Musa, ewacu kumae,

²³Yer ni nyithindho mir Israel, wac kumae, Kud wucam mio moko, mi koni dhiang’, kadi rombo, kadi diel.

²⁴Man mio mi gin m’utho gire, ku mio mi gin ma yedi yeco, jucopo timo ko tic mange; ento kud wucam kume moko ki.

²⁵Kum ng’atu ma tek ucamu mio mi lim moko, ma en e gin ma dhanu thiero ni girathiera ma jutimo ku mac ni Yehova, en e ng’atu m’ucame jubikabe woko ku ba juthugi.

²⁶Man kud wucam rimo moko ki, kadok en e mi winyo kadi mi lim, i kabedo mu moko.

²⁷Ng’atu ma tek ucamu rimo moko, jubikabu ng’atuca woko ku ba juthugi.

²⁸Man Yehova yero ni Musa, ewacu kumae,

²⁹Yer ni nyithindho mir Israel wac kumae, Ng’atu m’uthiero lam mi girathiera pare mi kwiocwiny ni Yehova ebikelo girathiera pare ni Yehova ku kum lam mi girathiera pare mi kwiocwiny:

³⁰cinge gire bikelo girathiera pare ma ni Yehova ma jutimo ku mac; ebikelo mio ku kor, kara juwir kor ni lam m’awira i wang’ Yehova.

³¹Man jalam biwang’u mio wi pemblam; ento kor bibedo pa Harun ku wote.

³²Man wumi bamb ma yor acwic ni jalam ni lam m’ating’a ku kum lam mi girathiera mu mi kwiocwiny.

³³Ng’atu ma kind wot Harun m’uthiero rimo mi girathiera mi kwiocwiny, ku mio, bibedo ku bam’o ma yor acwic ni makapiny.

³⁴Kum kor m’awira man bamb m’ating’a agamu ba nyithindho mir Israel ku kind lam mi girathiera migi mi kwiocwiny, man amiogi ni Harun ma jalam man ni wote calu makapiny migi mi nja m’uai ba nyithindho mir Israel.

³⁵Maeni en e makapiny mir awira pa Harun, man makapiny mir awira mi wote, ku kind lam pa Yehova ma jutimo ku mac, i ceng’ m’ethierogi i ie kara gitim tim ni Yehova i tic ma pa jalam;

³⁶ma Yehova ng’olo ya jumi igi m’uai ba nyithindho mir Israel, i ceng’ m’ewirogi. En e makapiny migi mi nja cil kum dhanum’utuk migi ceke.

³⁷Maeni cik mi lam m’awang’a, mi lam mi mogo, man mi lam mi dubo, mi lam mi kadhukuwicik de, man mi thier, man mi lam mi girathiera mi kwiocwiny;

³⁸ma Yehova ng’olo ni Musa wi got Sinai, i ceng’ m’eng’olo ni nyithindho mir Israel nia githier girathiera migi ni Yehova, i langa mi Sinai.