Read Alur Yeremia 38 Bible Online

Yeremia 38 - Alur bible

Yeremia 38

¹Man Cefatia ma wod Matan, ku Gedalia ma wod Pacur, ku Yukal ma wod Celemia, man Pacur ma wod Malkia, giwinjo lembe ma Yeremia yero ni dhanu ceke, m’ewacu kumae,

²Yehova wacu kumae, Ng’atu m’ubedo i adhura maeni bitho ku palamularu, man ku ndru, man ku thong’om; ento ng’atu m’umondo ni Jukaldayo bibedo kwo, man kwo pare bibedo ire ni amaci, e ebibedo kwo.

³Yehova wacu kumae, Jubimio adhura maeni andha i cing’ njuru asikari p’ubimo mi Babeli, man ebimake.

⁴Judongomawijo lund uwacu ni ubimo kumae, Wakwei, wek juneg ng’atu maeni; kum ekwio cing’ dhanu mir ali m’udong’ i adhura maeni, ku cing’ dhanu ceke, ku yero wadi lembe maeni igi: kum ng’atu maeni yenyo bedober mi dhanu maeni ngo, endre lem ma rac.

⁵E Zedekia m’ubimo wacu kumae, Nen, eni i cingwu; kum ubimo en e ng’atu ma copo timo gin moko ngo i kumwu.

⁶Gilund gimaku Yeremia, man gibaye i vur pa Malkia ma wod ubimo, ma ni i lelagang’ mi jukur: e giluro Yeremia ku thol. Man pi mbe i vuje, ento unzabu; e Yeremia loro piny i unzabu.

⁷Nie kinde ma Ebed-melek ma Jaethiopia, ma jamugumba, ma ni i ot p’ubimo, winjo nia giketho Yeremia i Vur (nwang’u ubimo bedo dhugang’ pa Benyamin i nindo nica),

⁸Ebed-melek uwok woko kud i ot p’ubimo, man eyero ni ubimo, ewacu kumae,

⁹Rwoth para m’ubimo, dhanu maeni gitimo rac i gin ceke ma gitimo kum Yeremia ma jabila, ma gibolo i vur; man emaru tho i ka m’eni i ie, kum ndru; kum kwen umbe i adhura.

¹⁰Ubimo lund ung’olo ni Ebed-melek ma Jaethiopia, ewacu kumae, Gam dhanu pier adek wuci kugi, man wuting’ Yeremia ma jabila kud i vur, ma fodi k’etho ngo.

¹¹Kum kumeno Ebed-melek ugamu dhanu, e gicidho gikugi, i ot p’ubimo the kakanpiny, e gigamu uthirbongu ku korikori bongu keca, e giluro gi piny i vur ku thol ba Yeremia.

¹²Man Ebed-melek ma Jaethiopia wacu ni Yeremia kumae, Kawono keth uthirbongu maeni ku korikori bongu the yothi the thol. E Yeremia timo kumeca.

¹³Kum kumeno giwodho Yeremia ku thondhe, man giting’e kud i vur: e Yeremia dong’ i lelagang’ mi jukur.

¹⁴E Zedekia m’ubimo lund uoro kwenda, man egamu Yeremia ma jabila i bang’e i kamondo mir adege ma ni i ot pa Yehova: man ubimo wacu ni Yeremia kumae, Abipenji ku lembe acel; kud ipan gin moko ira.

¹⁵Yeremia lund uwacu ni Zedekia kumae, Tek ayero maeni iri, ibinega ngo andha? man tek amio iri lembapora, ibiwinjo dwanda ngo.

¹⁶Kum kumeno Zedekia m’ubimo kwong’o kwong’ ling’ ling’ ni Yeremia, ewacu kumae, Calu Yehova bedo kwo, m’utimo iwa ng’eyong’ec maeni, abinegi ngo, kadi abimii i cing’ dhanu maeni m’uyenyo kwo peri e de ngo.

¹⁷Yeremia lund uwacu ni Zedekia kumae, Yehova, Mungu mir udul, Mungu mir Israel, uwacu kumae: Tek ibimondo ni judongomawijo mir ubimo mi Babeli, e ng’eyong’ec peri bilund bedo kwo, e jubiwang’u adhura maeni ku mac ungo; e ibibedo kwo, ku ot peri.

¹⁸Ento tek ibimondo ni judongomawijo mir ubimo mi Babeli ngo, jubilund mio adhura maeni i cing’ Jukaldayo, e gibiwang’e ku mac, man ibiboth ungo kud i cing’gi.

¹⁹E Zedekia m’ubimo wacu ni Yeremia kumae, Lworo nega kum Juyahudi m’upodho cen ba Jukaldayo, gimaru mia i cing’gi, man gicaya.

²⁰Ento Yeremia wacu kumae, Gibimii ngo. Akwei, wor dwand Yehova, i maeno m’ayero iri: e ebibedo ber iri, man ng’eyong’ec peri bikwo.

²¹Ento tek ikwero mondo, maeni lembe ma Yehova nyutho ira:

²²Nen, mon ceke m’udong’ i ot p’ubimo mi Yuda jubiwodho woko ba judongomawijo p’ubimo mi Babeli, e mon maeno biwacu kumae, Jurimbi m’ing’io kugi gibombi, man gisegi: kawono kinde ma tiendi mwony i unzabu, gilokri cen.

²³E gibiwodho mon peri ceke ku nyithindhi ba Jukaldayo; e ibiboth ungo kud i cing’gi, ento cing ubimo mi Babeli bimeki: e ibiketho juwang’u adhura maeni ku mac.

²⁴Zedekia lund uwacu ni Yeremia kumae, Kud iyi ng’atu moko ng’ei lembe maeni, e ibitho ngo.

²⁵Ento tek judongomawijo winjo nia waweco wakudi, e gibino i beng’i, man giwacu iri kumae, Kawono yer iwa lembe m’iwacu ni ubimo; kud ipane iwa, e wabinegi ngo; ku lembe m’ubimo yero iri bende:

²⁶ibilund wacu igi kumae, Athiero kwac para i wang’ ubimo, kara kud eketh adok i ot pa Yonathan, nitho kuca.

²⁷E judongomawijo ceke gilund gibino ba Yeremia, c gipenje; man eyero igi calku lembe maeni ceke m’ubimo ng’olo. E giweko weco i bang’e; kum lembene tuc ungo.

²⁸E Yeremia bedo i lelagang’ mi lukur cil i ceng’ ma jumaku ie Yerusalem.