Read Alur Yeremia 37 Bible Online

Yeremia 37 - Alur bible

Yeremia 37

¹Man Zedekia ma wod Yosia camu ker calu ubimo, kaka Konia ma wod Yehoiakim, ma Nebukadrezar m’ubimo mi Babeli dwoko ni ubimo i ng’om Yuda.

²Ento kadok en, kadi jutic pare, kadi dhanu m’i ng’om de, giwinjo lembe pa Yehova ngo, m’eyero ku dhu Yeremia ma jabila.

³E Zedekia m’ubimo oro Yehukal ma wod Celemia, man Zefania ma wod Maseya, ma jalam, ba jabila ma Yeremia, giwacu kumae, Kawono kwai Yehova Mungu mwa piwa.

⁴Nwang’u Yeremia mondo man ewok woko i kind dhanu; kum gikethe ngo i kol.

⁵E njuru asikari pa Farao wok woko kud i Misiri; man kinde ma Jukaldayo m’ubetieko Yerusalem kud ali winjo rwong’gi, e gituk ku kum Yerusalem.

⁶Lembe’ pa Yehova lund ubino ba jabila ma Yeremia, m’uwacu kumae,

⁷Yehova, Mungu mir Israel, uwacu kumae, Wuwac kumae ni ubimo mi Yuda, m’uorowu i bang’a ya wupenj lembe i bang’a: Nen, njuru asikari pa Farao, m’uwok woko nikonyowu, bidok i Misiri i ng’om migi ma dhe.

⁸E Jukaldayo bibino kendo, man gibikiedo kum adhura maeni; e gibimake, man gibiwang’e ku mac.

⁹Yehova wacu kumae, Kud wubombru giwu, ma wuwac ko kumae, Jukaldayo biai kud i bang’wa andha; kum gibiai ungo.

¹⁰Kum kadok wugoi njuru asikari ceke mi Jukaldayo m’ukiedo i kumwu, man kadok donge m’udong’ gi weg lero kwa, ento kuno di giai malu kubang’gi kubang’gi ng’atuman i hema pare, man giwang’u adhura maeni ku mac.

¹¹Man etimbre nia, kinde ma njuru asikari mi Jukaldayo tuk ku ba Yerusalem ni lworo mi njuru asikari pa Farao,

¹²Yeremia lund uwok woko kud i Yerusalem kara ecidh i ng’om Benyamin, nigamu makapiny pare kuca, i kind dhanu.

¹³Man kinde m’eni dhugang’ pa Benyamin, jego mi kur ni kuca ma nyinge Irija, ma wod Celemia, ma wod Hanania; e emaku Yeremia ma jabila, ewacu kumae, Ibepodho cen ba Jukaldayo.

¹⁴Yeremia lund uwacu kumae, En e ndra; abepodho cen ba Jukaldayo ngo. Ento ewinje ngo; kum kumeno Irija maku Yeremia, man ekele ba judongomawijo.

¹⁵E kwinyo maku judongomawijo kum Yeremia man gigoye, gikethe de i odkol i ot pa Yonathan ma jagorcik; kum gidwoko maeni ni okdol.

¹⁶Kinde ma Yeremia wok i ot mi vur, man i kusikane, man Yeremia bedo kuca nindo dupa;

¹⁷Zedekia m’ubimo oro kwenda, man egame: e ubimo penje ling’ i ot pare, man ewacu kumae, Lembe moko nuti m’uai ba Yehova? E Yeremia wacu kumae, Nuti. Ewacu kumae bende, Jubimii i cing ubimo mi Babeli.

¹⁸Mange ke Yeremia wacu ni ubimo ma Zedekia kumae, Adubo iri i ang’o, kadi ni jutic peri, kadi ni dhanu maeni, ma nia iketha i odkoli?

¹⁹Kawono jubila mu m’uewo lembe iwu ni kani, m’uwacu kumae, Ubimo mi Babeli bibino i kumwu ngo, kadi i ng’om maeni?

²⁰Man kawono winj, akwei, E rwoth para m’ubimo: akwei, wek kwac para thiere i weng’i, kara kud idwoka i ot pa Yonathan ma jagorcik, amaru tho kuca.

²¹Zedekia m’ubimo lund ung’olo, man gidwoko Yeremia i lelagang’ mi jukur; man gimio ire kwen m’ang’ina ku ba rupiny ku ba rupiny ku yo ba jated kwen, maram kwen ceke mir adhura thum ko. Kum kumeno Yeremia dong’ i lelagang’ mi jukur.