Read Alur Yeremia 40 Bible Online

Yeremia 40 - Alur bible

Yeremia 40

¹Lembe m’uai ba Yehova bino ba Yeremia, yo ng’ei wek ma Nebuzaradan ma jego mi jukur uweke eai ko i Rama, kinde m’emake m’ebedo atwia ku nyoro kind ng’eca ceke mi Yerusalem ku Yuda, ma juyaku jutero ni ng’eca i Babeli.

²E jego mi jukur ugamu Yeremia man ewacu ire kumae, Yehova Mungu peri ng’olo lem ma rac maeni i ka maeni;

³e Yehova kele, man etimo calku lembe m’eyero: kum wudubo ni Yehova, man wuworo dwande ngo, e ka kumeno lembe maeni wok i kumwu.

⁴Man kawono, nen, agonyi tin ni nyoro ma ni i cingi. Tek ebedo ber iri y a waci wakudi i Babeli, bin, e abineno beng’i; ento tek ebedo rac iri ya waci wakudi Babeli, bedi; nen, ng’om ceke ni i weng’i; ka m’ubedo ber man atira iri ya icidh i ie, cidh kuca.

⁵Nie kinde ma fodi edok ungo, ewacu kumae, Ka kumeno dok ba Gedalia ma wod Ahikam, ma wod Cafan, m’ubimo mi Babeli dwoko ni jabim wi adhura mi Yuda, man ibed karacelo kude kind dhanu; kadi icidh ka ma tek ebedo atira iri ya icidhi. Kum kumeno jego mi jukur umio ire cemo ku giramia, man eweko ecidho.

⁶E Yeremia lund ucidho ba Gedalia ma wod Ahikam i Mizpa, e gibedo karacelo kude i kind dhanu m’udong’ i ng’om.

⁷Nie kinde ma jego ceke mi njuru asikari ma ni i yamba, en e gin ku dhanu migi, giwinjo nia ubimo mi Babeli ketho Gedalia ma wod Ahikam ni jabim i ng’ombe, man eketho co, ku mon, ku nyithindho, man kind jucan ma dit m’i ng’ombe the cinge, kind ju ma juyaku jutero ni ng’eca ngo i Babeli;

⁸gilund gibino ba Gedalia i Mizpa, gi eni, Icmael ma wod Nethania, man Yohanan ku Yonathan ma gi wot Kareya, man Seraya ma wod Tanhumeth, man wot Efai ma Janetofathi, man Yezania ma wod Jamakathi, gin ku dhanu migi.

⁹Man Gedalia ma wod Ahikam ma wod Cafan, ukwong’o kwong’ igi man ni dhanu migi, ewacu kumae, Lworo timo ni Jukaldayo kud unegwu: wubed i ng’om, man wutim ni ubimo mi Babeli, e ebibedo ber iwu.

¹⁰Pi an, nen, abedo i Mizpa, kara acung i wang’ Jukaldayo ma bibino i bang’wa: ento wun, wucok pigulok ku nying’ piny mi cwir man mo, e wukethgi i agulu mu, man wubed i adhura mu ma wumaku.

¹¹Kumeno kinde ma Juyahudi ceke ma gini i Moab, man i kind nyithindho mir Amon, man i Edom, man ma ni i ng’om ceke, giwinjo nia ubimo mi Babeli weko dong’ dhanu mi Yuda, man nia eketho Gedalia ma wod Ahikam, ma wod Cafan, i wigi;

¹²e Juyahudi ceke gilund gidwogo kud i kaka ceke ma juriemogi i ie, e gibino i ng’om Yuda, ba Gedalia, i Mizpa, man gicoko pigulok ku nying’ piny mi cwir dit apila.

¹³Mange ke Yohanan ma wod Kareya, ku jego mi njuru asikari ceke ma ni i yamba, gibino ba Gedalia i Mizpa,

¹⁴e giwacu ire kumae, Ing’eyo nia Balis m’ubimo mi nyithindho mir Amon uoro Icmael ma wod Nethania unegi? Ento Gedalia ma wod Ahikam uyio igi ngo.

¹⁵Yohanan ma wod Kareya lund uyero ni Gedalia i Mizpa mung’ mung’, ewacu kumae, Akwei, wek acidh aneg Icmael ma w’od Nethania, e ng’atu moko mbe ma bing’eyo maeni: pirang’o enegi, ketho Juyahudi ceke m’ucokri i kumi gilal, man dong Yuda rwinyi?

¹⁶Ento Gedalia ma wod Ahikam uwacu ni Yohanan ma wod Kareya kumae, Kud itim gin maeni; kum iyero ndra pi Icmael.