Read Alur Yeremia 14 Bible Online

Yeremia 14 - Alur bible

Yeremia 14

¹Maeni lembe pa Yehova m’ubino ir ba Yeremia pi ndru.

²Yuda ywak, man dhugang’ne voc, gibedo ku kendi ma col wi ng’om; e ywak mi Yerusalem idho malu.

³Man judongo migi oro nyithindhgi ba pi: gibino ba pi m’atong’a, man ginwang’u pi ngo; gidwogo kud agulu migi ma ie nanu; lewic umakugi man cwinygi ng’abre, man giumo wigi.

⁴Lewic umaku jufur giumo wigi, kum ng’om ukak, kum koth umbe i ng’om.

⁵Eyo, nyajwaya bende m’i thim unyol, man eweko nyithindhe, kum lum umbe.

⁶Man kana m’i thim gicungo wi ka m’utingre ma lelele, e giyuyo lietho calu utho; wang’gi lokre, kum lum umbe.

⁷Kadok kier mwa tuco wiwa, tim ni kum nyingi, E Yehova; kum corocen mwa gi dupa; wadubo iri.

⁸E in i genogen mir Israel, Jalame i nindo mi can, nedi ibedo calu umondo i ng’om, man calu jawoth m’ulokre cen kara egonj ku diewori?

⁹Nedi ibedo calu dhanu ma lworo nege, calu dhanu ma jatego ma copo bodho ngo? Ento in, E Yehova, ini i kindwa, man walwongra ku nyingi; kud iwekwa.

¹⁰Yehova wacu kumae ni dhanu maeni, Cil kumeni giyenyo giwiri; gicero tiendgi ngo: ka kumeno Yehova jologi ngo; kawono ebipoi kum kier migi, man ebiliewo dubo migi.

¹¹E Yehova wacu ira kumae, Kud irwo pi dhanu maeni pi bedo ber igi.

¹²Kinde ma gikwiro cam, abiwinjo ywak migi ngo; man kinde ma githiero lam m’awang’a ku lam mi mogo, abijologi ngo; ento abidarugi ku palamularu, man ku ndru, man ku thong’om.

¹³Alund awacu kumae, A, Rwoth Yehova! nen, jubila wacu igi kumae, Wubineno palamularu ngo, kadi wubibedo ku ndru de ngo; ento abimio iwu kwiocwiny ma cu i ka maeni.

¹⁴Yehova lund uwacu ira kumae, Jubila giewo lemndra ku nyinga; aorogi ngo, kadi ang’olo igi de ngo, kadi ayero igi de ngo: giewo iwu ginmawokiwang’ mi ndra, ku ng’eyolembe, ku gin mananu, man abombi mir adundegi gigi.

¹⁵Ka kumeno Yehova wacu kumae pi jubila m’uewo ku nyinga, man aorogi ngo, ento giwacu kumae, Palamularu ku ndru bibedo i ng’om maeni ngo: Jubila maeno bithum ku palamularu ku ndru.

¹⁶Man dhanu ma giewo igi de jubibayugi woko i gengi mi Yerusalem ni kum ndru ku palamularu; man gibibedo ku ng’atu moko ngo m’uyikgi, gin, kadi mondgi, kadi wotgi, kadi nyiggi: kum abikonjo dubo migi i wigi.

¹⁷Man ibiwacu lembe maeni igi kmnae, Wek wang’a mol piwang’ diewor ku dieceng’, man ku gicoki; kum nya dhanu para ma sumba tur ku tur ma dit, ku lero ma rac dit.

¹⁸Tek awok woko i thim, e, nen, ju ma junegogi ku palamularu! man tek amondo i adhura, e, nen, ju ma kumgi lith, ni kum ndru! kum jabila ku jalam giwotho awotha i ng’om, man ng’eyong’ec umbe kugi.

¹⁹Ikwero Yuda ma gwei? ng’eyong’ec peri dagu Sayuni? igoyowa nedi, man cang moko mbe iwa? Wakio kwiocwiny, ento gin ma ber uwok ungo; man nindo mi cangu, man, nen, ang’abacwiny!

²⁰Watuco dubo mwa, E Yehova, man kier mi kwaruwa; kum wadubo iri.

²¹Kud idagwa, pi nyingi; kud icid komker mi dwong’ peri: poi, kud itur lembariba peri ma kudwa.

²²Gin moko nuti i kind gin ma ie nanu mi thek ma copo konjo kothi? kadi polo copo mio koth ma core? in i en ungo, E Yehova Mungu mwa? ka kumeno wabikuri; kum itimo gin maeni ceke.