Read Alur Lembe Mi Julawi 8 Bible Online

Lembe Mi Julawi 8 - Alur bible

Lembe Mi Julawi 8

¹Man Yehova yero ni Musa, ewacu kumae,

²Gam Harun ku wotegi gikugi, man kendi ku mo m’awira, man thwon dhiang’ ni lam mi dubo, ku nyogi rombe ario, ku katoko mi kwen ma thobi mbe i ie;

³man icok udul ceke i dhugola mi hema mi cokri.

⁴E Musa timo calu Yehova ng’olo ire; e jucoko udul i dhugola mi hema mi cokri.

⁵E Musa wacu ni udul kumae, Maeni gin ma Yehova ng’olo ya jutim.

⁶E Musa kelo Harun ku wote, man ejomogi ku pi.

⁷Man eroyo kanzu i kume, etwio thondhpier i kume de, man eronye ku kanzu mucelo, e eroyo ugoke i kume, man etwio thol mir ugoke ma jurudho ku rieko i kume, e etwio ko kume.

⁸Man eketho jambkor i kume: man eketho Urim ku Thumim i jambkorne.

⁹Man eketho gali mi wie i wie; man eketho ban mi mola ma kwar, ter nyime, kum gali mi wie, en e jamkermiwic ma leng’; calu Yehova ng’olo ni Musa.

¹⁰Man Musa gamu mo m’awira, man ewiro hema ku gin ceke ma ni i ie, man edwokogi leng’.

¹¹Man ekiro kum moje wang’ abiro wi pemblam, man ewiro pemblam kud agulune ceke, ku jamblogo man there, kara udwokgi leng’.

¹²Man ekonjo kum mo m’awira i die wi Harun, man ewire, kara udwoke leng’.

¹³Man Musa kelo wot Harun, eronyogi de ku kanzu, man etwio thondhpier i kumgi, man etwio giratwia mi wie i wigi; calu Yehova ng’olo ni Musa.

¹⁴Man ekelo thwon dhiang’ mi lam mi dubo: man Harun ku wote giketho cing’gi i die wi thwon dhiang’ mi dubone.

¹⁵Man enege; e Musa gamu rimone, man ekethe wi tung pemblam gbur ku lwete, e edwoko pemblam leng’, man ekonjo rimo the pemblam, e edwoke leng’, kara utim adunya pire.

¹⁶Man egamu mio ceke ma ni wi jambic, man bor mi cwiny, ku rong’ni ario, ku mione; e Musa wang’e wi pemblam.

¹⁷Ento thwon dhiange, ku lawe, ku ringe, ku weine, ewang’u ku mac yo ng’ei kagonjo; calu Yehova ng’olo ni Musa.

¹⁸Man ethiero nyog rombo mi lam m’awang’a: e Harun ku wote giketho cing’gi i die wi nyog rombone.

¹⁹Man enege; e Musa kiro rimone wi pemblam gbur.

²⁰Man ethumo nyog rombone i wadhe; e Musa wang’u wie, man wadhe, ku mione.

²¹Man elwoko jambic ku tiende ku pi; e Musa wang’u nyog rombone dho wi pemblam: en e lam m’awang’a ni ng’wic mido ma ng’ar: en e lam ma jutimo ku mac ni Yehova: calu Yehova ng’olo ni Musa.

²²Man ethiero nyog rombo mucelo, nyog rombo mi thier: e Harun ku wote giketho cing’gi i die wi nyog rombone.

²³E enege; man Musa gamu kum rimone, e ekethe wi landu ith Harun ma yor acwic, man wi dwong’ cinge ma yor acwic, man wi dwong’ tiende ma yor acwic.

²⁴E ekelo wot Harun; man Musa ketho kum rimone wi landu ithgi ma yor acwic, man wi dwong’ cing’gi ma yor acwic, man wi dwong’ tiendgi ma yor acwic; man Musa kiro rimone wi pemblam gbur.

²⁵Man egamu mione, ku vibe ma mio, ku mio ceke ma ni kum jambie, ku bor ma kum cwinye, man rong’nine ario, ku mione, man bambe ma yor acwic:

²⁶man egamu kwen m’ang’ina acel ma thobi mbe i ie, ku i katoko mi kwen ma thobi mbe i ie, ma ni i wang’ Yehova, man kwen m’ang’ina acel mi kwen m’awira, ku kwen m’apada acel, man ekethogi wi mio, man wi bamb ma yor acwic:

²⁷man eketho ceke wi cing’ Harun, man wi cing’ wote, man ewirogi ni lam m’awira i wang’ Yehova.

²⁸E Musa ting’ogi ku wi cing’gi, man ewang’ugi wi pemblam wi lam m’awang’a: en e thier ma ni ng’wic mido ma ng’ar: en e lam ma jutimo ku mac ni Yehova.

²⁹E Musa gamu korne, man ewire ni lam m’awira i wang’ Yehova: en e makapiny pa Musa kum nyog rombo mi thier; calu Yehova ng’olo ni Musa.

³⁰E Musa gamu kum mo m’awira, man kum rimo ma ni wi pemblam, man ekire kum Harun, wi kendi pare, man kum wote, kum kendi mi wote de gikugi, man edwoko Harun leng’, ku kendi pare, man wote, ku kendi mi wote gikugi.

³¹E Musa wacu ni Harun man ni wote kumae, Wuted ringe i dhugola mi hema mi cokri: e wucame ku kwen ma ni i katoko mi thier keca, calu ang’olo, awacu kumae, Harun ku wote gibicame.

³²Man dong ringe ku dong’ kwen m’udong’ wuwang’ ku mac.

³³E kud wuwok woko ku dhugola mi hema mi cokri ceng’ abiro, maram ceng’ mi thier mu bithum ko: kum ebithierowu ceng’ abiro.

³⁴Calu jutimo tin, e Yehova ng’olo ya jutim kumeni, kara utim adunya piwu.

³⁵Man wubed i dhugola mi hema mi cokri dieceng’ ku diewor ceng’ abiro, man wugwok kur pa Yehova, kara kud wutho: kum jung’olo ira kumeni.

³⁶E Harun ku wote gitimo gin ceke ma Yehova lig’olo ku yo ba Musa.