Read Alur Yeremia 18 Bible Online

Yeremia 18 - Alur bible

Yeremia 18

¹Lembe m’uai ba Yehova ubino ba Yeremia, m’uwacu kumae,

²Ai, lor piny ba ot pa jacwiagulu, e abiketho iwinjo lembe para kuca.

³Alund aloro piny ba ot pa jacwiagulu, man, nen ebetimo tic wi ukobre.

⁴E kinde ma agulu m’etimo kud ulobo nyothre i cing’ jacwiagulu, etime kendo ni agulu mange, calu ebedo ber ni jacwiagulu ya etime.

⁵Lembe pa Yehova lund ubino i bang’a, m’uwacu kumae,

⁶E ot mir Israel, acopo timo kudi calu jacwiagulu maeni ngo? Yehova wacu. Nen, calu ulobo bedo i cing’ jacwiagulu, e wubedo kumeca i cinga, E ot mir Israel.

⁷I kinde m’aweco pi thek, man pi ker, ya jufudhe woko jurwombe de man junyothe;

⁸tek thek maeno, m’awacu pire, ulokre ni dubo migi, abilokra kum lem ma rac ma ia pido ya atim i kumgi.

⁹Man i kinde m’abiyero pi thek, man pi ker, ya jugom man jupidhe;

¹⁰tek gitimo gin ma rac i wang’a, ya giworo dwanda ngo, e abilund lokra kum gin ma ber, m’awacu ya abitimo ko kuloka igi.

¹¹Ka kumeno kawono, yer ni dhanu mi Yuda, man ni ju m’ubedo i Yerusalem, wac kumae, Yehova wacu kumae: Nen, atheko lem ma rac i kumwu, man aporo lembapora i kumwu: wudwog kawono kubeng’wu kubeng’wu ng’atuman kud i yo pare ma rac, man wuyik yo mu ku giratima mu.

¹²Ento giwacu kumae, En e mananu: kum wabiwotho tok lembapora mwa giwa, man wabitimo kubang’wa kubang’wa giwa ng’atuman tok udhuko mir adundene ma rac.

¹³Ka kumeno Yehova wacu kumae: Kawono wupenj i kind thek, ya ng’a m’uwinjo wagi ginduni; nyaku ma sumba mir Israel utimo gin ma judagu hai.

¹⁴Pei mi Lebanon bijik i cana m’i thimi? kadi pi ma ng’ic ma ai bor ma mol piny bidwono?

¹⁵Kum dhanu para wigi wu pira, giwang’u udok ma ng’wice ng’ar ni mungu mi ndra; e juketho gikier i yo migi, i yo ma con, ya giwoth kud i yo ma vorovoro, i yo ma judhuro adhura ngo;

¹⁶kara gidwok ng’om migi ni wang’uic, man cac ma thiri thiri; ku ba dhanu ceke m’ukadhu i bang’e ie biwang’ lii, man ebiyengo wie.

¹⁷Abilalugi calu yamu ma yo nyangu i wang’ jadegi; abinyutho igi ng’ec, wang’ re ngo, i ceng’ mi ruvwa migi.

¹⁸Gilund giwacu kumae, Wubin, man wek wapor lembapora kum Yeremia; kum cik birwinyo ni jalam ungo, kadi lembapora de ni jarieko, kadi lembe ni jabila. Wubin, man wek wagoyue ku leb, man ku waketh cwinywa kum lembe pare moko.

¹⁹Par pira, E Yehova, nan iwinj dwand ju m’uii koda.

²⁰Jubiculo gin ma rac pi gin ma beri? kum gikunyo vur pi ng’evong’ec para. Poi maram acungo ko i weng’i kara ayer gin ma her pigi, kara alok kwinyo peri woko kud i kumgi.

²¹Ka kumeno mi nyithindhgi ni ndru, man imigi ni tego mi palamularu; man wek mon migi bed umbe nyithindho, man mon ma coggi tho; man wek tho neg coggi, man jugoi awobi migi ko palamularu i lwiny.

²²Wek ywak uwinjre i udigi, kinde m’ikelo njuru asikari pio i wigi; kum gikunyo vur kara gimaka, man gipanu uwic ni tienda.

²³Ento, Yehova, ing’eyo lembapora migi ceke m’i kuma kara ginega; kud iwek kier migi, kadok dubo migi de kud iruc woko kud i weng’i; ento wek jung’ielgi i weng’i; tim kugi i nindo mi ng’ecwiny peri.