Read Alur Yeremia 24 Bible Online

Yeremia 24 - Alur bible

Yeremia 24

¹Yehova nyutho ira, man, nen, katoko ario mi nyingubolo ubedo aketha i wang’ hekalu pa Yehova, yo ng’ei yak ma Nebukadrezar m’ubimo mi Babeli yaku ko Yekonia ma wod Yehoiakim, m’ubimo mi Yuda, ku judongomawijo mi Yuda, ku jubodho man weg uka, kud i Yerusalem, m’eterogi de i Babeli.

²Katoko acel ie ju nyingubolo ma ber hai, calu nyingubolo m’ular ucek; man katoko mucelo ie ju nyingubolo ma rac hai, ma jucopo camu ngo, kum gi rac hai.

³Yehova lund uwacu ira kumae, Ineno ang’o Yeremia? Man awacu kumae, Nyingubolo; nyingubolo ma ber, ber hai; man ma rac, rac hai; ma jucopo camu ngo, kum gi rac hai.

⁴E lembe pa Yehova bino i bang’a m’uwacu kumae,

⁵Yehova, Mungu mir Israel, uwacu kumae: Calu nyingubolo maeno ma ber, e abiparu pi ju ma juyaku mi Yuda kumeno, m’aorogi ku kakeni i ng’om mi Jukaldayo mi lem ma ber.

⁶Kum abiketho wang’a i kumgi pi lem ma ber, e abikelogi kendo i ng’om maeni: man abigurogi, e abiredhogi piny kendo ngo; man abipidhogi, e abifudhogi ngo.

⁷Man abimio igi adunde mi ng’eyo an, nia an a Yehova: man gibibedo dhanu para, man abibedo Mungu migi; kum gibidwogo i bang’a kud adundegi ceke.

⁸Man pi nyingubolo ma rac, ma jucopo camu ngo, kum gi rac hai, andha Yehova wacu kumae, Abimio Zedekia m’ubimo mi Yuda, ku judongomawijo pare, man donge m’udong’ m’i Yerusalem, m’udong’ i ng’om maeni, ku ju m’ubedo i ng’om Misiri kumeni,

⁹abimiogi kara juthorgi kun ku kun i kind thek ceke m’i ng’om mi lem ma rac; kara gibed mi cac man koi, mi lele man kwong’, i ka ceke m’ariemogi i ie.

¹⁰Man abioro palamularu, ku ndru, man thong’om, i kindgi, maram githum ko kud i ng’om m’amio igi man ni kwarugi.