Read Alur Yeremia 29 Bible Online

Yeremia 29 - Alur bible

Yeremia 29

¹Nie maeni en e lembe mi waraga ma Yeremia ma jabila oro kud i Yerusalem ba dong’ judongo mi ng’eca, man ba julam, man ba jubila, man ba dhanu ceke, ma Nebukadnezar uyaku ni ng’eca kud i Yerusalem etero i Babeli

²(yo ng’ei ai ma Yekonia m’ubimo, man min ubimo, ku ju mugumba, ku judongomawijo mi Yuda ku Yerusalem, man jubodho, ku weg uka, giai ko kud i Yerusalem),

³ku cing Elasa ma wod Cafan, man Gemaria ma wod Hilkia (ma Zedekia m’ubimo mi Yuda oro i Babeli ba Nebukadnezar m’ubimo mi Babeli), m’uwacu kumae,

⁴Yehova mir udul, Mungu mir Israel, uwacu kumae ni ng’eca ceke, m’aketho juyaku ni ng’eca kud i Yerusalem ucidho Babeli:

⁵Wugom udi iwu, man wubed i igi; man wupidh pothi, wucam nyinge de.

⁶Wugam mon iwu, man wunyol nyithindho ma co ku nyithindho ma nyir; wugam mon de ni wotwu, man wumi nyigwu ni co, kara ginyol nyithindho ma co ku nyithindho ma nyir: man wumedru kuca, man kud wujwiki.

⁷Man wuyeny kwiocwiny mir adhura m’aketho jutero wu ni ng’eca ie, man wukwai Yehova pire; kum i kwiocwinyne wubibedo ku kwiocwiny.

⁸Kum Yehova mir udul, Mungu mir Israel, uwacu kumae: Kud wuyi jubila ma ni i kindwu, ku jung’eilembe mu, ubombwu; kadi lek mu ma wuleko de kud wuwinji.

⁹Kum giewo ku ndra iwu ku nyinga: aorogi ngo, Yehova wacu.

¹⁰Kum Yehova wacu kumae, Abiliewowu yo ng’ei rundi pier abiro mi Babeli m’utimbre kakare, e abitimo lembe para ma ber yor i beng’wu, ku ketho wudwog kakeni.

¹¹Kum ang’eyo pidoic m’aparu yor i beng’wu, Yehova wacu, pidoic mi kwiocwiny, man mi lem ma rac ungo, kara umi iwu genogen i kajik mu ma cen.

¹²E wubilwong’a, man wubicidho wubirwo ira de, e abiwinjowu.

¹³E wubiyenya, man wubinwang’a, kinde ma wuyenya kud adundewu ceke.

¹⁴E abinwangra iwu, Yehova wacu, man abiloko ng’eca mu kendo, e abicokowu kud i thek ceke, man kud i ka ceke m’ariemowu i ie, Yehova wacu; e abikelowu kendo i ka m’aketho juyakuwu i ie ni ng’eca.

¹⁵Kum wuwacu kumae, Yehova ting’o jubila iwa i Babeli;

¹⁶Yehova wacu kumae pir ubimo m’ubedo wi komker pa Daudi, man pi dhanu ceke m’ubedo i adhura maeni, en e utumegwu m’ucidho karacelo kudu i ng’eca ngo;

¹⁷Yehova mir udul uwacu kumae: Nen, abioro palamularu i kumgi, ku ndru, man thong’om e abidwokogi calu nyingubolo ma rac, ma jucopo camu ngo, ni racgi.

¹⁸Man abilubo tokgi ku palamularu, man ku ndru, man ku thong’om, e abimiogi kara juthorgi kun ku kun i kind thek ceke m’i ng’om, kara gibed m kwong’, man wang’uic man cac, kud acidi, i kind thek ceke m’ariemogi i ie;

¹⁹kum giwinjo dwanda ngo, Yehova wacu, m’aoro ko jutic para ma jubila i bang’gi m’aai ko piiaorogi de; ento wuyenyo ngo wuwinji, Yehova wacu.

²⁰Ka kumeno wuwinj lembe pa Yehova, wun ceke mi ng’eca, m’aoro cen kud i Yerusalem i Babeli.

²¹Yehova mir udul, Mungu mir Israel, uwacu kumae pir Ahab ma wod Kolaya, man pi Zedekia ma wod Maseya, m’uewo ndra iwu ku nyinga; Nen, abimiogi i cing’ Nebukadrezar m’ubimo mi Babeli; e ebinegogi i weng’wu;

²²man ng’eca ceke mi Yuda ma ni i Babeli gibiweco pigi ku kwong’, gibiwacu kumae, Yehova dwoki calu Zedekia man calu Ahab m’ubimo mi Babeli thologi ku mac;

²³kum gitimo kasegu i Israel, man gidubri swa ku mon mi juwagi, man giyero lembe ku ndra ku nyinga, m’ang’olo igi ngo; e an a ng’atu m’ung’eyo, man an a jamulembe, Yehova wacu.

²⁴Man pi Cemaya ma Janehelami, ibiyero, ibiwacu kumae,

²⁵Yehova mir udul, Mungu mir Israel, uwacu kumae, Kum ioro waraga ku nyingi giri ni dhanu ceke ma ni i Yerusalem, man ni Zefania ma wod Maseya, ma jalam, man ni julam ceke, m’iwacu kumae,

²⁶Yehova dwoki ni jalam i ka Yehoiada ma jalam, kara jego bed nuti i ot pa Yehova, kum ku ba dhanu ceke ng’atu ma abelu make, man m’udwokre gire ni jabila, kara ikethe i kol man i gwang’ mi twic.

²⁷Ka kumeno kawono, nedi ijuko Yeremia ma Anathoth ungo m’edwokre gire ni jabila iwu,

²⁸kum eoro lembe i bang’wa i Babeli, ewacu kumae, Ng’eca e bor: kum kumeno wugom udi, man wubed i igi; man wupidh pothi, man wucam nyinge?

²⁹E Zefania ma jalam usomo waraga maeni i ith Yeremia ma jabila.

³⁰E lembe pa Yehova lund ubino ba Yeremia, m’uwacu kumae,

³¹Or lembe ba dhanu ceke mi ng’eca, wac kumae, Yehova wacu kumae pi Cemaya ma Janehelami: Kum Cemaya ewo lembe iwu, ma k’aore ngo, man eketho wugeno lemndra;

³²ka kumeno Yehova wacu kumae, Nen, abisendo Cemaya ma Janehelami, ku kodhine; ebibedo ku ng’atu ma nico ngo ma bibedo i kind dhanu maeni, kadok lem ma ber, m’abitimo ni dhanu para de ebineno ngo, Yehova wacu, kum eyero lem jai kum Yehova.