Read Alur Yeremia 34 Bible Online

Yeremia 34 - Alur bible

Yeremia 34

¹Lembe m’uai ba Yehova ubino ba Yeremia, kinde ma Nebukadnezar m’ubimo mi Babeli, ku njuru asikari pare ceke, ku thek ceke m’i ng’om ma ni the bim pare, ku kodhidhanu ceke, ubekiedo kum Yerusalem, man kum adhurane ceke, uwacu kumae:

²Yehova, Mungu mir Israel, uwacu kumae, Cidhi, man iyer ni Zedekia m’ubimo mi Yuda, man iwac ire kumae, Yehova wacu kumae, Nen, abimio adhura maeni i cing ubimo mi Babeli, man ebiwang’e ku mac:

³e ibiboth ungo kud i cinge, ento jubimeki andha, man jubimii i cinge; e weng’i bineno wang’ ubimo mi Babeli, man wubiweco wukude dhok ku dhok, e ibicidho Babeli.

⁴Ento winj lembe pa Yehova, E Zedekia m’ubimo mi Yuda: Yehova wacu kumae piri, Ibitho ku palamularu ngo;

⁵ibitho i kwiocwiny; man ku wang’upiny pa kwaru, ubimo ma kwong’a m’ular uwok iri, gibitimo wang’upiny iri kumeca; e gibiywegi, ma giwacu kumae, A Rwoth! kum ayero lembe, Yehova wacu.

⁶Yeremia ma jabila lund uyero lem maeni ceke ni Zedekia m’ubimo mi Yuda i Yerusalem,

⁷kinde ma njuru asikari p’ubimo mi Babeli bekiedo, kum Yerusalem, man kum adhura ceke mi Yuda m’udong’, kum Lakic man kum Azeka; kum maeni kende m’udong’ mir adhura mi Yuda calu adhura ma judwoko tek.

⁸Lembe m’uai ba Yehova ubino ba Yeremia, yo ng’ei lembariba m’ubimo ma Zedekia timo ku dhanu ceke ma ni i Yerusalem, kara juyer igi pi gony;

⁹nia ku ba dhanu ku ba dhanu ng’atuman uwek jamiru pare, man ku ba dhanu ku ba dhanu ng’atuman uwek bong’ pare ma en e Jaebrania kadi Nyaebrania, ugonjre; nia ng’atu moko kud udwokgi ni ng’eca, thelembene, nia ng’atu ma Jayahudi kud uketh umin mire bed ng’eca.

¹⁰E judongomawijo ceke man dhanu ceke giworo, gi ju m’uribri i lembaribane, nia ku ba dhanu ku ba dhanu ng’atuman uwek jamiru pare, man ku ba dhanu ku ba dhanu ng’atuman uwek bong’ pare, ugonjre, nia ng’atu moko kud udwokgi ni ng’eca kendo: giworo, e giweko gicidho:

¹¹ento yo ku ng’eye gilokri, man giketho juticne gi ku bong’negi, ma gigonyo, udwogo, man gikethogi i ng’eca ni jumiru man ni bong’.

¹²Ka kumeno lembe pa Yehova bino ba Yeremia m’uai ba Yehova, m’uwacu kumae,

¹³Yehova, Mungu mir Israel, uwacu kumae: Atimo lembariba ku kwaruwu i ceng’ m’awodhogi ie woko kud i ng’om Misiri, kud i ot mi ng’eca, awacu kumae,

¹⁴I kajik mi rtindi abiro kubeng’wu kubeng’wu ng’atuman bigonyo umin ma Jaebrania, ma jung’iewo i beng’i, man m’utimo iri rundi abusiel, ibigonye eai i beng’i: ento kwaruwu winjo dwanda ngo, kadok ithgi de giciko ngo.

¹⁵E kawono wulokru, man wutimo gin m’atira i wang’a, kuyero pi gony ku ba dhanu ku ba dhanu ng’atuman ni wadi; man wutimo lembariba i wang’a i ot m’ulwongre ku nyinga:

¹⁶ento wulokru man wucido nyinga, man ku ba dhanu ku ba dhanu ng’atuman uketho jamiru pare dwogi, man ku ba dhanu ku ba dhanu ng’atuman bong’ pare, m’egonyo ku yeny ma ie yenyo; e wukelogi i ng’eca, kara ubed iwu ni jumiru man ni bong’.

¹⁷Ka kumeno Yehova wacu kumae: Wuwinjo dwanda ngo, ya wuyer pi gony, ku ba dhanu ku ba dhanu ng’atuman ni umin mire, man ku ba dhanu ku ba dhanu ng’atuman ni wadi: nen, ayero iwu pi gony, Yehova wacu, ni palamularu, ni thong’om, man ni ndru; man abiketho juthorowu kun ku kun i kind ker ceke m’i ng’om.

¹⁸Man abimio dhanu ma gikadhu ku wi lembariba para, m’utimo lembe mi lembariba ma gitimo i wang’a ungo, kinde ma gikaku i nyathi dhiang’ ma gikadhu de kud i kind wathne;

¹⁹en e judongomawijo mi Yuda, ku judongomawijo mi Yerusalem, man ju mugumba, ku julam, ku dhanu ceke m’i ng’om, ma gikadhu i kind wath nyathi dhiange:

²⁰abimiogi cil i cing’ judegi migi, man i cing’ ju m’uyenyo kwo migi; e avujgi bibedo ni cemo mi winyo ma kor polo, man ni yedi m’i ng’om.

²¹Man abimio Zedekia m’ubimo mi Yuda ku judongomawijo pare i cing’ judegi migi, man i cing’ ju m’uyenyo kwo migi, man i cing’ njuru asikari mir ubimo mi Babeli, m’uai kud i beng’wu.

²²Nen, abing’olo, Yehova wacu, man abiketho gidwogo bang’ adhura maeni; e gibikiedo i kume, gibimake de, man gibiwang’e ku mac: man abidwoko adhura mi Yuda ni uvuru, ma ng’atu moko mbe m’ubedo i ie.