Read Alur Yeremia 19 Bible Online

Yeremia 19 - Alur bible

Yeremia 19

¹Yehova wacu kumae, Cidhi, man ing’ieu cupa mir ulobo pa jacwiagulu, man gam kind judongo mi dhanu, man kind judongo mi julam;

²man iwok woko i poga pa wod Hinom, ma ni i ng’et kamondo mi dhugang’ ma Harsith, man iyer lembe m’abiyero iri kuca;

³man iwac kumae, Wuwinj lembe pa Yehova, E ju m’ubimo mi Yuda, man ju m’ubedo i Yerusalem: Yehova mir udul, Mungu mir Israel, uwacu kumae, Nen, abikelo lem ma rac wi kakeni, man ng’atu ma tek uwinjo, ithe biwoi.

⁴Kum giweka, man giketho kakeni ng’eire ngo, man giwang’u udok ma ng’wice ng’ar i ie ni mungu mange, ma ging’eyo ngo, gin ku kwarugi man ju m’ubimo mi Yuda, man gipong’o kakeni ku rimo mi ju m’umbe dubo,

⁵man gigomo ka ma malu mi Bal, kara giwang’ wotgi i mac ni lam m’awang’a ni Bal; m’ang’olo ngo, kadi ayero maeni de ngo, kadok i pidoic para de ebino ngo:

⁶ka kumeno, nen, ceng’ ubino, Yehova wacu, nia jubilwong’o kakeni Tofeth kendo ngo, kadi Poga pa wod Hinom de ngo, ento Poga mi Nek.

⁷Man abithiro lembapora pa Yuda ku Yerusalem i kakeni; man abiketho gipodho ku palamularu i wang’ judegi migi, man ku cing’ ju m’uyenyo kwo migi: abimio avujgi de ni winyo ma kor polo ni cemo, man ni yedi m’i ng’om.

⁸Man abidwoko adhura maeni ni wang’uic, ku cac; ku ba dhanu ceke m’ukadhu kud i ng’ete ie biwang’ lii man ebicayu kum masendine ceke.

⁹Man abiketho gicamu ring’kum wotgi ku ring’kum nyiggi; man kubang’gi kubang’gi ng’atuman bicamu ring’kum jarimbe, i atiek mir ali man i can, ma judegi migi, ku ju m’uyenyo kwo migi, gisendogi kudo.

¹⁰Ibilund turo cupa i wang’ dhanu m’ucidho kudi,

¹¹man ibiwacu igi kumae, Yehova mir udul uwacu kumae, Abituro dhanu maeni kud adhura maeni kumeni, calu ng’atu moko turo agulu pa jacwiagulu, ma jucopo dwoko dho kendo ngo; e gibiyiko i Tofeth, maram ka moko bibedo umbe ma juyik i ie.

¹²Abitimo kumeni kum kakeni, Yehova wacu, man kum ju m’ubedo i iene de, m’abedwoko adhura maeni calu Tofeth:

¹³man udi mi Yerusalem, ku udi mi ju m’ubimo mi Yuda, ma jucido, bibedo calu ka mi Tofeth, en e udi ceke ma giwang’u udok ma ng’wice ng’ar i wie ni udul ceke m’i polo, man ma gikonjo giramadha ni mungu mange i wie.

¹⁴Yeremia lund uai kud i Tofeth, ka ma Yehova ore i ie kara ceu lembaewa; man ecungo i lelagang’ mi ot pa Yehova, man ewacu ni dhanu ceke kumae:

¹⁵Yehova mir udul, Mungu mir Israel, uwacu kumae, Nen, abikelo lem ma rac ceke m’angolo wi adhura maeni man wi pacune ceke; kum gidwoko ng’utgi tek, kara ku giwinj lem para.