Read Alur Yeremia 31 Bible Online

Yeremia 31 - Alur bible

Yeremia 31

¹I nindo maeca, Yehova wacu, abibedo Mungu mi wat ceke mir Israel, man gibibedo dhanu para.

²Yehova wacu kumae, Dhanu m’udong’ ni palamularu ginwang’u bero i langa; en e Israel, kinde m’acidho kara aketh eyom.

³Yehova wok i bang’a con, ewacu kumae, Eyo, ameri ku mer mi nja: ka kumeno apei ku mer mi bero.

⁴Abigomi kendo, e ibigombri, E nyaku ma sumba mir Israel: ibibedo aruka ku jambruko peri kendo, man ibiwok woko i miel mi ju m’utimo mutoro.

⁵E ibipidho podho mir ulok wi gudi mi Samaria kendo; jupidh bipidho, e anyong’a binegogi kum nyinge.

⁶Kum ceng’ bibedo nuti, ma jukur bikok ie kumae wi ungulu gudi pa Efraim: Wuai, man wek waidhu Sayuni ba Yehova Mungu mwa.

⁷Kum Yehova wacu kumae, Wuwer ku mutoro pi Yakobo, man wukok pi jadit mi thek: wurwei lembe, wupak pak, man wuwac kumae, E Yehova, bodh dhanu peri, ma dong Israel.

⁸Nen, abigamugi kud i ng’om ma yor ariwa ma malu, man abicokogi kud i ng’et ng’om ma wi tung’, man karacelo kugi ju ma abinga ku weg abala, dhaku ma ku nyathin man dhaku ma ku remokum mi nyodo gikude: udul ma dit gibidwogo keni.

⁹Gibibino ku ywak; man abitelo wigi ku kwac: abiketho giwotho ng’et kulo ma dit mi pi, i yo m’atira ma gibikier i ie ngo; kum an a Wego ni Israel, man Efraim en e kayu para.

¹⁰Wuwinj lembe pa Yehova, E wu thek, man wuyer maeni i cula ma bor; man wuwac kumae, Ng’atu m’ulalu Israel bicoke, ebigwoke de, calu jakwac gwoko udul rombe pare.

¹¹Kum Yehova waru Yakobo, man eware kud i cing’ ng’atu ma sage ku tego.

¹²E gibibino man gibiwero wer i ka m’utingre mi Sayuni, man gibimol ba bero pa Yehova, ba cam, man ba pigulok ma nyasa, man ba mo, man ba nyithindh udul rombe ku mi dhok: e ng’eyong’ec migi bibedo calu podho ma jukwoyo pi i wie; e can binegogi kendo ki ngo.

¹³E anyong’a bilund nego nyaku ma sumba i miel, kud awobi man judongo karacelo; kum abiloko ywak migi ni mutoro, man abijukogi, man abiketho anyong’a negogi ni can migi.

¹⁴Man abiyeng’o ng’eyong’ec mi julam ku mio, e cwiny dhanu para bikwio ku bero para, Yehova wacu.

¹⁵Yehova wacu kumae: Dwal uwinjre i Rama, goyonduru, ku ywak mi can, Rahel m’ubeywak pi nyithindho pare: ekwero juk pi nyithindho pare, kum gimbe.

¹⁶Yehova wacu kumae; Cer dwendi ni ywak, man weng’i ni piwang’; kum jubimio sukulia kum tic peri, Yehova wacu; e gibidwogo kendo kud i ng’om pa jadegi.

¹⁷Man genogen nuti pi kajik peri ma cen, Yehova wacu; man nyithindho peri bidwogo kendo ba kieu migi ma dhe.

¹⁸Awinjo Efraim ubeywagre gire kumae andha, Iponja, e abedo ma juponja, calu nyathi dhiang’ m’ung’io ku mberembere ngo: loka, e abibedo ma juloka; kum in i Yehova Mungu para.

¹⁹Andha yo ng’ei lok ma juloka ko, aloko cwinya; man yo ng’ei ponji ma juponja ko, agoyo bamba; lewic unega, eyo, cwinya ng’abre, kum ayeyo cac mir aradu para.

²⁰Efraim en e woda ma ka cwinya? en e nyathin mi meri? kum ku ba wec m’aweco i kume, acikupoi pire apoya: ka kumeno adundena ywage: kisa binega i kume andha, Yehova wacu.

