Read Alur Lembe Mi Julawi 9 Bible Online

Lembe Mi Julawi 9 - Alur bible

Lembe Mi Julawi 9

¹Man etimbre i ceng’ mir aborane, nia Musa lwong’o Harun ku wote, ku judongo mir Israel;

²man ewacu ni Harun kumae, Gam nyathi dhiang’ kind dhok ni lam mi dubo, man nyog rombo ni lam m’awang’a, ma mulima mbe i kumgi, man ithiergi i wang’ Yehova.

³Man ibiyero ni nyithindho mir Israel, ibiwacu kumae, Wugam nyog diel ni lam mi dubo; man nyathi dhiang’ ku nyathi rombo, gin ario ma rundigi acel acel, ma mulima mbe i kumgi, ni lam m’awang’a;

⁴man koni dhiang’ ku nyog rombo ni lam mi kwiocwiny, ma wulam i wang’ Yehova; man lam mi mogo m’ujebre ku mo: kum Yehova nyuthre iwu tin.

⁵E gikelo gin ma Musa ng’olo i wang’ hema mi cokri: e udul ceke gicoro ceng’ni man gicungo i wang’ Yehova.

⁶Man Musa wacu kumae, Maeni gin ma Yehova ng’olo ya wutim: e dwong’ pa Yehova binyuthre iwu.

⁷E Musa wacu ni Harun kumae, Cor ceng’ni ba pemblam, man ithier lam mi dubo peri, ku lam m’awang’a peri, man itim adunya piri giri, man pi dhanu; e ithier girathiera mi dhanu, man itim adunya pigi; calu Yehova ng’olo.

⁸Kum kumeno Harun ucoro ceng’ni ba pemblam, man ethumo nyathi dhiang’ mi lam mi dubo, ma en e pire gire.

⁹Man wot Harun ukelo rimone i bang’e; man eroyo lwete i rimone, man ekethe wi tung pemblam, man eoyo rimone the pemblam:

¹⁰ento mione, ku rong’nine, man bor ma kum cwiny mi lam mi dubo, ewang’u wi pemblam; calu Yehova ng’olo ni Musa.

¹¹Man ringe ku lawe ewang’u ku mac yo ng’ei kagonjo.

¹²Man ethumo lam m’awang’a; man wot Harun ukelo rimone i bang’e, man ekire wi pemblam gbur.

¹³Man gimio lam m’awang’a ire, wath ku wath, man wie; e ewang’ugi wi pemblam.

¹⁴Man elwoko jambie ku tiende, man ewang’ugi wi lam m’awang’a wi pemblam.

¹⁵Man ekelo girathiera mi dhanu, man egamu diel mi lam mi dubo ma en e mi dhanu, man enege, ethiere de ni lam mi dubo, calu ma kwong’ane.

¹⁶Man ekelo lam m’awang’a, e ethiere calku lembapoka.

¹⁷Man ekelo lam mi mogo, man egamu kume pong’ cinge, ewang’e de wi pemblam, umedo lam m’awang’a mi kugweno.

¹⁸Man enego koni dhiang’ bende ku nyog rombo, en e lam mi girathiera mi kwiocwiny, ma en e mi dhanu: man wot Harun ukelo rimone i bang’e, m’ekiro wi pemblam gbur,

¹⁹man mio mi koni dhiang’ man nyog rombone, ku yibe ma mio, ku gin ma umo jambie, ku rong’ni, man bor ma wi cwiny:

²⁰man giketho mio wi kor, man ewang’u mione wi pemblam:

²¹man kor ku bamb ma yor acwic Harun uwiro ni lam m’awira i wang’ Yehova; calu Musa ng’olo.

²²E Harun uting’o cinge yo ba dhanu man emio mugisa igi; man eloro piny ku ba thiero lam mi dubo, ku lam m’awang’a, man lam mi kwiocwiny.

²³E Musa giku Harun gimondo i hema mi cokri, man giwok woko, e gimio mugisa ni dhanu: man dwong’ pa Yehova nyuthre ni dhanu ceke.

²⁴E mac uai i wang’ Yehova, man ewang’u lam m’awang’a wi pemblam ku mio: e kinde ma dhanu ceke neno maeni, gikok, man gipodho arieba wang’gi.