Read Alur Yeremia 16 Bible Online

Yeremia 16 - Alur bible

Yeremia 16

¹Lembe pa Yehova bino i bang’a bende, m’uwacu kumae,

²Kud igam iri dhaku, kadi kud ibed ku nyithindho ma co kadi nyithindho ma nyir, kakeni.

³Kum Yehova wacu kumae, pi nyithindho ma co man nyithindho ma nyir ma junyolo kakeni, man pi meggi m’unyologi, pi weggi de m’unyologi i ng’om maeni:

⁴Gibitho ku tho mi can: jubiywagugi ngo, kadi jubiyikogi de ngo; gibibedo calu weyo wi wang’ ng’om; man jubidarugi ku palamularu, man ku ndru; man avujgi bibedo ni cemo mi winyo ma kor polo, man mi yedi m’i ng’om.

⁵Kum Yehova wacu kumae Kud imond i ot mi ywak, kadi kud icidh iywaki, kadi kud iywaggi; kum akabu kwiocwiny para ku ba dhanu maeni, Yehova wacu, en e mer mi bero ku kisa ma ng’ic.

⁶Ju ma dongo ku ju ma thindho bitho i ng’om maeni; jubiyikogi ngo, kadok dhanu de biywagugi ngo, kadi gibithumbri gigi de ngo pigi, kadi gibigwaru wigi de ngo pigi;

⁷kadi dhanu de bing’wenyo i kwen ungo pigi i ywak, kara ujukgi pi ju m’utho; kadi dhanu bimio igi kikombe mi juk de ngo ya gimadh pi weggi kadi pi meggi.

⁸Kud imond i ot mir agba ya wubed karacelo kugi, nicamu man nimadhu.

⁹Kum Yehova mir udul, Mungu mir Israel, uwacu kumae: Nen, abiketho dwal mir anyong’a ku dwal mi mutoro, dwand won ambadha ku dwand mugole jik i kakeni, i weng’wu man i nindo mu.

¹⁰Man ebitimbre, kinde m’ibinyutho lembe maeni ceke ni dhanu maeni, man gibiwacu iri kumae, Pirang’o Yehova ng’olo lem ma rac ma dit maeni i wiwa? kadi kier mwa en e ang’o? kadi dubo mwa en e ang’o ma wadubo ni Yehova Mungu mwa?

¹¹ilund iwac igi kumae, Kum kwaruwu giweka, Yehova wacu, man giwotho tok mungu mange, man gitimo igi, girwo igi de, man giweka, gitimo cik para de ngo;

¹²man wun wutimo rac ma sagu kwaruwu; kum, nen, wuwotho kubeng’wu kubeng’wu ng’atuman tok udhuko mir adundene ma rac, ketho nia wuwinjo dwanda ngo:

¹³ka kumeno abibayuwu woko kud i ng’om maeni i ng’om ma fodi wung’eyo ngo, kadok wun kadi kwaruwu; e wubitimo ni mungu mange kuca dieceng’ ku diewor; kum abinyutho bero iwu ngo.

¹⁴Ka kumeno, nen ceng’ ubino, Yehova wacu, nia jubiwacu kendo ngo kumae, Calu Yehova bedo kwo, m’uwodho nyithindho mir Israel kud i ng’om Misiri;

¹⁵ento kumae, Calu Yehova bedo kwo, m’uwodho nyithindho mir Israel kud i ng’om ma yor ariwa ma malu, man kud i ng’om ceke m’eriemogi i ie. Man abikelogi kendo i ng’om migi m’amio ni kwarugi.

¹⁶Nen, abilwong’o junam dupa, Yehova wacu, e gibijakugi; man yo ku ng’eye abilwong’o judwar dupa, man gibidwarugi ku ba gudi man ku bang’ ungulu gudi kubang’e kubang’e, man kud i odng’om m’i cana.

¹⁷Kum wang’a ni wi yo migi ceke; gibedo apana ni wang’a ngo, kadok kier migi de bedo apana ngo ni wang’a.

¹⁸Man abilar culo kier migi ku dubo migi wang’ ario, kum gicido ng’om para kud avu mi ginmajudagu migi, man gipong’o aba para ku ginmajudagu migi.

¹⁹E Yehova, ma tegona, man ka ma tek para, ku ka pondo para i nindo mi can, thek bibino i beng’i gambre i tung’ ng’om, man gibiwacu kumae, Kwaruwa gamu gin moko ngo ni aba ndhu ndra, en e gin ma ie nanu man gin ma kuloka mbe i ie.

²⁰Dhanu bitimo mungu ire gire, ma gi mungu ngo?

²¹Ka kumeno, nen, abiketho ging’eyo, wang’ acel maeni abiketho ging’eyo cinga man tegona; e gibing’eyo nia nyinga Yehova.