Read Alur Yeremia 32 Bible Online

Yeremia 32 - Alur bible

Yeremia 32

¹Lembe m’uai ba Yehova ubino ba Yeremia i rundi mir apaje mi camuker pa Zedekia m’ubimo mi Yuda, ma en e rundi apar wi aborane mi camuker pa Nebukadrezar.

²Nie i nindo maeca njuru asikari p’ubimo mi Babeli betieko Yerusalem kud ali; e juciko ba Yeremia ma jabila i lelagang’ mi jukur, ma ni i ot p’ubimo mi Yuda.

³Kum Zedekia m’ubimo mi Yuda ciko bang’e, m’ewacu kumae, Pirang’o iewo lembe, m’iwacu ko kumae, Yehova wacu kumae, Nen, abimio adhura maeni i cing ubimo mi Babeli, man ebimake;

⁴man Zedekia m’ubimo mi Yuda biboth ungo i cing’ Jukaldayo, ento jubimie andha i cing ubimo mi Babeli, man gibiweco kude dhok ku dhok, man wang’e bineno wang’e;

⁵man ebitero Zedekia i Babeli, man ebibedo kuca maram abiliewe ko, Yehova wacu: kadok wukiedo ku Jukaldayo, lembe mu bibedo miero ngo?

⁶E Yeremia wacu kumae, Lembe pa Yehova bino i bang’a, m’uwacu kumae,

⁷Nen, Hanamel ma wod Calum ma neru bibino i beng’i, m’ebiwacu kumae, Ng’ieu podho para ma ni i Anathoth; kum ng’ol mi war en e peri m’ing’iewe ko.

⁸Kum kumeno Hanamel ma wod nera bino i bang’a i lelagang’ mi jukur calku lembe pa Yehova, man ewacu ira kumae, Ng’ieu podho para, akwei, ma ni i Anathoth, ma ni i ng’om Benyamin; kum ng’ol m’ibedo kude en e peri, man war en e peri; ng’iewe iri giri. Alund ang’eyo nia maeni en e lembe pa Yehova.

⁹E ang’iewo podho ma ni i Anathoth ba wod nera ma Hanamel, man aporo ire sente, en e cekel mi mola ma tar apar wi abiro.

¹⁰Man akiewo nyinga kum waraga mi ng’ieune, amwone de kud ayi, man alwong’o jumulembe, e aporo ire sente i jampor.

¹¹Kum kumeni agamu waraga mi ng’ieune, ma jumwono, calku cik ku kura, man maeno m’ubedo ayaba bende:

¹²man amio waraga mi ng’ieune ba Baruc ma wod Neria, ma wod Maseya, i vut Hanamel ma wod nera, man i vut jumulembe m’ukiewo nying’gi kum waraga mi ng’ieune, i vut Juyahudi ceke m’ubedo i lelagang’ mi jukur.

¹³Man ang’olo ni Baruc i wang’gi, awacu kumae,

¹⁴Yehova mir udul, Mungu mir Israel, uwacu kumae: Gam waraga mi ng’ieu maeni, waraga maeni mi ng’ieu ma jumwono, ku waraga maeni m’ubedo ayaba, man ikethgi i agulu mir ulobo; kara gibed asu nindo dupa.

¹⁵Kum Yehova mir udul, Mungu mir Israel, uwacu kumae: Udi ku pothi man pothi mir ulok jubing’iewo kendo i ng’om maeni.

¹⁶Nie yo ng’ei waraga mi ng’ieu m’amio ni Baruc ma wod Neria, arwo ni Yehova, awacu kumae,

¹⁷A Rwoth Yehova! nen, icwio polo ku ng’om ku tego peri ma dit man ku boti m’arieya; gin moko mbe ma tek ma segi,

¹⁸m’inyutho mer mi bero ni dhanu rubanga, man m’iculo kier mi wego i kor nyithindhgi yo ng’eigi; Mungu ma dwong’, ma Jatego, nyingi Yehova mir udul;

¹⁹dit i porolembe, man tek i tic; ma weng’i bedo ayaba wi yo ceke mi wot dhanu, kara imi ni dhanu ceke kubang’gi kubang’gi ng’atuman calku yo pare, man calku nying’ giratima pare;

²⁰m’eketho giranyutha ku musana i ng’om Misiri, cil i ceng’ maeni, i Israel man i kind dhanu mange bende; man itimo iri nying’, calu i ceng’ maeni;

²¹man i wodho dhanu peri Israel kud i ng’om Misiri ku giranyutha, man ku musana, man ku cing’ ma tek, ku bot m’arieya de, man ku ndiri ma dit;

²²e imio ng’om maeni igi, m’ikwong’o ni kwarugi ya imi igi, ng’om ma molo cak ku kic;

²³e gimondo, man gibedo i ie; ento giworo dwendi ngo, kadok i cik peri de giwotho ngo; gitimo gin moko ngo mi gin ceke m’ing’olo igi ya gitim: ka kumeno iketho lem ma rac maeni ceke wok i kumgi.

