Read Alur Yeremia 30 Bible Online

Yeremia 30 - Alur bible

Yeremia 30

¹Lembe m’uai ba Yehova bino ba Yeremia, m’uwacu kumae,

²Yehova, Mungu mir Israel, uyero kumeni, ewacu kumae, Kieu lembe ceke m’ayero iri i kitabu.

³Kum, nen, nindo bino, Yehova wacu, m’abiloko ie ng’eca mi dhanu para kendo mir Israel ku Yuda, Yehova wacu; e abiketho gidwogo ba ng’om m’amio ni kwarugi e gibimwonye.

⁴Man maeni en e lembe ma Yehova yero pir Israel man pi Yuda.

⁵Kum Yehova wacu kumae: Wawinjo dwal mi mielkum, man mi lworo, mi kwiocwiny de ngo.

⁶Wupeni kawono, man wunen tek ng’atu ma nico sendre ku nyodo: pirang’o aneno dhanu ma co kubang’gi kubang’gi ng’atuman cinge ni i piere, calu dhaku m’ebesendre, man wang’ ceke lokre?

⁷Akayo! kum ceng’ maeca e dit, ketho nia moko mbe ma calu en: en e nindo mi sendri pa Yakobo; ento ebiboth kud i ie.

⁸Man ebitimbre i ceng’ maeca, Yehova mir udul uwacu, nia abituro mberembere pare kud i ng’ute, man abicodo twic peri; e juwirok bidwoke ni ng’eca migi kendo ngo;

⁹ento gibitimo ni Yehova Mungu migi, man ni Daudi m’ubimo migi, m’abiting’o malu igi.

¹⁰Ka kumeno kud ilwor, E Yakobo ma jatic para, Yehova wacu; kadok cwinyi de kud ung’abre, E Israel: kum, nen, abibodhi ku bor, man kodhini kud i ng’om mi ng’eca migi; e Yakobo bidwogo, man ebibedo museme man yo, man ng’atu moko mbe ma binyayu lworo i ie.

¹¹Kum wanuti wakudi, Yehova wacu, mi bodhi: kum abijigo wi thek ceke m’aleli i ie, ento abijigo wii ma gwei ungo; ento abiponji ku pokolembe, man abiweki ki ngo ma ponji mbe.

¹²Kum Yehova wacu kumae, Rem peri cangre ngo, man lero peri dit.

¹³Ng’atu moko mbe m’ucung kum lembe peri, kara jutwi wang’ rem peri: yath ma cangu kum umbe kudi.

¹⁴Jumer peri ceke wigi wil i kumi; giyenyi ngo: kum atong’o lero i kumi ku lero pa jadegi, ku ponji pa ng’atu ma kisa mbe kude, kum dit mi kier peri, kum dubo peri nyai.

¹⁵Nedi iywak kum rem peri? remokum peri kwio ngo: atimo gin maeni i kumi kum dit mi kier peri, kum dubo peri nyai.

¹⁶Ka kumeno dhanu ceke m’ucemi jubicamugi; man jusend peri ceke, kubang’gi kubang’gi, gibicidho i ng’eca; man ju m’uyeki bidoko ni ayeki, man dhanu ceke m’umei abimiogi ni amaci.

¹⁷Kum abidwoko leng’kum iri, man abicangu lero peri, Yehova wacu; kum gilwong’i ng’atu ma jubayu, giwacu kumae, En e Sayuni, ma ng’atu moko mbe m’uyenyo.

¹⁸Yehova wacu kumae: Nen, abiloko ng’eca mi hema pa Yakobo kendo, man ngisi binega kum kabedo pare; e jubigomo adhura wi ungulu gudi pare ma dhe, man jubibedo i odker calu kura pare ma dhe.

¹⁹Man foyofoc biai i bang’gi ku dwand ju m’utimo mutoro: e abimedogi, man gibibedo nok ungo; abiyungogi bende, e gibibedo nweng’ ungo.

²⁰Nyithindho migi bende bibedo calu ma kwong’a, man udul migi bicungo i wang’a; man abisendo dhanu ceke m’usendogi.

²¹Man jaditmawijo migi bibedo ng’atu m’i kindgi, man jabim migi biai i kindgi; e abiketho ecoro ceng’ni, man ebibino i bang’a: kum ng’a ma tegocwiny ni kude m’ebino ko i bang’a? Yehova wacu.

²²E wubibedo dhanu para, man abibedo Mungu mu.

²³Nen, wavuvu pa Yehova, en e kwinyo pare, ewok woko, wavuvu m’uwinjre: ebing’eny i wi judubo.

²⁴Ng’ecwiny pa Yehova ma lake tek bidwogo ngo, maram etimo ko, man maram edaru ko lembakeca mir adundene: i nindo ma cen wubing’eyo maeni.