Read Alur Yeremia 27 Bible Online

Yeremia 27 - Alur bible

Yeremia 27

¹I thekri mi camuker pa Yehoiakim ma wod Yosia, m’ubimo mi Yuda, lembe maeni ai ba Yehova bino ba Yeremia m’uwacu kumae,

²Yehova wacu ira kumae: Tim iri twic kud utwindi, man ikethgi i ng’uti:

³man iorgi bang’ ubimo mir Edom, man bang’ ubimo mi Moab, man bang’ ubimo mi nyithindho mir Amon, man bang’ ubimo mi Turo, man bang’ ubimo mi Sidon, ku cing’ jukwenda m’ubino Yerusalem ba Zedekia m’ubimo mi Yuda:

⁴man imi igi ng’ol ni rwodhigi, iwac kumae, Yehova mir udul, Mungu mir Israel, uwacu kumae, Wubiwacu kumeni ni rwodhiwu:

⁵Acwio ng’om, dhanu ku yedi ma ni wi wang’ ng’om, ku tego para ma dit man ku bota m’arieya; man amie ni ng’atu m’emaku piny ira ya amie ire.

⁶E kawono amio ng’om maeni ceke i cing’ Nebukadnezar m’ubimo mi Babeli, ma jatic para; e yedi m’i thim bende amio ire kara utim ire.

⁷E thek ceke bitimo ire, man ni wode, man ni wod wode, maram nindo mi ng’om pare ma dhe bibino ko: e thek dupa man ubimo ma dongo bilund dwoke ni ng’eca igi.

⁸E ebitimbre, nia thek man ker ma bitimo ni Nebukadnezar nini m’ubimo mi Babeli ngo, man ma biketho ng’utgi the mberembere mir ubimo mi Babeli ngo, abisendo thek maeno, Yehova wacu, ku palamularu, man ku ndru, man ku thong’om, maram adaru kogi ku cinge.

⁹Ento wun, kud wuwinj jubila mu kadi jung’eilembe mu, kadi lek mu, kadi jurieko mu, kadi ajoga mu, ma giyero iwu, ma giwacu kumae, Wubitimo ni ubimo mi Babeli ngo:

¹⁰kum giewo ndra iwu, kara uterwu bor ku ng’om mu, man kara ariemwu woko, e wunyothru.

¹¹Ento thek ma bitero ng’utgi the mberembere mir ubimo mi Babeli, ma bitimo ire de, thek maeno abiyio gidong’ i ng’om migi ma dhe, Yehova wacu: e gibifure, man gibibedo i ie.

¹²E ayero ni Zedekia m’ubimo mi Yuda calku lembe maeni ceke, awacu kumae, Wuter ng’utwu the mberembere p’ubimo mi Babeli, man wutim ire man ni dhanu pare, man wubed kwo.

¹³Nedi wuyenyo wutho, in ku dhanu peri, ku palamularu, ku ndru, man ku thong’om, calu Yehova yero pi thek ma bitimo ni ubimo mi Babeli ngo?

¹⁴Man kud wuwinj lembe mi jubila m’uyero iwu, m’uwacu kumae, Wubitimo ni ubimo mi Babeli ngo; kum giewo ndra iwu.

¹⁵Kum aorogi ngo, Yehova wacu, ento giewo ku ndra ku nyinga; kara ariemwu woko, man kara wunyothru, wun, wuku jubila m’uewo iwu.

¹⁶Ayero ni julam bende man ni dhanu maeni ceke, awacu kumae, Yehova wacu kumae: Kud wuwinj lembe mi jubila mu ma giewo iwu giwacu kumae, Nen, fodi nyanok jubidwoko agulu mi ot pa Yehova kud i Babeli; kum giewo ndra iwu.

¹⁷Kud wuwinjgi; wutim ni ubimo mi Babeli, e wubed kwo: pirang’o adhura maeni dok ni uvuru?

¹⁸Ento tek gi jubila, man tek lembe pa Yehova bedo kugi, kawono wek gitim kwac ba Yehova mir udul kara agulu m’udong’ i ot pa Yehova, man i ot mir ubimo mi Yuda, man i Yerusalem, kud ucidh i Babeli.

¹⁹Kum Yehova mir udul uwacu kumae pi mbegi, man pi nam, man pi thepiny, man pi dong agulu m’udong’ i adhura maeni,

²⁰ma Nebukadnezar m’ubimo mi Babeli yaku ngo, kinde m’etero Yekonia ma wod Yehoiakim ni ng’eca, m’ubimo mi Yuda, kud i Yerusalem etere i Babeli, ku weg yung mi Yuda ceke, man Yerusalem;

²¹eyo, Yehova mir udul, Mungu mir Israel, uwacu kumae pir agulu m’udong’ i ot pa Yehova man i ot p’ubimo mi Yuda, man i Yerusalem:

²²Jubiterogi i Babeli e gibibedo kuca, cil i ceng’ m’aliewogi ie, Yehova wacu; e abilund kelogi malu, e abidwokogi kakeni.