Read Alur Yeremia 36 Bible Online

Yeremia 36 - Alur bible

Yeremia 36

¹Man etimbre i rundi mir ang’wende mi camuker pa Yehoiakim ma wod Yosia, m’ubimo mi Yuda, nia lembe maeni ai ba Yehova ubino ba Yeremia, m’uwacu kumae,

²Gam iri kitabu m’adola, man igor lembe ceke i ie m’ayero iri kum Israel, man kum Yuda, man kum thek ceke, ugambre i ceng’ m’ayero iri, ugambre i nindo pa Yosia, cil i ceng’ ma tin.

³Kuno nyo ot mi Yuda biwinjo lem ma rac ceke m’akeco ya abitimo i kumgi; kara gilokri kubang’gi kubang’gi ng’atuman kud i yo pare ma rac; kara awek kier migi ku dubo migi woko.

⁴Yeremia lund ulwong’o Baruc ma wod Neria; man Baruc ukiewo lembe ceke pa Yehova kud i dhu Yeremia m’eyero ire, wi kitabu m’adola.

⁵E Yeremia ng’olo ni Baruc, ewacu kumae, Juciko bang’a; acopo cidho i ot pa Yehova ngo:

⁶ka kumeno cidhi, man isom lembe pa Yehova m’ikiewo kud i dhoga, i kitabu m’adola, i ith dhanu i ceng’ mi kwirocam i ot pa Yehova; man isom lembene bende i ith Yuda ceke ma giai kud i adhura migi.

⁷Kuno nyo gibithiero kwac migi i wang’ Yehova, man gibilokri kubang’gi kubang’gi ng’atuman kud i yo pare ma rac; kum ng’ecwiny man kwinyo ma Yehova ng’olo kum dhanu maeni e dit.

⁸E Baruc ma wod Neria timo calku gin ceke ma Yeremia ma jabila ng’olo ire, m’esomo ko lembe pa Yehova m’i kitabu i ot pa Yehova.

⁹Nie etimbre i rundi mir abije mi camuker pa Yehoiakim ma wod Yosia, m’ubimo mi Yuda, i dwi mir abung’wende, nia dhanu ceke m’i Yerusalem ku dhanu ceke m’uai i adhura mi Yuda ubino Yerusalem, ging’olo kwirocam i wang’ Yehova.

¹⁰Baruc ulund usomo lembe pa Yeremia m’i kitabune i ot pa Yehova, i kusika pa Gemaria ma wod Cafan ma jagorcik, i lelagang’ ma yo malu, i kamondo mi dhugang’ ma nyen i ot pa Yehova, i ith dhanu ceke.

¹¹Man kinde ma Mikaya ma wod Gemaria, ma wod Cafan, uwinjo lembe ceke pa Yehova kud i kitabu,

¹²eloro piny i ot p’ubimo, i kusika pa jagorcik: man, nen, judongomawijo ceke bedo kuca, gi eni, Elicama ma jagorcik, man Delaya ma wod Cemaya, man Elnathan ma wod Akbor, man Gemaria ma wod Cafan, man Zedekia ma wod Hanania, ku judongomawijo ceke.

¹³Mikaya lund uyero igi lembe ceke m’ewinjo, kinde ma Baruc usomo kitabune i ith dhanu.

¹⁴Ka kumeno judongomawijo ceke oro Yehudi ma wod Nethania, ma wod Celemia, ma wod Kuci, ba Baruc, ewacu kumae, Gam kitabu m’adola i cingi m’isomo lembe i ie i ith dhanu, man ibin. Kum kumeno Baruc ma wod Neria gamu kitabu m’adola i cinge, e ebino i bang’gi.

¹⁵E giwacu ire kumae, Bed piny kawono, man isome i ithwa. Kum kumeno Baruc usome i ithgi.

¹⁶Nie etimbre, kinde ma giwinjo lembe ceke, gilokri ku lworo man ba wadi man ba wadi, e giwacu ni Baruc kumae, Wabiyero ni ubimo andha pi lembe maeni ceke.

¹⁷E gipenjo Baruc, giwacu kumae, Yer iwa kawono, Igoro lembe maeni ceke kud i dhoge nenedi?

¹⁸Baruc ulund uloko lembe igi kumae, Eyero lembe maeni ceke ira ku dhoge, e akiewogi ku vino i kitabu.

¹⁹E judongomawijo gilund giwacu ni Baruc kumae, Cidhi, man wupond, wuku Yeremia; man kud wuyi ng’atu moko ng’ei ka ma wuni i ie.

²⁰E gimondo bang’ ubimo i lelagang’; ento gikanu kitabu m’adolane i kusika pa Elicama ma jagorcik; e giyero lembe ceke i ith ubimo.

²¹Kum kumeno ubimo oro Yehudi ucidh ugam kitabu m’adolane; man egame ku i kusika pa Elicama ma jagorcik. E Yehudi some i ith ubimo, man i ith judongomawijo ceke m’ucungo i vut ubimo.

²²Nwang’u ubimo bedo i ot mi koyo i dwi mir abung’wende: man mac nuti 1 kendo m’uliel i wang’e.

²³Man etimbre, kinde ma Yehudi somo dhu waragane adek kadi ang’wen, nia ubimo thume ku pala man ebaye i mac ma ni i kendo, maram kitabu m’adolane ceke wang’ ko i mac ma ni i kendo.

²⁴E lworo negogi ngo, kadi kendi migi de giyeco ngo, kadok ubimo, kadi jufic pare moko m’uwinjo lembe maeni ceke.

²⁵Mange ke Elnuthan ku Delaya man Gemaria gikwayu ubimo ya kud ewang’ kitabu m’adolane ku mac; ento ewinjogi ngo.

²⁶E ubimo ng’olo ni Yeramel ma wod ubimo, man Seraya ma wod Azriel, ku Celemia ma w’ud Abdel, ya gimak Baruc ma jagorcik ku Yeremia ma jabila; ento Yehova panugi.

²⁷E lembe pa Yehova lund ubino ba Yeremia, yo ng’ei wang’u kitabu m’adola m’ubimo wang’u, ku lembe ma Baruc ugoro ku dhu Yeremia, m’uwacu kumae,

²⁸Gam iri kitabu m’adola mange kendo, man ikieu lembe ceke ma kwong’a i ie ma ni i kitabu m’adola ma kwong’a, ma Yehoiakim m’ubimo mi Yuda wang’u.

²⁹Man iwac kumae pi Yehoiakim m’ubimo mi Yuda, Yehova wacu kumae: Iwang’u kitabu m’adola maeni, iwacu kumae, Nedi ikiewo i ie, iwacu kumae, Ubimo mi Babeli bibino andha man ebinyotho ng’om maeni, man ebijigo wi dhanu ku yedi de i ie?

³⁰Ka kumeno Yehova wacu kumae pi Yehoiakim m’ubimo mi Yuda: ebibedo ku ng’atu moko ngo ma bijany wi komker pa Daudi; man jubibayu avuje ku dieceng’ i lietho, man ku diewor i koyo.

³¹Man abisende ku kodhine man jutic pare kum kier migi; e abikelo lem ma rac ceke m’ang’olo i kumgi man wi ju m’ubedo i Yerusalem, man wi dhanu mi Yuda, ento giwinjo ngo.

³²E Yeremia lund ugamu kitabu m’adola mange, man emie ba Baruc ma jagorcik, ma wod Neria, m’ukiewo lembe ceke i ie kud i dhu Yeremia m’i kitabu ma Yehoiakim m’ubimo mi Yuda wang’u i mac; e jumeao lembe dupa ma kumeni i bang’gi.