Read Alur Yeremia 21 Bible Online

Yeremia 21 - Alur bible

Yeremia 21

¹Lembe m’uai ba Yehova ubino ba Yeremia, kinde m’ubimo ma Zedekia oro Pacur ma wod Malkija, ku Zefania ma wod Maseya, ma jalam, i bang’e, m’uwacu kumae,

²Akwei, penj ba Yehova piwa; kum Nebukadrezar m’ubimo mi Babeli timo ali i kumwa: kuno nyo Yehova bitimo kudwa calku tic mi musana pare ceke, kara eidh malu kud i bang’wa.

³Yeremia lund uwacu igi kumae, Wuwac kumae ni Zedekia:

⁴Yehova, Mungu mir Israel, uwacu kumae, Nen, abiloko jamtho mir ali ma ni i cingwu, ma wukiedo ko kum ubimo mi Babeli, man kum Jukaldayo m’utiekowu, yo ng’ei gang’kidi; man abicokogi i die adhura maeni.

⁵Man an gira de abikiedo i kumwu ku cing’ m’arieya man ku bot ma tek, en e ku ng’ecwiny, man ku kwinyo, man ku dhunjo ma dit.

⁶Man abigoyo ju m’ubedo i adhura maeni, dhanu ku lim bende: gibitho ku thong’om ma dit.

⁷Man yo ku ng’eye, Yehova wacu, Abimio Zedekia m’ubimo mi Yuda, ku jutic pare, man dhanu, en e wadi ju m’udong’ i adhura maeni ni thong’om, ni palamularu, man ni ndru, i cing’ Nebukadrezar m’ubimo mi Babeli, man i cing’ judegi migi, man i cing’ ju m’uyenyo kwo migi: man ebigoyogi ku lak palamularu; ebiwekogi ngo, kadok ngisi de binege ngo, kadi kisa de.

⁸Man iwac kumae ni dhanu maeni, Yehova wacu kumae; Nen, aketho yo mi kwo ku yo mi tho i weng’wu.

⁹Ng’atu m’ubedo i adhura maeni bitho ku palamularu, man ku ndru, man ku thong’om; ento ng’atu m’uwok, man emondo ni Jukaldayo m’utiekowu kud ali, ebibedo kwo, man kwo pare bibedo ire ni amaci.

¹⁰Kum aketho wang’a kum adhura maeni mi lem ma rac, man mi lem ma ber ungo, Yehova wacu: jubimie i cing ubimo mi Babeli, e ebiwang’e ku mac.

¹¹Man pi ot p’ubimo mi Yuda, wuwinj lembe pa Yehova:

¹²E ot pa Daudi, Yehova wacu kumae, Tim pokolembe kugweno, gony ng’atu ma juyaku de kud i cing’ jasend, kwinyo para maru wok woko calu mac, man ewang’ calu ng’atu moko mbe ma copo nege, kum lem ma rac mi giratima mu.

¹³Nen, ani i kumi, E ng’atu m’ubedo i poga, man ng’atu mi cana mi pambu, Yehova wacu; wun ma wuwacu kumae, Ng’a ma biloro piny i kumwa? kadi ng’a ma bimondo i kabedo mwa?

¹⁴Man abisendowu calku nying’ mi giratima mu, Yehova wacu; e abicwinyo mac i luli pare, man ebiwang’u gin ceke m’utieke gbur.