Read Alur Yeremia 17 Bible Online

Yeremia 17 - Alur bible

Yeremia 17

¹Dubo pa Yuda kieure ku kalamu mi nyunyu, man ku lak kidi ma tar ma rieny: eng’ikre wi ban mir adundegi, man wi tung pemblam migi;

²kinde ma nyithindhgi poi kum pemblam migi ku mungu m’araga migi ng’et yen m’udinyo wi ungulu gudi ma wiu.

³E got para i thim, abimio piny peri, man piny peri m’akana ceke ni ayeki, man ka ma malu peri, kum dubo, i kieu peri ceke kun ku kun.

⁴Man in, en e in giri, ibiai kud i aba peri m’amio iri; man abiketho itimo ni judegini i ng’om m’ing’eyo ngo; kum wucwinyo mac i ng’ecwiny para ma biwang’ mi nja.

⁵Yehova wacu kumae: Kwong’ ni wi ng’atu m’ugeno dhanu, man m’uketho ring’kum ni bote, man ma cwinye ai ku ba Yehova.

⁶Kum ebibedo calu yen m’udinyo i ng’omngele, man ebineno ngo kinde ma gin ma ber uwok, ento ebibedo i ka m’utal i langa en e ng’om mi kadu ma jubedo i ie ngo.

⁷Mugisa ni ng’atu m’ugeno Yehova, ma Yehova en e genogen pare.

⁸Kum ebibedo calu yen ma jupidho dhu pi, m’uguro ulage dhu kulo ma dit, man lworo binege ngo kinde ma lietho bino, ento ithe bibedo numu; man ie bipido ngo i rundi mi ndru, kadok nyinge de ebiweko cego ngo.

⁹Adunde en e jabombi ma sagu gin ceke, man enyothre apila: ng’a ma copo ng’eye?

¹⁰An, an a Yehova, ayenyo pidoic, aponjo adunde, kara ami ni dhanu kubang’gi kubang’gi ng’atuman calku yo pare, calku nying’ mi giratima pare.

¹¹Calu aywer m’ubedo wi tonge m’enyolo ngo, ng’atu m’ulimo lonyo bedo kumeno, man atira ngo; i die nindo pare gibiweke, man i kajik pare ebibedo jakasegu.

¹²Komker mi dwong’, ma juketho malu ugambre i thekri, en e ka mi kamaleng’ mwa.

¹³E Yehova, ma genogen mir Israel, jubinyayu lewic wi dhanu ceke m’uweki. Ju m’uweka jubikiewogi i ng’om, kum giweko Yehova, ma kulo mi pi mi kwo.

¹⁴Canga, E Yehova, e kuma bikei; bodha, e abiboth: kum in i pak para.

¹⁵Nen, giwacu ira kumae, Lembe pa Yehova ni kani? wek ebin kawono.

¹⁶Pi an, atimo pio ngo ma nia aai i tic pa jakwac i toki; kadok ceng’ mi can de ayenyo ngo; ing’eyo: gin m’uai woko kud i dendhoga eni i weng’i.

¹⁷Kud ibed ni ndiri ira: in i kapondo para i nindo ma rac.

¹⁸Wek lewic umak ju m’usenda, ento kud iwek lewic umaka; wek cwinygi ng’abre, ento kud iyi cwinya ng’abre; kel ceng’ ma rac i wigi, man inyothgi ku nyoth wang’ ario.

¹⁹Yehova wacu ira kumae: Cidhi man icung i dhugang’ mi nyithindho mi dhanu, ma ju m’ubimo mi Yuda mondo kudo, ma giwok ko de, man i dhugang’ ceke mi Yerusalem;

²⁰man iwac igi kumae, Wuwinj lembe pa Yehova, wu ju m’ubimo mi Yuda, ku Yuda ceke, ku ju m’ubedo i Yerusalem ceke, m’umondo ku dhugang’ maeni:

²¹Yehova wacu kumae Wubed ku weng’wu giwu, man kud wuyei ter moko i ceng’ sabatu, kadi kud wuluthe ku dhugang’ mi Yerusalem;

²²kadi kud wuyei ter moko kud i udiwu i ceng’ sabatu, kadok tic moko de kud wutim: ento wudwok ceng’ sabatu leng’, calu ang’olo ni kwaruwu.

²³Ento giwinjo ngo, kadok ithgi de giciko ngo, ento gidwoko ng’utgi tek, kara ku giwinji, man kara ku gijol ponji.

²⁴Man ebitimbre, tek wuwinjo dwanda cu, Yehova wacu, ya kud wuluth ter moko kud i dhugang’ mir adhura maeni i ceng’ sabatu, ento wudwok ceng’ sabatu leng’ ya kud wutim tic moko i ie;

²⁵e ju m’ubimo ku judongomawijo m’ujany wi komker pa Daudi, ma gibewotho i magali man wi riuni, gin, ku judongomawijo migi, ma dhanu mi Yuda, man ju m’ubedo i Yerusalem gibilund mondo ku dhugang’ mir adhura maeni; man adhura maeni bidong’ mi nja.

²⁶E gibiai ku i adhura mi Yuda, man kud i ka m’utieko Yerusalem gbur, man kud i ng’om Benyamin, man kud i ng’om poga, man kud i ng’om mir ungulu gudi, man ku yor ariwa ma piny, ma gikelo lam m’awang’a, ku lam, man lam mi mogo kud udok ma ng’wice ng’ar, man ma gibekelo lam mi foyofoc, ba ot pa Yehova.

²⁷Ento tek wubiwinjo dwanda ngo mi dwoko ceng’ sabatu leng’, man mi yeyo ter ungo nilutho i dhugang’ mi Yerusalem i ceng’ sabatu; e abilund cwinyo mac i dhugange, man ebiwang’u udi ma beco mi Yerusalem, e jubinege ngo.