²¹Ting’ giranyutha iri, tim iri mbegi mi giranyutha; keth adundeni yo ba gengi, en e yo m’icidho i ie: lokri kendo, E nyaku ma sumba mir Israel, lokri kendo bang’ adhura peri maeni.

²²Ibicidho kun ku kun rokani, E nyaku m’ucoro ceni? kum Yehova cwio gin ma nyen i ng’om: Dhaku bitieko nico.

²³Yehova mir udul, Mungu mir Israel uwacu kumae, Gibiweco wec maeni i ng’om mi Yuda man i adhurane, kinde m’adwoko ng’eca migi kendo; Yehova mi mugisa iri, E kabedo mi bedopwe, E gudi mi leng’cwiny.

²⁴E Yuda kud adhurane ceke bibedo i ie karacelo, jutipodho, ku ju m’uwotho kud udul rombe.

²⁵Kum ayeng’o ng’eyong’ec m’uol, man adwoko ng’eyong’ec mi can kubang’e kubang’e.

²⁶Yo ng’ei maeni aceu, man aneno; e nindo para bedo mit ira.

²⁷Nen, nindo bino, Yehova wacu, nia abicoyo ot mir Israel ku ot mi Yuda ku kodhi mi dhanu, man ku kodhi mi yedi.

²⁸Man ebitimbre nia, calu akuro wigi kara afudhgi woko man kara arwombgi man kara ang’ielgi man kara anyothgi man kara asendgi, abikuro wigi kumeca kara agomgi man kara apidhgi, Yehova wacu.

²⁹I ceng’ maeca gibiwacu kendo ngo kumae, Wego camu nyingulok ma wac, man lak nyithindho tho nding’.

³⁰Ento ku ba dhanu ku ba dhanu ng’atuman bitho kum kier pare gire: ku ba dhanu ku ba dhanu ma camu nyingulok ma wac, lake bitho nding’.

³¹ Nen, ceng’ ubino, Yehova wacu, nia abitimo lembariba ma nyen ku ot mir Israel, man ku ot mi Yuda:

³²calku lembariba m’atimo ku kwarugi ngo i ceng’ m’agamugi ie ku cing’ kara awodhgi woko kud i ng’om Misiri; ma lembaribane gituro, kadok an a nico migi, Yehova wacu.

³³Ento maeni lembariba m’abitimo ku ot mir Israel yo ng’ei ceng’ maeca, Yehova wacu: Abiketho cik para i igi, man abikiewe i adundegi; man abibedo Mungu migi, e gibibedo dhanu para.

³⁴Man ku ba dhanu ku ba dhanu ng’atuman biponjo wagi kendo ngo, man ku ba dhanu ku ba dhanu ng’atuman biponjo umin ungo, ma nia giwac kumae, Ng’ei Yehova; kum gin ceke gibing’eya, ugambre kum ma nok m’i kindgi cil kum ma dit m’i kindgi, Yehova wacu: kum abiweko kier migi, man abipoi kendo ngo pi dubo migi.

³⁵Yehova, m’umio ceng’ ni der ku dieceng’, man lembapoka mi dwi man mi cero ni der ma ku diewor, m’utugo nam, ketho nia mukurane woi; nyinge Yehova mir udul: uwacu kumae,

³⁶Tek lembapoka maeni ai kud i wang’a, Yehova wacu, e kodhi mir Israel bende bidong’ bedo thek ungo i wang’a mi nja.

³⁷Yehova wacu kumae: Tek jucopo poro polo ma malu, man jucopo yenyo theng’om ma yo piny, e an bende abibayu kodhi ceke mir Israel kum gin ceke ma gitimo, Yehova wacu.

³⁸Nen, ceng’ ubino, Yehova wacu, nia jubigomo adhura ni Yehova gambre kum ot ma wiu mi Hananel cil kum dhugang’ mi gui.

³⁹E thol mi por bicidho atira asu cil kum ungulu got ma Gareb, man ebilokre cen kum Goa.

⁴⁰Man poga ceke mir avu man mi vuru, ku pothi ceke cil kum kulo Kidron, cil kum gui mi dhugang’ mi riuni ma yo nyangu, bibedo leng’ ni Yehova; jubifudhe ngo, kadi jubiredhe kendo de ngo mi nja.