Read Alur Yeremia 28 Bible Online

Yeremia 28 - Alur bible

Yeremia 28

¹Man etimbre i rundi nino, i thekri mi camuker pa Zedekia m’ubimo mi Yuda, i rundi mir ang’wende, i dwi mir abije, nia Hanania ma wod Azur, ma jabila, ma en e mi Gibeon, eyero ira i ot pa Yehova, i vut julam man dhanu ceke, ewacu kumae,

²Yehova mir udul, Mungu mir Israel, uyero kumeni, ewacu kumae, Aturo mberembere p’ubimo mi Babeli.

³Ma fodi rundi ario yul kuthum ungo abikelo agulu ceke mi ot pa Yehova kendo kakeni ma Nebukadnezar m’ubimo mi Babeli yaku ku kakeni, m’etero de i Babeli:

⁴man abidwoko Yekonia ma wod Yehoiakim, m’ubimo mi Yuda, karacelo ku ng’eca mi Yuda, m’ucidho Babeli, Yehova wacu; kum abituro mberembere mir ubimo mi Babeli.

⁵E jabila ma Yeremia lund uwacu ni jabila ma Hanania i vut julam man i vut dhanu ceke m’ucungo i ot pa Yehova,

⁶en e jabila ma Yeremia ewacu kumae, Amen: Yehova tim kumeno; Yehova tim lembe peri m’iewo, m’edwok ko agulu mi ot pa Yehova kendo, man dhanu ceke mi ng’eca, kud i Babeli i kakeni.

⁷Ento kawono winj lembe maeni m’ayero i ithi, man i ith dhanu ceke:

⁸Jubila m’ular uwok ira man iri ma con giewo lembe kum ng’om dupa, man kum ker ma dit, mir ali, man mi lem ma rac, man mi thong’om.

⁹Jabila m’uewo pi kwiocwiny, kinde ma lembe pa jabila bitimbre, e jabilane bilund ng’eire, nia Yehova ore andha.

¹⁰Hanania ma jabila lund uting’o utwindi kud i ng’ut jabila ma Yeremia, man eture.

¹¹E Hanania yero i vut dhanu ceke, ewacu kumae, Yehova wacu kumae: Abituro mberembere pa Nebukadnezar m’ubimo mi Babeli kumeni ma fodi rundi ario yul kuthum ungo kud i ng’ut thek ceke. E jabila ma Yeremia cidho i yo pare.

¹²Lembe pa Yehova lund ubino ba Yeremia, yo ng’ei utwindi ma Hanania ma jabila turo kud i ng’ut Yeremia ma jabila, m’uwacu kumae,

¹³Cidhi, man iyer ni Hanania, wac kumae, Yehova wacu kumae: Ituro utwindi mi yen; ento itimo utwindi mi nyunyu ka kagi.

¹⁴Kum Yehova mir udul, Mungu mir Israel, uwacu kumae: Aketho mberembere mi nyunyu i ng’ut thek maeni ceke, kara gitim ni Nebukadnezar m’ubimo mi Babeli; e gibitimo ire: man amio ire yedi m’i thim bende.

¹⁵E jabila ma Yeremia lund uwacu ni Hanania ma jabila kumae, Kawono winji, Hanania: Yehova ori ngo; ento iketho dhanu maeni gigeno ndra.

¹⁶Ka kumeno Yehova wacu kumae, Nen, abiori cen kud i wang’ ng’om: i rundi maeni ibitho, kum iyero lemjai kum Yehova.

¹⁷Kum kumeno Hanania ma jabila tho i rundi nica i dwi mir abirone.