Read Alur Yeremia 26 Bible Online

Yeremia 26 - Alur bible

Yeremia 26

¹I thekri mi camuker pa Yehoiakim ma wod Yosia, m’ubimo mi Yuda, lembe maeni m’uai ba Yehova bino, m’uwacu kumae,

²Yehova wacu kumae: Cung i lelagang’ mi ot pa Yehova, man iyer ni adhura ceke mi Yuda, m’ubino kara girwo i ot pa Yehova, lembe ceke m’ang’olo iri ya iyer igi; kud iwek lembe moko ki.

³Kuno nyo gibiwinjo, man gibilokri kubang’gi kubang’gi ng’atuman kud i yo pare ma rac; kara alokra ni lem ma rac m’akeco ya abitimo i kumgi kum lem ma rac mi giratima migi.

⁴Man ibiwacu igi kumae, Yehova wacu kumae: Tek wubiwinjo dwanda ngo, kara wuwoth i cik para, m’aketho i weng’wu,

⁵ya wuwinj lembe mi jutic para ma jubila m’aoro i beng’wu, m’aai ko pir kugweno man aorogi, ento wuwinjo ngo;

⁶abilund dwoko ot maeni pami Cilo, man abidwoko adhura maeni ni kwong’ ni thek ceke m’i ng’om.

⁷E julam ku jubila ku dhanu ceke giwinjo Yeremia beyero lembe maeni i ot pa Yehova.

⁸Man etimbre, kinde ma Yeremia daru yero lembe ceke ma Yehova ng’olo ire ya eyer ni dhanu ceke, nia julam ku jubila ku dhanu ceke gimake, giwacu kumae, Ibitho andha.

⁹Nedi iewo ku nying’ Yehova, iwacu kumae, Ot maeno bidoko calu Cilo, man adhura maeni bibedo ni uvuru, ma dhanu mbe i ie? E dhanu ceke gicokri ba Yeremia i ot pa Yehova.

¹⁰E kinde ma judongomawijo mi Yuda winjo lembe maeni, giai i ot p’ubimo giidho malu ba ot pa Yehova; e gibedo i kamondo mi dhugang’ ma nyen mi ot pa Yehova.

¹¹Julam ku jubila gilund giyero ni judongomawijo man ni dhanu ceke, giwacu kumae, Ng’atu maeni romo ku tho; kum eewo kum adhura maeni, calu wuwinjo ku ithwu.

¹²Yeremia lund uyero ni judongomawijo ceke man ni dhanu ceke, ewacu kumae, Yehova ora kara aeu lembe ceke kum ot maeni man kum adhura maeni ma wuwinjo.

¹³Ka kumeno kawono wuyik yo mu ku giratima mu, man wuwor dwand Yehova Mungu mu; e Yehova bilokre kum lem ma rac m’eyero i kumwu.

¹⁴Ento an, nen, ani i cingwu: wutim i kuma calu e ber man atira i weng’wu.

¹⁵Ndhu wung’ei andha nia tek wunega, wubikelo rimo m’umbe dubo i wiwu giwu, man wi adhura maeni, man wi ju m’ubedo i ie de; kum andha Yehova ora i beng’wu kara ayer lembe maeni ceke i ithwu.

¹⁶Judongomawijo ku dhanu ceke gilund giwacu ni julam man ni jubila kumae: Ng’atuni romo ku tho ngo: kum eyero iwa ku nying’ Yehova Mungu mwa.

¹⁷Judongo moko mi ng’om gilund giai, man giyero ni cokri ceke mi dhanu, giwacu kumae,

¹⁸Mikaya ma Jamoracti ewo i nindo pa Hezekia m’ubimo mi Yuda; man eyero ni dhanu ceke mi Yuda, ewacu kumae, Yehova mir udul uwacu kumae: Jubifuro Sayuni calu podho, man Yerusalem bidoko ni udhuru, man got mi ot calu ka ma malu mi luli.

¹⁹Hezekia m’ubimo mi Yuda ku Yuda ceke giketho etho? elworo Yehova ngo, man ekwayu bero ba Yehova ngo, e Yehova lokre ngo kum lem ma rac m’eyero i kumgi? Tek kumeno nwang’u watimo lem ma rac dit kum ng’eyong’ec mwa giwa.

²⁰Man ng’atu moko de nuti m’uewo lembe bende ku nying’ Yehova, en e Uria ma wod Cemaya mi Kiriath-yearim: man eewo kum adhura maeni man kum ng’om maeni calku lembe ceke pa Yeremia.

²¹E kinde ma Yehoiakim m’ubimo, ku dhanu ceke ma jukero pare, man judongomawijo ceke, giwinjo lembe pare, ubimo ponjo ketho etho; ento kinde ma Uria winjo maeni, lworo nege e eringo, man ecidho i Misiri.

²²E Yehoiakim m’ubimo oro dhanu i Misiri, ma njdnge, Elnathan ma wod Akbor, man dhanu moko karacelo kude, i Misiri;

²³e giwodho Uria ku i Misiri, man gitere ba Yehoiakim m’ubimo, m’unege ku palamularu, ebayu avuje de i liel mi dhanu ma sai.

²⁴Ento cing Ahikam ma wod Cafan ni karacelo ku Yeremia, kara ku gimie i cing’ dhanu ya ginege.