²⁴Nen, ng’om ma judhuro, gibino bang’ adhura kara gimake; e jumio adhurane i cing’ Jukaldayo m’ukiedo i kume, kum palamularu, man mi ndru, man mi thong’om; e gin m’iyero timbre kakare; man, nen, ineno maeni.

²⁵Man iwacu ira kumae, E Rwoth Yehova, Ng’ieu podho iri ku sente, man ilwong’ jumulembe; ento jumio adhurane i cing’ Jukaldayo.

²⁶Lembe pa Yehova lund ubino ba Yeremia, m’uwacu kumae,

²⁷Nen, an a Yehova, Mungu mi weg kum ceke: gin moko nuti ma tek ma voya?

²⁸Ka kumeno Yehova wacu kumae: Nen, abimio adhura maeni i cing’ Jukaldayo, man i cing’ Nebukadrezar m’ubimo mi Babeli e ebimake:

²⁹man Jukaldayo, m’ukiedo kum adhura maeni, gibibino man gibicwinyo adhura maeni ku mac, man gibiwang’e, karacelo ku udi ma githiero udok ma ng’wice ng’ar ni Bal i wie, man ma gikonjo lam m’amadha ni mungu mange i wie, kara unyai ng’ecwiny i ia.

³⁰Kum nyithindho mir Israel ku nyithindho mi Yuda gitimo gin ma rac kwa i wang’a ugambre i aradu migi; kum nyithindho mir Israel ginyayu ng’ecwiny kwa i ia ku tic m’i cing’gi, Yehova wacu.

³¹Kum adhura maeni bedo ira ni gin ma nyayu ng’ecwiny para man kwinyo para gambre i ceng’ ma gigome cil i ceng’ ma tin; kara akabe kud i nyim wang’a,

³²kum ma rac ceke mi nyithindho mir Israel man mi nyithindho pa Yuda, ma gitimo kara ginyai ko ng’ecwiny i ia, gin, kud ubimo migi, man judongomawijo migi, ku julam migi, man jubila migi, ku dhanu mi Yuda, man ju m’ubedo i Yerusalem.

³³E giloko ira ng’ec, wang’ re ngo: man kadok aponjogi, m’aai ko pir aponjogi de, ento giciko ithgi ngo kara gijol ponji.

³⁴Ento giketho ginmajudagu migi i ot m’ulwongre ku nyinga, kara ucide.

³⁵Man gigomo ka ma malu pa Bal, ma ni i poga pa wod Hinom, kara uketh wotgi ku nyiggi kadh kud i mac ba Molek; m’ang’olo igi ngo, kadi emondo i pidoic para de ngo, ma nia gitim ginmajudagu maeni, kara uketh Yuda dubi.

³⁶Ka kumeno kawono Yehova, Mungu mir Israel, wacu kumae pir adhura maeni, ma wuwacu pire kumae, Jumie i cing ubimo mi Babeli ku palamularu, man ku ndru, man ku thong’om:

³⁷Nen, abicokogi kud i ng’om ceke, m’ariemogi i ie ku ng’ecwiny para, man ku kwinyo para, man ku thungo ma dit; e abikelogi kendo kakeni, man abiketho gibedo museme.

³⁸Man gibibedo dhanu para, man abibedo Mungu migi:

³⁹man abimio igi adunde acel ku yo acel, kara gilwora mi nja, ni bero igi, man ni nyithindhgi yo ng’eigi:

⁴⁰man abitimo lembariba mi nja kugi, nia abilokra cen ungo ku lubogi, m’atim kogi ber; man abiketho lworo para i adundegi, kara ku giweka.

⁴¹Eyo, anyong’a binega i kumgi ya atimgi ber, e abipidhogi i ng’om maeni kud adundena ceke man ku ng’eyong’ec para ceke.

⁴²Kum Yehova wacu kumae: Calu akelo lem ma rac ma dit maeni ceke wi dhanu maeni, abikelo bero ceke m’ang’olo igi kumeca i kumgi.

⁴³E jubing’iewo pothi i ng’om maeni, ma wuwacu pire kumae, En e uvuru, ma dhanu kadi yedi de mbe i ie; jumie i cing’ Jukaldayo.

⁴⁴Dhanu bing’iewo pothi ku sente, man gibigoro nying’gi kum waraga mi ng’ieu, gibimwonogi de kud ayi, gibilwong’o jumulembe de, i ng’om Benyamin, man i ka Yerusalem gbur, man i adhura mi Yuda, ku i adhura mi ng’om gudi, man i adhura mi poga, man i adhura ma yor ariwa ma piny: kum abiketho ng’eca migi dwogi, Yehova wacu.