Read Alur Yeremia 20 Bible Online

Yeremia 20 - Alur bible

Yeremia 20

¹Nie Pacur, ma wod Imer ma jalam, ma jego ma jadit i ot pa Yehova, uwinjo Yeremia beewo gin maeni.

²Pacur ulund ugoyo Yeremia ma jabila, man ekethe i kol ma ni dhugang’ ma malu pa Benyamin, ma ni i ot pa Yehova.

³Man etimbre urwone, nia Pacur uwodho Yeremia woko kud i kol. Yeremia lund uwacu ire kumae, Yehova lwong’o nyingi Pacur ungo, ento Magor-misabib.

⁴Kum Yehova wacu kumae, Nen, abidwoki ni ndiri iri giri, man ni jurimbi ceke; man gibipodho ku palamularu mi judegi migi, e weng’i bineno maeni; man abimio Yuda ceke i cing ubimo mi Babeli, man ebiterogi ni ng’eca i Babeli, e ebinegogi ku palamularu.

⁵Mange ke abimio lonyo ceke mir adhura maeni, ku kulokane ceke, man gin ma pire tekne ceke, eyo, piny m’akana ceke mir ubimo mi Yuda abimio i cing’ judegi migi; man gibidwokogi ni amaci, e gibiyakugi, man gibiterogi i Babeli.

⁶Man in, Pacur, ku dhanu ceke m’ubedo i ot peri wubicidho i ng’eca; e ibibino i Babeli, man ibitho kuca, jubiyiki de kuca, in, ku jurimbi ceke, m’iewo igi ku ndra.

⁷E Yehova, ipiko lembe i ia, e abedo kumeni; tego peri sagu para, man ivoya: adoko ni girang’iera ceng’ du dhanu ceke kubang’gi kubang’gi gicaya.

⁸Kum ku ba wec ceke m’aweco, akok akoka; akok kumae, Rop ku nyoth mire ma! kum judwoko lembe pa Mungu ni cac ira, man jamng’iero, ceng’ du.

⁹Man tek awacu kumae, Abiweco pire ngo, kadi yero kendo ngo ku nyinge, elund ebedo calu mac m’uwang’ yor i adundena ma juciko bang’e yor i cogona, man aol ku twiocwiny, e acopo ciro ngo.

¹⁰Kum awinjo yeronying’ mi dhanu dupa, ndiri ni kun ku kun. Jurimba ceke ma ceng’ni, gi ju m’ukuro kier para, giwacu kumae, Dote, e wabidote, kuno nyo ebiyio iwa, e wabisage, man wabiculo kwor mwa i kume.

¹¹Ento Yehova ni karacelo kuda calu ng’atu ma jatego man jang’oindiri: ka kumeno jusendna bikier, e gibisagu ngo; e lewic bimakugi ma gwei, kum gitimo ku rieko ngo, en e ku jwigri mi nja ma wijo biwil pire Ici ngo.

¹²Ento, E Yehova mir udul, m’iponjo ju ma pwe, m’ineno adunde ku pidoic, wek anen culokwor peri i kumgi; kum anyutho lembe para iri,

¹³Wuwer ni Yehova, wupak Yehova; kum’ ebodho ng’eyong’ec pa jacanpiny kud i cing’ jutimrac.

¹⁴Kwong’ ubed wi ceng’ ma junyola i ie: kud wuyi mugisa kwany ceng’ ma ma nyola i ie.

¹⁵Kwong’ ubed wi ng’atu m’ukelo rwonglembe ba vwa, m’uwacu kumae, Junyolo nyathin ma nico iri; ma junyayu ko mutoro i ie.

¹⁶E wek ng’atu maeno bed calu adhura ma Yehova redho, m’elokre de ngo, man wek ewinj ywak kugweno, ku kok i nindo mi dieceng’;

¹⁷kum enega ngo kud i ic; e kuno di ma bedo ni liel para, man icne bedo dit thiri thiri.

¹⁸Pirang’o awok woko kud i ic nineno tic mi muli ku can, ma nia ceng’ para thum ku lewici?