Read Alur Yeremia 3 Bible Online

Yeremia 3 - Alur bible

Yeremia 3

¹Giwacu kumae, Tek ng’atu moko eoro dhaku pare cen, man eai i bang’e, edoko pa ng’atu mange de, ebidwogo ba dhakune kendo? ng’om maeno bicido dit ungo? Ento itimo tarwang’ ku jumer dupa; kadok kumeni dwog i bang’a asu, Yehova wacu.

²Ng’ai weng’i malu i ka m’utingre ma lelele, man inen; kani ma jukuvuto kudi i ie ngo? Ibedo pigi dhu yo, calu Jaarabi i langa; man icido ng’om kud asara peri man ku dubo peri.

³Ka kumeno jucero koth ma core man koth ma cen umbe; ento ibedo ku nyimwang’ pa won asara, ikwero lewic kud unegi.

⁴Ugambre i nindo maeni ibiywak i bang’a ngo kumae, Vwa, in i jatelwi aradu para?

⁵Ebicero ng’ecwiny pare mi nja? ebigwoke cil i kajikne? Nen, iyero man itimo gin ma rac, man itimo yeny ma ii yenyo.

⁶Man ke Yehova wacu ira kumae i nindo pa Yosia m’ubimo, Ineno gin ma Israel m’ucoro cen utimo? eidho malu wi gudi ma wiu kubang’e kubang’e man the yen m’udinyo kubang’e kubang’e, man etimo tarwang’ keca.

⁷Man awacu yo ng’ei gin maeni ceke m’etimo kumae, Ebidwogo i bang’a; ento edwogo ngo: man Yuda ma nyamin ma jabombi neno maeni.

⁸Man aneno, kinde m’akethe cen man amio ire waraga mi riem pi lembe maeni nini, Israel m’ucoro cen udubre swa, ento Yuda ma nyamin de ma jabombi lworo nege ngo; ento en bende ecidho etimo tarwang’.

⁹Man etimbre ni kum yot mir asara pare, ya ng’om ucido, man edubre swa ku kidi man ku dundyen.

¹⁰Man kadok maeni ceke bedo nuti Yuda ma nyamin ma jabombi dwogo i bang’a ngo ku cwinye ceke, ento kud abombi, Yehova wacu.

¹¹E Yehova wacu ira kumae, Israel m’ucoro cen unyuthre gire pwe ma sagu Yuda ma jabombi.

¹²Cidhi, man iyer lembe maeni yor ariwa ma malu, man iwac kumae, Dwogi, in i Israel m’ucoro cen, Yehova wacu; abineno wii ku ng’ecwiny ungo; kum kisa nega, Yehova wacu, abigwoko ng’ecwiny mi nja ngo.

¹³Ndhu tuc kier peri, m’idubo ko ni Yehova Mungu peri, man ilalu yo peri ba juwirok the yen m’udinyo kubang’e kubang’e, man wuworo dwanda ngo, Yehova wacu.

¹⁴Wudwogi, E nyithindho m’ucoro cen, Yehova wacu; kum an a nico iwu: man abigamuwu acel mir adhura, man juario mi juot, e abikelowu i Sayuni.

¹⁵Man abimio iwu jukwac calku cwinya, ma bikakuwu ku ng’eyong’ec man ng’eyo thelembe.

¹⁶Man ebitimbre, kinde ma wumedru man wunyai i ng’om, i nindo maeca, Yehova wacu, gibiwacu kendo ngo kumae, Sanduk mi lembariba pa Yehova; kadok ebiwok i pidoic de ngo; kadok pire de gibipoi ungo; kadok cande de binegogi ngo; kadok atima de jubitime kendo ngo.

¹⁷I nindo maeca gibilwong’o Yerusalem komker pa Yehova; man thek ceke bicokre i bang’e, ba nying’ Yehova, i Yerusalem: kadok gibiwotho kendo de ngo tok udhuko mir adundegi ma rac.

¹⁸I ceng’ maeca ot pa Yuda biwotho karacelo ku ot mir Israel, man gibiai karacelo kud i ng’om ma yor ariwa ma malu ba ng’om m’amio ni aba ni kwaruwu.

¹⁹Ento awacu kumae, Abikethi nenedi i kind nyithindho, m’ami ko iri ng’om ma ber, aba ma ber mir udul mi thek mire! man awacu kumae, Wubilwong’a Vwa, man wubilokru cen kum luba ngo.

²⁰Andha calu dhaku ai kud abombi ba nico pare, e wutimo kud abombi ira kumeca, E ot mir Israel, Yehova wacu.

²¹Juwinjo dwal wi ka m’utingre ma lelele, en e ywak ku kwayukwac mi nyithindho mir Israel; kum gigondo yo migi, wigi wil kum Yehova Mungu migi.

²²Wulokru, wu nyithindho m’ucoro cen, abicangu corocen mu. Nen, wabino i beng’i; kum in i Yehova Mungu mwa.

²³Andha kony ma jukio bang’ ungulu gudi en e mananu, udul kwa kwa ma wi gudi: andha both mir Israel en e ni kum Yehova Mungu mwa.

²⁴Ento gin mi lewic ucamu tic mi muli pa kwaruwa ugambre i aradu mwa, udul rombe migi man dhok migi, wotgi man nyiggi.

²⁵Wek wavut piny i lewic mwa, man wek ang’abacwiny mwa umwa; kum wadubo ni Yehova Mungu mwa, wan ku kwaruwa, ugambre i aradu mwa, cil i ceng’ ma tin; man waworo dwand Yehova Mungu mwa ngo.