Read Alur Yeremia 33 Bible Online

Yeremia 33 - Alur bible

Yeremia 33

¹Mange ke lembe pa Yehova bino ba Yeremia wang’ arionde, kinde ma fodi juciko bang’e i lelagang’ roi jukur, m’uwacu kumae,

²Yehova m’utimo maeni wacu kumae, Yehova m’ung’ine kara eketh ecungi; nyinge Yehova:

³Lwong’a, e abiloko iri lembe, man abinyutho iri gin ma dit, man ma tek, m’ing’eyo ngo.

⁴Kum Yehova, Mungu mir Israel, uwacu kumae pi udi mir adhura maeni, man pi udi mi ju m’ubimo mi Yuda, ma jurwombo mi jamgwok kum gin ma judhuro mir ali man kum palamularu;

⁵kinde ma dhanu bino kiedo ku Jukaldayo, man kara gipong’gi kud avu dhanu, m’anego i ng’ecwiny para man i kwinyo para, man pi dhanu ceke m’apanu wang’a ni adhura maeni pi dubo migi:

⁶Nen, abikelo leng’kum man cang i bang’e, e abicangugi; man abinyutho igi dit mi kwiocwiny ku lemandha.

⁷Man abiketho ng’eca mi Yuda ku ng’eca mir Israel udwogo, man abigomogi, calu ma kwong’a.

⁸Man abilwokogi ni kier migi ceke, ma gidubo ko ira; man abiweko kier migi ceke, ma gidubo ko ira, man ma gigondri ko ira.

⁹E adhura maeni bibedo ira ni nying’ mi mutoro, ni pak man ni dwong’, i wang’ thek ceke m’i ng’om, ma biwinjo bero ceke m’atimo igi, man ma lworo binegogi, kumgi de bimiel kum bero ceke man kum kwiocwiny ceke m’aketho uwok ire.

¹⁰Yehova wacu kumae: I ka maeni, ma wuwacu pire kumae, En e uvuru, m’umbe dhanu man m’umbe lim, cil i adhura mi Yuda, man i gengi mi Yerusalem, ma gin uvuru, ma dhanu mbe ju m’ubedo i ie de mbe lim de mbe,

¹¹dwal mi mutoro ku dwal mir anyong’a biwinjre kendo, man dwand won ambadha ku dwand mugole, dwand ju m’uwacu kumae, Wumi foc ni Yehova mir udul, kum Yehova e ber, kum mer mi bero pare bedo mi nja; man mi ju m’ukelo lam mi foyofoc i ot pa Yehova. Kum abiketho ng’eca m’i ng’ombe dwogo calu ma kwong’a, Yehova wacu.

¹²Yehova mir udul uwacu kumae: Fodi kabedo mi jukwac ma giketho udul rombe migi vuto piny i ie bibedo nuti kakeni kendo, ma en e uvuru, ma dhanu mbe i ie yedi de mbe, man i adhurane ceke.

¹³I adhura mi ng’om gudi, i adhura mi poga, man i adhura ma yor ariwa ma piny, man i ng’om Benyamin, man i ka Yerusalem gbur, man i adhura mi Yuda, udul rombe bikadhu kendo the cing’ ng’atu m’ukwanu welgi, Yehova wacu.

¹⁴Nen, ceng’ ubino, Yehova wacu, nia abitimo lembe ma ber maeni m’ayero pi ot mir Israel man pi ot mi Yuda.

¹⁵I ceng’ maeca, man i nindo maeca, abiketho Jang mi bedopwe dongo ni Daudi; man ebitimo pokolembe ku bedopwe i ng’om.

¹⁶I nindo maeca Yuda biboth, man Yerusalem bibedo museme; man maeni nying’ m’ebilwongre ko: Yehova, ma bedopwe mwa.

¹⁷Kum Yehova wacu kumae: Dhanu m’ujany wi komker mi ot mir Israel birem ni Daudi ki ngo;

¹⁸kadok julam ma Julawi de dhanu birem igi ngo i wang’a m’uthier lam m’awang’a, man m’uwang’ lam mi mogo, man m’utim lam thiri thiri.

¹⁹E lembe pa Yehova bino ba Yeremia, m’uwacu kumae,

²⁰Yehova wacu kumae: Tek wucopo turo lembariba para mi dieceng’, ku lembariba para mi diewor, ketho nia dieceng’ ku diewor gibed umbe i nindo migi,

²¹e lembariba para bende ma ku Daudi ma jatic para copo tur, nia ebibedo ku wode ngo m’ucam ker wi komker pare; man ma ku Julawi ma julam, ma gi jutim para.

²²Calu udul m’i polo copo kwandre ngo, kadok kwio m’i nam de pore ngo; e abimedo kodhi pa Daudi ma jatic para, man Julawi m’utimo ira kumeca.

²³E lembe pa Yehova bino ba Yeremia, m’uwacu kumae,

²⁴Iparu ngo pi gin ma dhanu maeni yero, ma giwacu kumae, Wat ario ma Yehova goyo wigi, ebayugi ceni? e gicayu dhanu para kumeno, kara ku gibed thek kendo i wang’gi.

²⁵Yehova wacu kumae: Tek lembariba para mi dieceng’ ku diewor ucungo ngo, tek aketho lembapoka m’i polo ku ng’om ungo;

²⁶e abibayu kodhi Yakobo, man pa Daudi ma jatic para bende, ketho nia abigamu kodhine ngo ubed ni ubimo wi kodhi Ibrahim, kud Isak, man Yakobo: kum abiketho ng’eca migi dwogo, man kisa binega i kumgi.