Read Alur Yeremia 42 Bible Online

Yeremia 42 - Alur bible

Yeremia 42

¹E jego ceke mi njuru asikari, ku Yohanan ma wod Kareya, man Yezania ma wod Hocaya, ku dhanu ceke ugambre kum ma nok cil kum ma dit, gilund gicoro ceng’ni,

²man giwacu ni Yeremia ma jabila kumae, Wakwei, wek kwac mwa thiere i weng’i, man ikwai iwa ba Yehova Mungu peri, en e pi dong’ dhanu maeni ceke (kum wadong’ nok ma naka wa dupa, calu weng’i benenowa),

³kara Yehova Mungu peri nyuth iwa yo ma maku wawoth i ie, man gin ma maku watim.

⁴E Yeremia ma jabila lund uwacu igi kumae, Awinjowu; nen, abirwo ni Yehova Mungu mu calku lembe mu; man ebitimbre nia gin ma tek Yehova biloko iwu, abiyero ginde iwu; abicero gin moko ngo iwu.

⁵Gilund giwacu ni Yeremia kumae, Yehova bed jamulembe andha man mandha i kindwa, tek watimo ngo calku lembe ceke ma Yehova Mungu peri biori ko i bang’wa.

⁶Tek ebedo ber, kadi tek ebedo rac, wabiworo dwand Yehova Mungu mwa, ma waori i bang’e; kara ebed ber iwa, kinde ma waworo dwand Yehova Mungu mwa.

⁷Man etimbre yo ng’ei ceng’ apar, nia lembe pa Yehova bino ba Yeremia.

⁸Elund elwong’o Yohanan ma wod Kareya, ku jego ceke mi njuru asikari ma ni kude, ku dhanu ceke ugambre kum ma thindho cil kum ma dongo,

⁹man ewacu igi kumae, Yehova, Mungu mir Israel, ma wuora i bang’e kara athier kwac mu i wang’e, uwacu kumae:

¹⁰Tek wubibedo i ng’om maeni asu, abilund gomowu, man abiyakuwu ngo, e abipidhowu, man abifudhowu ngo; kum alokra gira kum lem ma rac m’atimo i kumwu.

¹¹Lworo kud unegwu kum ubimo mi Babeli, ma lworo negowu i kume; lworo kud unegwu i kume, Yehova wacu: kum ani kudu mi bodhowu, man mi laruwu kud i cinge.

¹²E abimio iwu kisa, kara kisa nege i kumwu, man eketh wudwog i ng’om mu ma dhe.

¹³Ento tek wuwacu kumae, Wabibedo i ng’om maeni ngo; ketho nia wuwor dwand Yehova Mungu mu ngo,

¹⁴ma wuwacu ko kumae, Ungo; ento wabicidho i ng’om Misiri, ka ma wabineno ie ali ngo, kadi wabiwinjo badwal mir agwara de ngo, kadi kec mi kwen de binego wa ngo: e wabibedo kuca:

¹⁵ka kumeno kawono wuwinj lembe pa Yehova, E dong’ dhanu m’udong’ mi Yuda: Yehova mir udul, Mungu mir Israel, uwacu kumae, Tek wuketho weng’wu andha kum mondo i Misiri, man wucidho ni umondo kuca;

¹⁶ebilund timbre, nia palamularu, ma wulworo, birubowu kuca i ng’om Misiri; man ndru, ma wulworo, bilubo tokwu kuca i Misiri; e wubitho kuca.

¹⁷Ebibedo kumeno ku dhanu ceke m’uketho wang’gi kum cidho i Misiri ni umondo kuca: gibitho ku palamularu, man ku ndru, man ku thong’om; e ng’atu moko mbe m’i kindgi ma bidong’ kadi ma biboth ni lem ma rac m’abikelo i wigi.

¹⁸Kum Yehova mir udul, Mungu mir Israel, uwacu kumae: Calu ng’ecwiny para ku kwinyo para konjre woko wi ju m’ubedo i Yerusalem, e kwinyo para bikonjre woko i kumwu kumeca, kinde ma wubimondo i Misiri; e wubibedo ni lam, man ni wang’uic, man ni kwong’, man ni cac; e wubineno kakeni kendo ngo.

¹⁹Yehova yero piwu kumae, E dong’ dhanu m’udong’ mi Yuda, Kud wumond i Misiri: wung’ei andha nia atuco iwu i ceng’ maeni.

²⁰Kum wutimo kud abombi kum ng’eyong’ec mu giwu; kum wuora ba Yehova Mungu mu, wuwacu kumae, Kwai Yehova Mungu mwa piwa; man calku gin ceke ma Yehova Mungu mwa biyero, yer iwa kumeca, e wabitime.

²¹E tinuni ayero maeni iwu; ento wuworo dwand Yehova Mungu mu ngo i gin moko m’eora ie i beng’wu pire.

²²Ka kumeno kawono wung’ei andha nia wubitho ku palamularu, man ku ndru, man ku thong’om, i ka ma wuyenyo wucidh i ie kuca ni umondo.