Read Alur Yeremia 1 Bible Online

Yeremia 1 - Alur bible

Yeremia 1

¹Lembe pa Yeremia ma wod Hilkia, ma kind julam ma ni i Anathoth i ng’om Benyamin:

²ma lembe pa Yehova bino i bang’e i nindo pa Yosia ma wod Amon, m’ubimo mi Yuda, i rundi apar wi adege mi camuker pare.

³Ebino bende i nindo pa Yehoiakim ma wod Yosia, m’ubimo mi Yuda, cil kum kajik mi rundi apar wi acende pa Zedekia, ma wod Yosia, m’ubimo mi Yuda, cil kum yaku Yerusalem i dwi mir abije.

⁴Nie lembe pa Yehova bino i bang’a, m’uwacu kumae,

⁵Ma fodi ang’ini ngo i ic nwang’u ang’ei, man ma fodi k’iwok ngo kud i ic nwang’u adwoki leng’; akethi ni jabila ni thek.

⁶Alund awacu kumae, A, Rwoth Yehova! nen, ang’eyo ngo maram awec ko; kum an a nyathin.

⁷Ento Yehova wacu ira kumae, Kud iwac kumae, An a nyathin; kum ibicidho ba ng’atu ma tek aori i bang’e, man ibiyero gin ma tek ayero iri.

⁸Kud ilworgi; kum ani kudi mi bodhi, Yehova wacu.

⁹Yehova lund urieyo cinge, man emulo dhoga; man Yehova wacu ira kumae, Nen, aketho lembe para i dhogi:

¹⁰nen, akethi tin wi thek man wi ker, kara ifudh man irwomb piny man kara inyoth man ing’iel, kara igom man ipidhi.

¹¹Mange ke lembe pa Yehova bino i bang’a, m’uwacu kumae, Yeremia, ineno ang’o? Man awacu kumae, Aneno uluth mi yendulam.

¹²Yehova lund uwacu ira kumae, Ineno dre: kum akuro wi lembe para kara atime.

¹³E lembe pa Yehova bino i bang’a wang’ arionde, m’uwacu kumae, Ineno ang’o? Man awacu kumae, Aneno ajiku ma dit m’ubewali; man wang’e ai yor ariwa ma malu.

¹⁴Yehova lund uwacu ira kumae, Lem ma rac m’uai yor ariwa ma malu biwok woko wi dhanu ceke m’ubedo wi ng’om.

¹⁵Kum, nen, abilwong’o wat ceke mi ker ma yor ariwa ma malu, Yehova wacu; e gibibino, man kubang’gi kubang’gi ng’atuman biketho komker pare i kamondo mi dhugang’ mi Yerusalem man kum gang’kidine ceke gbur, man kum adhura ceke mi Yuda,

¹⁶Man abiyero lembapoka para i kumgi kum dubo migi ceke, kum giweka, man giwang’u udok ma ng’wice ng’ar ni mungu mange, man girwo ni tic m’i cing’gi gigi.

¹⁷Ka kumeno twi pieri, man iai, e iyer igi gin ceke m’ang’olo iri: cwinyi kud ung’abre i kumgi, amaru ketho cwinyi ng’abre i wang’gi.

¹⁸Kum, nen, tin adwoki ni adhura ma tek, man mbegi mi nyunyu, man gang’ mi mola, kum ng’om dho, kum ju m’ubimo mi Yuda, kum judongomawijone, kum julamne, man kum dhanu m’i ng’omne.

¹⁹Man gibikiedo i kumi; ento gibisegi ngo: kum wanuti wakudi, Yehova wacu, kara abodhi.