Read Alur Yeremia 39 Bible Online

Yeremia 39 - Alur bible

Yeremia 39

¹E etimbre kinde ma jumaku Yerusalem, (I rundi mir abung’wende mi camuker pa Zedekia m’ubimo mi Yuda, i dwi mir apaje, Nebukadrezar m’ubimo mi Babeli ku njuru asikari pare ceke gibino kum Yerusalem, man gitieke kud ali;

²i rundi apar wi acende mi camuker pa Zedekia, i dwi mir ang’wende, i ceng’ mir abung’wende mi dwije, jumoro wang’ gang’kidi mir adhurane),

³nia judongomawijo ceke mir ubimo mi Babeli gimondo, man gibedo i dhugang’ mi diere, ma gi eni, Nergal-carezer, man Samgar-nebo, man Sarsekim, man Rab-saris, man Nergal-carezar, man Rab-mag, ku dong’ judongomawijo ceke mir ubimo mi Babeli.

⁴Man etimbre nia, kinde ma Zedekia m’ubimo mi Yuda ku dhanu mir ali ceke ginenogi, gilund giringo, e giwok woko kud i adhura ku diewor, ku yo mi podho p’ubimo, kud i dhugang’ ma kind gang’kidi ario; e ewok woko yo bang’ Araba.

⁵Ento njuru asikari mi Jukaldayo lubo tokgi, e girubo Zedekia i pambu mi Yeriko: man kinde ma gimake, gitere malu ba Nebukadrezar m’ubimo mi Babeli i Ribla i ng’om Hamath; e epoko lembe i wie.

⁶Ubimo mi Babeli lund unego wot Zedekia i Ribla i wang’e; ubimo mi Babeli nego weg yung mi Yuda bende ceke.

⁷Mange ke eloyo wang’ Zedekia, man etwie ku gwang’, kara etere i Babeli.

⁸E Jukaldayo wang’u ot p’ubimo, ku udi mi dhanu, ku mac, man girwombo gang’kidi mi Yerusalem.

⁹Nebuzaradan ma jego mi jukur ulund uyaku dong’ dhanu m’udong’ i adhurane, eterogi i Babeli ni ng’eca, ju m’umondo bende m’upodho cen i bang’e, ku dong’ dhanu m’udong’.

¹⁰Ento Nebuzaradan ma jego mi jukur uweko jucan mi dhanu, m’ubedo ku gin moko ngo, i ng’om Yuda, man emio igi podho mir ulok ku pothi i nindo nica.

¹¹Nie Nebukadrezar m’ubimo mi Babeli mio ng’ol pi Yeremia ni Nebuzaradan ma jego mi jukur, ewacu kumae,

¹²Game, man inen bang’e cu, man kud itime rac; ento tim i bang’e cil calu ebiwacu iri.

¹³Kum kumeno Nebuzaradan ma jego mi jukur uoro kwenda, e Nebucazban, ku Rabsaris, man Nergal-carezer, ku Rab-mag, ku jego ceke ma dongo mir ubimo rai Babeli;

¹⁴gioro kwenda, man gigamu Yeremia kud i lelagang’ mi jukur, e gimie ba Gedalia ma wod Ahikam, ma wod Cafan, kara etere pacu. Kum kumeno ebedo i kind dhanu.

¹⁵Nie lembe pa Yehova bino ba Yeremia, kinde ma juciko bang’e i lelagang’ mi jukur, m’uwacu kumae,

¹⁶Cidhi, man iyer ni Ebed-melek ma Jaethiopia, wac kumae, Yehova mir udul, Mungu mir Israel, uwacu kumae: Nen, abikelo lem para wi adhura maeni mi lem ma rac, man mi lem ma ber ungo; man gibitimbri kakare i weng’i i ceng’ maeca.

¹⁷Ento abibodhi i ceng’ maeca, Yehova wacu; man jubimii ngo i cing’ dhanu m’ilworo.

¹⁸Kum abibodhi andha, man ibipodho ngo ku palamularu, ento kwo peri bibedo iri ni amaci; kum iketho genogen peri i kuma, Yehova wacu.