Read Alur Yeremia 35 Bible Online

Yeremia 35 - Alur bible

Yeremia 35

¹Lembe m’uai ba Yehova ubino ba Yeremia i nindo pa Yehoiakim ma wod Yosia, m’ubimo mi Yuda, m’uwacu kumae,

²Cidh ba ot mi Jurekabi, man iyer igi, ikelgi de i ot pa Yehova, i kusika acel, man imi igi pigulok gimadhi.

³Alund agamu Yazania ma wod Yeremia, ma wod Habazinia, ku utumin mire, man wote ceke, ku juot dho mi Jurekabi;

⁴e akelogi i ot pa Yehova, i kusika mi wot Hanan ma wod Igdalia, ma dhanu pa Mungu, ma ni i ng’et kusika mi judongomawijo, ma ni malu wi kusika pa Maseya ma wod Calum, ma jagwok kamondo.

⁵Man aketho tabu pong’ ku pigulok ku kikombe i wang’ wot juot mi Jurekabi; e awacu igi kumae, Wumadh pigulokne.

⁶Ento giwacu kumae, Wabimadhu pigulok ungo; kum Yonadab ma wod Rekab, ma wegwa, ng’olo iwa, ewacu kumae, Kud wumadh pigulok, kadok wun, kadi wotwu, mi nja:

⁷kadi kud wugom ot, kadi coyo kodhi, kadi pidho yendulok, kadi bedo ku moko; ento wubed i hema i nindo mu ceke; kara wubed nindo dupa i ng’om ma wubedo i ie ni umondo.

⁸E waworo dwand Yonadab ma wod Rekab, ma wegwa, kum lembe ceke m’eng’olo iwa, ya ku wamadh pigulok i nindo mwa ceke, wan, ku mondwa, ku wotwa, kadi nyigwa;

⁹kadi ku wagom udi iwa ma wabed i ie; kadok podho mir ulok de wabedo ko ngo, kadi podho de, kadi kodhi:

¹⁰ento wabedo i hema, man waworo, watimo de calku gin ceke ma Yonadab ma wegwa ng’olo iwa.

¹¹Ento etimbre, kinde ma Nebukadrezar m’ubimo mi Babeli idho malu i ng’om, nia wawacu kumae, Wubin, man wek waidhu i Yerusalem ni lworo mi njuru asikari mi Jukaldayo, man ni lworo mi njuru asikari mi Jucami; kum kumeno wabedo i Yerusalem.

¹²Lembe pa Yehova lund ubino ba Yeremia, m’uwacu kumae,

¹³Yehova rair udul, Mungu mir Israel, uwacu kumae: Cidhi, man iwac ni dhanu mi Yuda ku ju m’ubedo i Yerusalem kumae. Wubijolo ponji ngo ma wuwinj ko lembe para? Yehova wacu.

¹⁴Lembe pa Yonadab ma wod Rekab, m’eng’olo ni woic, ya ku gimadh pigulok, jutimo; man cil i ceng’ ma tin gimadhu moko ngo, kum giworo lembang’ola pa kwarugi. Ento ayero iwu, m’aai ko pir man ayero; e wuwinjo dwanda ngo.

¹⁵Aoro jutic para ceke ma jubila bende i beng’wu, m’aai ko pir man aorogi, m’a wacu kumae, Kawono wudwogi ku ba dhanu ku ba dhanu ng’atuman kud i yo pare ma rac, man wuyik giratima mu, man kud wulub tok mungu mange nia wutim igi, e wubibedo i ng’om m’amio iwu man ni kwaruwu; ento wuciko ithwu ngo, kadi wuwinjo dwanda de ngo.

¹⁶Kum calu wot Yonadab ma wod Rekab utimo lembang’ola pa weggi m’eng’olo igi, enro dhanu maeni giwinjo dwanda ngo;

¹⁷ka kumeno Yehova, Mungu mir udul, Mungu mir Israel, uwacu kumae Nen, abikelo lem ma rac ceke m’ang’olo wi Yuda man wi ju m’ubedo i Yerusalem ceke; kum ayero igi, ento giwinjo ngo; e alwong’ogi, ento giloko lembe ngo.

¹⁸E Yeremia wacu ni juot mi Jurekabi kumae, Yehova mir udul, Mungu mir Israel, uwacu kumae: Kum wuworo lembang’ola pa Yonadab ma kwaruwu, man wugwoko ponji pare ceke, e wutimo calku lembe ceke m’eng’olo iwu;

¹⁹ka kumeno Yehova mir udul, Mungu mir Israel, uwacu kumae: Yonadab ma wod Rekab biyenyo dhanu kwe ngo m’ucung i wang’a mi nja.